ޑރ. އިޔާޒަށް މަރުގެ އިންޒާރު ދިން މައްސަލައެއް ފުލުސް އޮފީހަށް ހުށަހަޅައިފި
25 ޖެނުއަރީ 2023 | ބުދަ 02:22މިއީ ފޭސްބުކްގައި މީހަކު ދިން އިޒާރަކާ ގުޅިގެން ހުށަހެޅި މައްސަލައެއް
ޑރ އިޔާޒު
އަދާލަތު ޕާޓީގެ އިސްފަނޑިޔާރު އަދި އެ ޕާޓީގެ އިލްމުވެރިންގެ މަޖިލީހުގެ ނައިބު ރައީސް ޑރ. މުހައްމަދު އިޔާޒު އަބްދުއްލަތީފް މަރާލުމަށް ގޮވާލި މީހެއްގެ މައްސަލަ ފުލުހުންނަށް ހުށަހަޅައިފިއެވެ.
މި މައްސަލަ އަދާލަތު ޕާޓީގެ ފަރާތުން ފުލުހުންނަށް ހުށަހަޅާފައިވާ ކަމަށް ވިދާޅުވީ ހޯމް މިނިސްޓްރީގެ ސްޓޭޓް މިނިސްޓަރު އަދި އަދާލަތުގެ ތަރުޖަމާނު އަލީ ނަޒީރެވެ. އެގޮތުން ނަޒީރު ކުރެއްވި ޓުވީޓެއްގައި ވިދާޅުވީ އަދާލަތު ޕާޓީގެ އިސްފަނޑިޔާރު އަދި ޢިލްމުވެރިންގެ މަޖިލީހުގެ ނާއިބު ރައީސް ޑރ މުޙައްމަދު ޢިޔާޒު ޢަބްދުއްލަތީފު މެރުމަށް، މީސްމީޑިއާގައި ގޮވާލާ އިންޒާރުދިން މައްސަލަ ސީރިއަސް މައްސަލައެއްގެ ގޮތުގައި ބަލައިދިނުމަށް އެދި ފުލުހުންގެ ޚިދުމަތަށް ޢަދާލަތު ޕާޓީގެ ފަރާތުން ހުށަހަޅާފައިވާ ކަމަށެވެ.
މިއީ ފޭސްބުކްގައި މީހަކު ދިން އިޒާރަކާ ގުޅިގެން ހުށަހެޅި މައްސަލައެކެވެ. އިޔާޒުގެ ފޮޓޯ ހިމެނޭ އޭނާގެ ޚަބަރެއް ފޭސްބުކްގައި ޕޯސްޓު ކުރުމަށް ފަހު އެ މީހާ ވަނީ އިޔާޒު ދަންޖައްސާ މަރާލުމަށް ބުނެފައެވެ.
ޑރ. އިޔާޒަކީ ސޯޝަލް މީޑިއާގައި ވަރަށް އެކްޓިވް ބޭފުޅެކެވެ. އަދި ރާއްޖޭގެ ސިޔާސީ މަސްރަހުގައި ހިނގާ ކަންކަމާ ގުޅޭގޮތުން އަބަދުވެސް އޭނާގެ ޚިޔާލު ފާޅުކުރައްވައެވެ.
