ބޮޑު މެދުކެނޑުމަކަށްފަހު އަނެއްކާވެސް ޗައިނާ ފަތުރުވެރިން ރާއްޖެއަށް
ޗައިނާގެ ފަތުރުވެރިން ރާއްޖެ އަންނަން ފަށާފައިވަނީ 3 އަހަރު ދުވަހުގެ މެދުކެނޑުމަކަށްފަހު
ޗައިނާ ފަތުރުވެރިން ރާއްޖެ އައުން
ކޮވިޑް-19ގެ ބަލިމަޑުކަމާ ގުޅިގެން ޗައިނާއިން ރާއްޖެއަށް ފަތުރުވެރިން އައުން ހުއްޓިފައި އޮތުމަށްފަހު، އަލުން ޗައިނާގެ ފަތުރުވެރިން ރާއްޖެ އަންނަން ފަށައިފިއެވެ.
ޗައިނާ ފަތުރުވެރިން ރާއްޖެ އަންނަން ފަށާފައިވަނީ 3 އަހަރު ދުވަހުގެ މެދުކެނޑުމަކަށްފަހު ކަމަށް ވާއިރު، އެގައުމުގެ ފަތުރުވެރިން ރާއްޖެ އަންނަން ފަށާފައި ވަނީ ބުދަ ދުވަހުއެވެ. 2020 ވަނަ އަހަރުގެ ކުރީކޮޅުން ފެށިގެން ޗައިނާގެ ބޯޑަރު އޮތީ ބަންދުކޮށްފައެވެ. އަދި އެ ގައުމުގެ އެތެރޭގެ ދަތުރުފަތުރުތައް ކުރިން ހުޅުވާލިނަމަވެސް މީގެ ކުރިން ބައިނަލްއަގުވާމީ ދަތުރެއް ނުކުރެއެވެ.
ބޮޑު މެދުކެނޑުމަކަށްފަހު ރާއްޖެއަށް އެންމެ ފުރަތަމަ ޗައިނާ ފަތުރުވެރިންނާއެކު އައި ބޯޓަކީ، ޗައިނާގެ ވެރި ރަށް ބެއިޖިންގގެ ކެޕިޓަލް އެއަރލައިންސްގެ ބޯޓެވެ. އެ ބޯޓުން 198 ފަތުރުވެރިން ވަނީ އައިސްފައެވެ. ބެއިޖިންގ ކެޕިޓަލް އެއަރލައިން ރާއްޖެއަށް އައުމާ ގުޅިގެން މޯލްޑިވްސް އެއަރޕޯޓްސް ކޮންޕެނީ ލިމިޓެޑް (އެމްއޭސީއެލް)އިން ވަނީ އެކަން ފާހަގަކުރުމުގެ ގޮތުން ޚާއްސަ ހަރަކާތެއް ބާއްވާފައެވެ. މިހަރަކާތުގައި ޓޫރިޒަމް މިނިސްޓަރ ޑރ. އަބްދުﷲ މައުސޫމާއި އެމްއެމްޕީއާރްސީގެ މެނޭޖިންގ ޑިރެކްޓަރ ތައްޔިބު ބައިވެރިވެވަޑައިގެންނެވިއެވެ.
އެ އެއަރލައިނުން މިމަހުގެ 22 ވަނަ ދުވަހާ ހަމައަށް ދަތުރުތައް ކުރާނެއެވެ. އެއީ ހަފުތާއަކު 4 ދަތުރެވެ.
ޓޫރިޒަމް މިނިސްޓަރު ޑރ. އަބްދުﷲ މައުސޫމް ވަނީ، ޗައިނާ މާކެޓަކީ މީގެ ކުރިންވެސް ރާއްޖޭގެ ފަތުރުވެރިކަމުގެ އެންމެ ކުރީގައި އޮތް މާކެޓު ކަމަށާއި، އެ މަގާމަށް އެ ގައުމު އަނބުރާ އައުމަކީ މުހިންމު ކަމެއް ކަމަށް ވިދާޅުވެފައެވެ. މީގެ ކުރިން "ރާއްޖެ ޓީވީ"ގެ ފަލަސުރުޚީ ޕްރޮގްރާމުގައި ވާހަކަދައްވަމުން މިނިސްޓަރު މައުސޫމް ވިދާޅުވީ ޗައިނާގެ ފަތުރުވެރިންނަށް މަރުހަބާ ކިޔަން ރާއްޖެއިން އޮތީ ތައްޔާރަށް ކަމަށެވެ. އެހެންނަމަވެސް އެ ގައުމުގައި އަދިވެސް ކޮވިޑު ފެތުރުން ކޮންޓްރޯލު ނުވާކަން މިނިސްޓަރ ފާހަގަކުރެއްވިއެވެ. އޭނާ ވިދާޅުވީ ރާއްޖޭގެ ހެލްތު މިނިސްޓްރީން އެކަމާމެދު އަޅަންޖެހޭ ފިޔަވަޅުތައް އަޅާނެކަމުގެ ފުރިހަމަ ޔަގީންކަން އެބައޮތް ކަމަށެވެ.
މިނިސްޓަރު ވިދާޅުވީ މިއަހަރު ޗައިނާއިން ރާއްޖެއަށް 100،000 ފަތުރުވެރިން އަންނާނެކަމަށް ލަފާކުރެވޭ ކަމަށެވެ.
