ސްޕެނިޝް ލީގުގައި ރެއާލް ވަލޮޑޮލިޑް ބަލިކޮށް އެތުލެޓިކޯ މެޑްރިޑު ލީގު ތާވަލްގެ ހަތަރު ވަނަ އަށް ޖެހިލައިފި އެވެ.

ހޮނިހިރު ދުވަހުގެ ރޭ އެތުލެޓިކޯގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބުކުރީ 3-0 އިންނެވެ. މެޗުގައި އެތުލެޓިކޯގެ ފުރަތަމަ ލަނޑު ޖަހައިދިނީ އަލްވާރޯ މޮރާޓާ އެވެ. ފްރާންސްގެ ތަރި އެންޓޮއިން ގްރީޒްމަން ދިން ބޯޅައެއް ވަލޮޑޮލިޑުގެ ޑިފެންޑަރަކު ކައިރިން ނައްޓައި، މޮރާޓާ ބޯޅަ ފޮނުވާލީ ގޯލުގެ ތިރީ ކަނަށެވެ. މެޗުގައި އެތުލެޓިކޯގެ ލީޑު ފުޅާކޮށްދިނީ ގްރީޒްމަން އެވެ. އެއީ ނަހުއެލް މޮލީނާ ދިން ބޯޅައެއް ގޯލަށް ފޮނުވާލައިގެން މެޗުގެ 23 ވަނަ މިނެޓުގައި ގްރީޒްމަން ޖަހައިދިން ލަނޑެކެވެ. އެތުލެޓިކޯގެ ލީޑު ތިން ލަނޑަށް ފުޅާކޮށްދިނީ މާރިއޯ ހާމޯސޯ އެވެ. އެއީ ގްރީޒްމަން ހުރަސްކޮށްދިން ބޯޅައެއް ބޮލުން ފޮނުވާލި ވަގުތު ވަލޮޑޮލިޑުގެ ގޯލް ކީޕަރުގެ އަތުގައި ޖެހި ރީ ބައުންސަށް ނުކުތް ބޯޅަ ގޯލަށް ވައްދާލައިގެންނެވެ.

މެޗުން މޮޅުވެ އެތުލެޓިކޯ ހަތަރު ވަނައިގައި އޮތީ ކުޅުނު 18 މެޗުން 31 ޕޮއިންޓާއެކު އެވެ. މެޗުން ބަލިވި ވަލޮޑޮލިޑް އޮތީ 17 ޕޮއިންޓާއެކު ރެލިގޭޝަން ޒޯންގަ އެވެ. ލީގު ތާވަލްގެ ތިން ވަނައިގައި އޮތް ރެއާލް ސޮސިއެޑާޑާ ދެމެދު އޮތީ ހަތް ޕޮއިންޓުގެ ފަރަގެކެވެ.