އެއަރ އިންޑިޔާގެ ފްލައިޓެއްގައި ފަސިންޖަރެއްގެ ގަޔަށް އެހެން ފަސިންޖަރަކު ކުޑަކަމުދިޔަ މައްސަލައެއްގައި އެ އެއަރލައިނުން އަމަލުކޮށްފައިވާ ގޮތުން، ޑައިރެކްޓަރ ޖެނެރަލް އޮފް ސިވިލް އެވިއޭޝަން(ޑީޖީއޭ)ގެ ފަރާތުން އެއަރ އިންޑިޔާ 37000 ޔޫއެސް ޑޮލަރުން ޖޫރިމަނާ ކޮށްފިއެވެ. މިކަން ހިންގާފައިވަނީ މިދިޔަ ނޮވެމްބަރު މަހުގެ 26 ވަނަ ދުވަހު ނިއުޔޯކުން ދިއްލީއަށް ދަތުރުކުރި ބޯޓެއްގައެވެ. އެދުވަހު މަސްތުގެ ހާލުގައި ހުރި ޝަންކަރު މިޝްރާ ކިޔާ މީހަކު ވަނީ އޭނާގެ ކައިރީގަ އިން އުމުރުން ދުވަސްވީ އަންހެނެއްގެ ގަޔަށް ކުޑަކަމުގޮސްފައެވެ.

މިކަމާގުޅިގެން ޑީޖީއޭއިން ހުކުރު ދުވަހު އެޅި ފިޔަވަޅުގައި، އެބޯޓު ދުއްވަން އިން ޕައިލެޓްވެސް ވަނީ، އޭނާގެ ޑިއުޓީ އަދާނުކުރިކަމަށް ނިންމައި، ތިން މަސް ދުވަސް ވަންދެން އެއްވެސް އުދުހުމެއްގައި ބައިވެރި ނުވެވޭ ގޮތަށް ސަސްޕެންޑް ކޮށްފައެވެ. މީގެ އިތުރުން އެއަރ އިންޑިޔާގެ ޑައިރެކްޓަރ، އިންފްލައިޓް ސަރވިސަސް ވެސް ވަނީ 3 ލައްކަ ރުޕީސްއިން ޖޫރިމަނާ ކޮށްފައެވެ.

މީގެ ކުރިން، އެ އަމަލު ހިންގި މިޝްރާއަށް ހަތަރުމަސް ވަންދެން އެއަރ އިންޑިޔާއިން ދަތުރު ނުކުރެވޭނެ ކަމަށް އެ އެއަރލައިނުން ވަނީ ނިންމާފައެވެ.

އެމެރިކާގެ ފައިނޭންޝަލް ސަރވިސަސް ފަރމެއްގައި މަސައްކަތް ކުރަމުން އައި މިޝްރާ ވަނީ އެ ހާދިސާއަށްފަހު ވަޒީފާއިން ވަކިކޮށްފައެވެ. އަދި ޖެނުއަރީ 7 ވަނަ ދުވަހު ދިއްލީގެ ފުލުހުން ވަނީ އޭނާ ހައްޔަރުވެސް ކޮށްފައެވެ. އަދިވެސް އޭނާ ހުރީ ކޯޓުން ޖެހި 14 ދުވަހުގެ ބަންދުގެ މުއްދަތުގައި، ހައްޔަރުކޮށްފައެވެ.

މިކަން ހިނގީ މިދިޔަ ނޮވެމްބަރު މަހު ނަމަވެސް، އެންމެންގެ ސަމާލުކަމަށް އައިސްފައި މިވަނީ މިހާރުއެވެ. އެއީ ކަމާބެހޭ ފަރާތްތަކުން އޭރު ފިޔަވަޅު އަޅާފައި ނުވާތީ އެކަމާ އެކިފަރާތްތަކުން އަޑު އުފުލަން ފެށުމުންނެވެ. އެއަރ އިންޑިޔާ ނިސްބަތްވާ ޓާޓާ ގްރޫޕުންވެސް ވަނީ، އެ އެއަރލައިނުން ފިޔަޅެއް އެޅީ މާލަހުން ކަމަށް އިއުތިރާފުވެފައެވެ. އަދި މީގެ ފަހުން މިފަދަ ކަމެއް ހިންގާފާނެކަމަށްޓަކައި ސަމާލުވާނެ ކަމަށްވެސް ޓާޓާ ގްރޫޕުން ނެރުނު ބަޔާނެއްގައި ބުނެފައި ވެއެވެ.