ނިއުޒިލެންޑުގެ ބޮޑުވަޒީރު ޖަސިންޑާ އިސްތިއުފާ ދެއްވަނީ

ނިއުޒިލެންޑުގެ ބޮޑުވަޒީރު ޖަސިންޑާ އާޑެން އަންނަ މަހު މަޤާމުން އިސްތިއުފާ ދެއްވާނެކަން އެކަމަނާ ހާމަކުރައްވައިފިއެވެ.

ޖަސިންޑާ ވަނީ މަޤާމުން އިސްތިއުފާ ދެއްވަން ނިންމަވާފައިވާކަމާއި، ކުރިއަށް އޮތް އިންތިޚާބުގައި ވާދަ ނުކުރައްވާނެކަން ހާމަ ކުރައްވާފައެވެ. އެގޮތުން 7 ފެބްރުއަރީއަކީ އެކަމަނާ މަޤާމުގައި ހޭދަ ކުރައްވާ ފަހު ދުވަސްކަން އަސަރާއެކު ވަނީ އިއުލާނު ކުރައްވާފައެވެ.

ޖަސިންޑާ ވިދާޅުވާ ގޮތުގައި މަޤާމުން އިސްތިއުފާ ދެއްވަނީ މަޤާމުގެ މަސްއޫލިއްޔަތުތައް އުނދަގޫފުޅުވެގެންނެއް ނޫނެވެ. އެހެންނަމަ މީގެ މާކުރިން އިސްތިއުފާ ދެއްވީސްކަމަށް ޖަސިންޑާ ވިދާޅުވިއެވެ.

އެހެންނަމަވެސް، އެ މަސްއޫލިއްޔަތުތައް އަދާ ކުރެއްވުމަށް މިވަގުތަށް އެންމެ ޤާބިލު ފަރާތަކީ އެކަމަނާއަށް ނުވެދާނެ ކަމަށާއި، މިފަދަ މަޤާމަކީ ނުހަނު ޒިންމާތައް ބޮޑު، އެކަމަށް އެންމެ އެކަށީގެންވާ ފަރާތަކުން އަދާ ކުރައްވަން ޖެހޭ ޒާތުގެ މަޤާމެއްކަން ފާހަގަ ކުރައްވައި ޖަސިންޑާ ވިދާޅުވީ، މަޤާމު އެންމެ ފުރިހަމައަށް އަދާ ކުރެއްވުމުގެ ޤާބިލުކަން މިވަގުތަށް ނެތްކަމަށް ޤަބޫލު ކުރައްވާ ކަމަށެވެ.

ޖަސިންޑާ ބޮޑުވަޒީރު ކަމުގެ މަޤާމާ ޙަވާލުވެވަޑައިގަތީ 2017 ވަނަ އަހަރު އައި ކޯލިޝަން ސަރުކާރަކުންނެވެ. އޭގެ ފަހުން ނިއުޒިލެންޑުގެ ކްރައިސްޓްޗަރޗްގައި ހުރި ދެ މިސްކިތަކަށް ދިން ޙަމަލާއެއްގައި އެތައް ބަޔަކު މަރުވެގެން ދިޔަ ޙާދިސާގައި މުސްލިމުންނާމެދު އަމަލު ކުރެއްވި ގޮތާއި، އޭގެ ފަހުން ކޮވިޑުގެ ޙާލަތުގައި ޤައުމު މެނޭޖް ކުރެއްވި ގޮތަށް އެތައް ބަޔަކު ވަނީ ތައުރީފުވެސް ކޮށްފައެވެ.

ވަކިން ޚާއްސަކޮށް، ޖަސިންޑާގެ ލީޑަރޝިޕްގެ ދަށުން އެ ޤައުމު ދުއް އެންމެ ކަޅު އެއް ދުވަސް ކަމަށްވާ "ކްރައިސްޓްޗަރޗް ހަމަލާ" ގެ ދުވަހު ޖަސިންޑާ އެ ޤައުމުގައި އުޅޭ މުސްލިމުންނާ ބެހެއްޓެވި ގާތްކަމާއި އެކަމުގައި އެޅުއްވި އަވަސް ފިޔަވަޅުތަކަކީ ދުނިޔޭގެ ބޮޑެތި ޤައުމުތަކުންވެސް ފާހަގަކުރި ކަމެކެވެ.

