ގދ.ތިނަދޫއިން ގޯތި ދޫކުރަން ފަށައި، ތިނަދޫ ސިޓީއަކަށް ހަދަނީ
ސިޔާސީ ވިސްނުމަށް އަންނަ ބަދަލެއްގެ ސަބަބުން ސަރުކާރުގެ ޕްރޮޖެކްޓުތައް ހުއްޓުވާ ނުލެވޭނެ
އެމްޑީޕީ ޕްރައިމަރީ - ގދ. ތިނަދޫގައި ބޭއްވި ރައީސްގެ ކެމްޕެއިން ޖަލްސާ
ތިނަދޫއިން ގޯތި ދޫކުރުމަށް ކައުންސިލުން ވަރަށް އަވަހަށް އިއުލާނު ކުރައްވާނެކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ސާލިޙު ވިދާޅުވެއްޖެއެވެ.
އާދިއްތަ ދުވަހު ގދ ތިނަދޫގައި ބޭއްވި ކެމްޕޭނު ޖަލްސާގައި ވާހަކަފުޅު ދައްކަވަމުން ރައީސް ވަނީ ތިނަދޫގައި ކުރިއަށްދާ ތަރައްޤީގެ އެކި މަޝްރޫއުތަކަށް އަލިއަޅުވާލައްވާފައެވެ.
ރައީސް ވިދާޅުވީ، ބައެއްގެ ސިޔާސީ ވިސްނުމަށް އަންނަ ބަދަލެއްގެ ސަބަބުން ސަރުކާރުގެ ޕްރޮޖެކްޓުތައް ހުއްޓުވާ ނުލެވޭނެ ކަމަށެވެ.
ސަރުކާރުގެ އެއްވެސް މުވައްޒަފަކު ކަންބޮޑުނުވުމަށް ވެސް ރައީސް ވަނީ އެދިވަޑައިގަންނަވާފައެވެ. އެގޮތުން ސަރުކާރުގެ އެއްވެސް މަޝްރޫއެއް ކުރިއަށް ގެންދިއުމަށް ފަސްޖެހެން ނުޖެހޭކަން ފާހަގަ ކުރައްވައި ރައީސް ވިދާޅުވީ، މުވައްޒަފުންގެ ވަޒީފާއަށް އަދި ކުރިއެރުމަށް ސަރުކާރުން ކުރަންޖެހޭ ކޮންމެ ކަމެއް ކުރާނެ ކަމަށާއި، އެ މުވައްޒަފުންގެ ހިމާޔަތުގައި ސަރުކާރު އޮންނާނެކަމަށެވެ.
ތިނަދޫ ރައްޔިތުންނަށް ބޯހިޔާވަހިކަން ބޭނުންވާކަން ފާހަގަ ކުރައްވައި ރައީސް ވިދާޅުވީ، ތިނަދޫއިން ގޯތި ދޫކުރުމަށް ކައުންސިލުން ވަރަށް އަވަހަށް އިއުލާނު ކުރައްވާނެ ކަމަށެވެ.
އޭގެ އިތުރުންވެސް ހައުސިންގ ޔުނިޓުތައް އިތުރު ކުރުމަށް ފިނޭންސް މިނިސްޓްރީން މިހާރު ކުރަންޖެހޭ މަޝްވަރާތައް ކުރަމުންދާކަމަށް ރައީސް ވިދާޅުވިއެވެ.
ތިނަދޫއަކީ ސަރުކާރުން އެންމެ ބޮޑު ހޭދައެއް ކުރާ އެއް ރަށް ކަންވެސް ރައީސް ފާހަގަ ކުރެއްވިއެވެ.
ރައީސް ވިދާޅުވީ، ތިނަދޫ ސިޓީއަކަށް ހެދުމުގެ މަސައްކަތްތައް ކުރިއަށް ގެންގޮސް، ލަސްތަކެއް ނުވެ އެކަމުގެ ރަސްމިއްޔާތުގައި ބައިވެރިވުމަށް ވަޑައިގެންނެވޭނެކަމުގެ އުއްމީދު އެބައޮތް ކަމަށެވެ.
ރައީސް ވަނީ ރަނގަޅު ވިސްނުމަކާއެކު އިންތިޚާބުގައި ވޯޓު ލުމަށް އެދިވަޑައިގަންނަވާފައެވެ. އެމްޑީޕީ ޕްރައިމަރީގައި ތަފާތު ބޮޑު ނަތިޖާއަކުން އެމަނިކުފާނު ކާމިޔާބު ކުރައްވާނެ ކަމުގެ ޝައްކެއް ނެތްކަމަށް ވެސް ރައީސް ސާލިޙު ވިދާޅުވިއެވެ.
