އަމާޒަށް ދުނި ޖެހުމުގައި އަތީރުގެ ސާބިތުކަން ކަސިޔާރުވުމެއް ނެތް

ޔަމަނުގެ ސަނާގައި 2021 ވަނަ އަހަރު ކުރިއަށްދިޔަ ދުނިދަނޑި އުކުމުގެ މުބާރާތުގައި ވާދަ ކުރަން ހުރި އަތީރު އަލް-ޙުސައިނީގެ މޫނު މަތިން ފެންނަމުން ދިޔައީ އެކަމަށް އޭނާ ދެމުން ދިޔަ، ބަދަލުވުމެއް ނެތް ސަމާލުކަމެވެ. އަމާޒަށް ދުނި އުކުން ފިޔަވާ އިތުރު އެއްވެސް ކަމެއް، އެ ޒުވާން ސިކުނޑީގައި ދައުރު ނުވާ ފަދައެވެ.

ބޯ އެންޑް އެރޯ ނުވަތަ އަމާޒަށް ދުނި އުކުމަކީ ޔަމަނަށް އާ ކުޅިވަރެކެވެ. މިހާތަނަށް އެ ޤައުމުގައި ބާއްވާފައި ވަނީ މިފަދަ އެންމެ 4 މުބާރާތެވެ. 2021 ވަނަ އަހަރު ކުރިއަށް ދިޔަ މުބާރާތް ކާމިޔާބު ކުރި އަތީރު ފާހަގަ ކުރެވުނީ ޢުއްމީދީ ކުޅުންތެރިއެއްގެ ގޮތުގައެވެ. މުބާރާތުން އޭނާ ކަށަވަރު ކުރީވެސް ފަޚްރުވެރި 1 ވަނަ ދަރަޖައެވެ.

ޔަމަނުގެ ޤައުމީ ޓީމާއެކު ތަމްރީނު ކުރުމަށް އަތީރަށް ފުރުޞަތު ލިބުނެވެ. އަދި އޭޝިއާ ޗެމްޕިއަންޝިޕްގައި ވާދަ ކުރުމުގެ ނަޞީބުވެސް އޭނާގެ އަތުގައި ހިފިއެވެ. އެ މުބާރާތުގައިވެސް އަތީރުގެ ނަން ވިދާލިއެވެ. އޭނާގެ ހުނަރުވެރިކަން ފާހަގަ ކުރެވުނެވެ. ދުނިދަނޑި އުކުމާ ބެހޭ ޔަމަނުގެ ފެޑަރޭޝަނުންވެސް އަތީރާ މެދު ކުރަނީ ފޮނި ޢުއްމީދެކެވެ.

ހަނގުރާމައިގެ ސަބަބުން ސުންނާފަތި ވެފައި އޮތް ޔަމަނުގައި، ކުޅިވަރު މައިދާނުގައި އަންހެނުން ކުރިއަރާ ދިއުމަށް ތަފާތު އެކި ކަހަލަ ގޮންޖެހުންތަކާ އޮންނަނީ ކުރިމަތިލާން ޖެހިފައެވެ. އެކަށީގެންވާ ޢާލަތްތައް ނެތުމާއި، ތަމްރީނުތައް ކުރިއަށް ގެންދާނެ މަރުކަޒުތައް ނެތުމަކީވެސް އެފަދަ ހުރަސްތަކުގެ ތެރޭގައި ހިމެނޭ ބައެއް ކަންކަމެވެ.

މި ހުރިހާ ކަމެއްގެ އިތުރަށް، މުޖުތަމަޢުގައި ކުޅިވަރަށް މާ ބޮޑު ސަމާލުކަމެއް ދެވިފައި ނެތުމަކީ، އަތީރު ފަދަ ޒުވާނުންނަށް ގިރާ ކުރަން ޖެހިފައި ވާ އެންމެ ބޮޑު ހުރަސް ކަން، ޔަމަނުގެ ޤައުމީ ބޮކްސިންގް ޓީމަށް ކޯޗުކަން ކޮށްދެމުން ދާ އަތީރުގެ ބައްޕަ ފާހަގަ ކުރިއެވެ.

ގޮންޖެހުންތަކާއި ހުރަސްތައް ކިތަންމެ ގިނަވި ކަމުގައި ވީ ނަމަވެސް، ޢުމުރުން އެންމެ 17 އަހަރުގެ އަތީރުގެ ޢުއްމީދާއި ޢަޒުމު ފިސާރި ވަރުގަދައެވެ. އޭނާ އަމާޒު ހިފާފައި ހުރީ ޤައުމީ އޮލިމްޕިކް ސްކޮޑުން ޖާގައެއް ހޯދުމަށެވެ. އަދި ޤައުމަށް މެޑަލްއެއް ހޯދާ ދިނުމަށެވެ