އެހެންނަމަވެސް ފާއިތުވި އަހަރުގައި އެކަމަނާގެ ސަރުކާރުގެ މަޤްބޫލުކަން ވަނީ ކޮންމެވެސް ވަރަކަށް ދަށަށް ދާން ފަށާފައެވެ. އެގޮތުން އެ ޤައުމުގެ އިންފްލޭޝަން މީގެ 30 އަހަރުގައިވެސް އިތުރު ނުވާ މިންވަަރަށް އިތުރުވެ، މަރުކަޒީ ބޭންކުން ފައިސާގެ ރޭޓު އިތުރު ކުރުމާއި، އެ ޤައުމުގައި ކުށް ކުރުން އިތުރުވުން ފަދަ އެތައް ސަބަބެއް އެކަމުގެ ފަހަތުގައިވެއެވެ.

އެހެންނަމަވެސް އަދިވެސް ގިނަ ބަޔަކު ބޮޑުވަޒީރުކަމުގައި ހުންނަން އެދޭ ފަރާތަކީ ޖަސިންޑާއެވެ. މީގެ ކުރިން އެ ޤައުމުގައި ނެގުނު ރިސާރޗް ޕޯލެއްގެ ނަތީޖާ ދައްކާގޮތުން ބޮޑުވަޒީރު ޖަސިންޑާއަށް ވަނީ 59.05 އިންސައްތަ މީހުންގެ ވޯޓު ލިބިވަޑައިގެންފައެވެ. އަދި އެއީ މި ޤަރުނުގައިވެސް އެ ޤައުމުގެ ބޮޑުވަޒީރަކަށް އެންމެ ބޮޑު މަޤުބޫލުކަމެއް ލިބިގެންދިޔަ ފަހަރުކަމަށް ރޮއިޓަރސްގައި ރިޕޯޓުކޮށްފައިވެއެވެ.

އޭގެ އިތުރުން، ސިޔާސީ ގޮތުންވެސް އެ ޤައުމު ވަނީ ވަރަށް ބޮޑަށް ބައިބައިވާން ފަށާފައެވެ.  

އެކަމަނާއަކީ 1856 ވަނަ އަހަރުގެ ފަހުން އެޤައުމުގެ ބޮޑުވަޒީރުކަމާ ހަވާލުވެ ވަޑައިގެންނެވި އެންމެ ޒުވާން ބޭފުޅާއެވެ.

ޖަސިންޑާ މަގާމުން އިސްތިއުފާދެއްވަން ގަސްތު ކުރައްވާކަން އިއުލާން ކުރެއްވުމާއި ގުޅިގެން ބަދަލުގައި ޕާޓީގެ ލީޑަރަކު ހޮވުމަށް ޕާޓީގެ ޚާއްސަ މެމްބަރުން އާދީއްތަ ދުވަހު ވޯޓުލާނެ އެވެ. އެވޯޓުން ލީޑަރަކު ނުހޮވިއްޖެ ނަމަ އާންމު މެމްބަރުންނަށް ވޯޓު ހުޅުވާލާނެއެވެ.

ނިއުޒިލަންޑްގެ ބޮޑުވަޒީރު ޖަސިންޑާ އާޑަން އަކީ މުޅިދުނިޔޭގައިވެސް މަގާމާ ހަވާލުވެ ވަޑައިގެންނެވި އެންމެ ހަގު އަންހެން ހެޑް އޮފް ގަވަންމަންޓް އެވެ. 2017 ވަނަ އަހަރު މަގާމާ ހަވާލުވެ ވަޑައިގެންނެވިއިރު އުމުރު ފުޅަކީ 37 އަހަރެވެ. އަދި އޭނާއަކީ ގައުމެއްގެ ވެރިކަމުގައި ހުންނަވާ ބޭފުޅަކު ލިބިވަޑައިގެންނެވި ދެވަނަ ބޭފުޅާއެވެ. އޭގެ ކުރިން 1990 ވަނަ އަހަރު ބޭނަޒީރު ބުއްޓޫ އަށް މަގާމުގައި ހުންނަވަނިކޮން ބޭފުޅަކު ލިބިވަޑައިގެންފައި ވެއެވެ.