ކްރިމިނަލް ކޯޓުގެ ގާޒީކަމުގެ މަޤާމަށް ކުރިމަތިލުމުގެ ފުރުޞަތު މާދަމާގެ ނިޔަލަށް
23 ޖެނުއަރީ 2023 | ހޯމަ 03:58ޖޭއެސްސީން ކުރި އިއުލާނެއްގައި ވަނީ 2 ފަނޑިޔާރަކު ހޯދުމަށް އިއުލާނު ކޮށްފައި
ކްރިމިނަލް ކޯޓް
ކްރިމިނަލް ކޯޓުގެ ފަނޑިޔާރުކަމުގެ މަޤާމަށް ކުރިމަތިލުމަށް ޖުޑީޝަލް ސާވިސް ކޮމިޝަން (ޖޭއެސްސީ) އިން ހުޅުވާލާފައިވާއިރު، މަޤާމަށް ކުރިމަތިލުމުގެ ސުންގަޑި އަންގާރަ ދުވަހު ހަމަވާނެއެވެ.
ޖޭއެސްސީން ކުރި އިއުލާނެއްގައި ވަނީ 2 ފަނޑިޔާރަކު ހޯދުމަށް އިއުލާނު ކޮށްފައެވެ.
ކްރިމިނަލް ކޯޓުގެ ފަނޑިޔާރު ކަމަށް ކުރިމަތިލާން ބޭނުންވާ ފަރާތްތަކަށް އެކަމަށް އެދުމުގެ ފުރުސަތު 24 ޖެނުއަރީ 2023 ގެ 12:00 އާ ހަމައަށް ވަނީ ހުޅުވާލައިފައެވެ. އެގޮތުން މި މަގާމަށް ޝައުގުވެރިވާ ފަރާތްތަކަށް ކޮމިޝަނުގެ ފަހިރެސް ޕޯޓަލްގެ ޒަރީއާއިން ފޯމާއި ލިޔެކިޔުންތައް ހުށަހެޅޭނެ ކަމަށް ޖޭއެސްސީން ބުނެއެވެ.
ކްރިމިނަލް ކޯޓުގެ ފަނޑިޔާރެއްގެ މުސާރައަކީ އިނާޔަތްތަކާއިއެކު 48،300 ރުފިޔާއެވެ. އެއީ އަސާސީ މުސާރައިގެ ގޮތުގައި ލިބޭ 30،000 ރުފިޔާ އާއި، ލިވިންގ އެލަވަންސްގެ ގޮތުގައި 15,000 ރުފިޔާގެ އިތުރުން، ރިސްކް އެލަވަންސްގެ ގޮތުގައި ކަނޑައަޅާފައިވާ 3,300 ރުފިޔާއެވެ.
ހަމައެއާއެކު ގާނޫނު ނަންބަރު 2010/13 (ދިވެހިރާއްޖޭގެ ފަނޑިޔާރުންގެ ގާނޫނު)ގައި ވާ ގޮތުގެ މަތިން، ރައްޔިތުންގެ މަޖިލީހުން ކަނޑައަޅާފައިވާ ގޮތުގެ މަތިން މެޑިކަލް އެލަވަންސްއާއި ފޯނު އެލަވަންސްވެސް ލިބިދެއެވެ.
