ކާބޯތަކެއްޗާއެކު ދަތުރުކުރި 100 އަށް ވުރެ ގިނަ ބޯޓު ރަޝިއާ އިން ހިފަހައްޓާފައިވާ ކަމަށް ޔޫކްރެއިނުން ތުހުމަތުކޮށްފިއެވެ.
ޔޫކްރެއިންގެ ރައީސް ވޮލޮޑޮމިރް ޒެލެންސްކީ ހޮނިހިރު ދުވަހު ވިދާޅުވީ ރަޝިއާ އިން އެތައް ހަފްތާއެއް ވަންދެން އެތައް ސަތޭކަ ބޯޓެއް ހިފަހައްޓާ ކާބޯތަކެތީގެ މާކެޓަށް ބުރުއަރުވަމުންދާ ކަމަށެވެ. އޭނާ އެފަދައިން ވިދާޅުވީ ބަރލިންގައި ކުރިއަށްދާ ކޮންފަރެންސް އޮފް އެގްރިކަލްޗަރުގައި ވާހަކަފުޅުދައްކަވަމުންނެވެ.
އެ ކޮންފަރެންސް ކުރިއަށްދާ ވަގުތު ވެސް ތުރުކީ ކައިރީގައި ކާބޯތަކެތި އުފުލާ ބޯޓުތައް ލައިން ހަދާފައިވާ ކަމަށް އޭނާ ވިދާޅުވިއެވެ. އެ ބޯޓުތައް އެ ސަރަހައްދުގައި ތިބީ އިންސްޕެކްޓު ކުރުމަށް ކަމަށް ވާއިރު ރަޝިއާ ތަމްސީލުކުރާ މީހުން އެ މަރުހަލާ އަށް ހުރަސްއަޅާފައިވާ ކަމަށް އޭނާ ވިދާޅުވިއެވެ. ޒެލެންކްސީ ވިދާޅުވީ ރަޝިއާގެ އެ އަމަލުގެ ސަބަބުން ޔޫރަޕްގައި ކާބޯތަކެތީގެ އަގު އުފުލިފައިވާ ކަމަށެވެ.
އަދި އޭޝިއާގެ ގައުމުތަކުގައި އެކަމުގެ ސަބަބުން އިޖުތިމާއީ ހަމަނުޖެހުމަށް މަގުފަހިވާ ކަމަށް ވެސް ޒެލެންސްކީ ވިދާޅުވިއެވެ. މީގެ އިތުރުން އެފްރިކާގައި އެކަމުގެ ސަބަބުން އެތައް ހާސް ބަޔަކު ބަނޑަށް ޖެހެމުންދާ ކަމަށާއި ރަޝިއާގެ މިފަދަ އަނިޔާވެރި އަމަލުތައް ހުއްޓުވަން ދުނިޔޭގެ ޤައުމުތަކުން އިތުރަށް މަސައްކަތްކުރަން ޖެހޭ ކަމަށް ވެސް އެމަނިކުފާނު ވިދާޅުވިއެވެ.
