އުމްރާއަށް ދާ ފަރާތްތަކަށް ދޭ އިންޝުއަރެންސްގެ އަގު ހެޔޮކޮށްފި

ސައުދީ އަރަބިއްޔާއިން އެހެން ޤައުމުތަކުގެ އުމްރާވެރިންނަށް ދެމުން އަންނަ އިންޝުއަރެންސްގެ އަގު ހެޔޮކޮށްފިއެވެ.

މިއީ އުމްރާއަށް ދާ މީހުންގެ އަދަދު އިތުރުކޮށް، ގިނަ ބަޔަކަށް ފަސޭހަކަމާއެކު އުމްރާގެ އަޅުކަން އަދާ ކުރެވޭނެ ގޮތް ހެދުމަށް ސައުދީން ނިންމި ނިންމުމެކެވެ. އެގޮތުން، އުމްރާ އިންޝުއަރެންސްގެ އަގު މިހާރު ވަނީ 63 އިންސައްތަ ކުޑަކޮށްފައެވެ.

މި ބަދަލާއެކު ސައުދީގެ ހައްޖު އެންޑް އުމްރާ މިނިސްޓްރީން ވަނީ ކުރިން 235 ރިޔާދު (956.04 ރުފިޔާ) އަށް ލިބޭ އިންޝުއަރެންސް މި މަހުގެ 10 ވަނަ ދުވަހުން ފެށިގެން 87 ރިޔާދު (354.66 ރުފިޔާ) އަށް އަގު ހެޔޮކޮށްފައެވެ.

އުމްރާ އިންޝުއަރެންސަކީ އުމްރާގެ އަޅުކަމަށްދާ ފަރާތްތަކަށް ވިސާއާއެކު ނަގަން ޖެހޭ އިންޝުއަރެންސެކެވެ. މި އިންޝުއަރެންސްގެ ބޭނުމަކީ ސައުދީން ބޭރުން އުމްރާގެ އަޅުކަމަށް ދާ ފަރާތްތަކަށް ފަރުވާ ދިނުމާއި ހޮސްޕިޓަލު ހަރަދާއި ވިހެއުމާއި އެކްސިޑެންޓު ފަދަ އިމަޖެންސީ ހާލަތްތަކުގައި ކަވަރު ކުރާ އިންޝުއަރެންސެކެވެ.

މީގެ އިތުރުން މި އިންޝުއަރެންސުން އުމްރާގެ އަޅުކަމަށް ގޮސް ހުއްޓައި ދިމާވާ ކަމެއްގެ ސަބަބުން ނުކުޅެދުންތެރިކަން ދިމާވުމާއި ފްލައިޓް ޑިލޭވުމުން ދޭން ޖެހޭ ބަދަލާއި ފްލައިޓް ކެންސަލް ވުމުން ދޭން ޖެހޭ ބަދަލާއި މަރުވުމުގެ ހާލަތުގައި ވެސް ހުރިހާ ޚަރަދުތަކެއް ކަވަރު ކުރާނެއެވެ. މީގެ ތެރޭގައި މަރުވާ މީހުންގެ ހަށިގަނޑު އަނބުރާ ޤައުމަށް ފޮނުވުމުގެ ޚަރަދުވެސް ހިމެނެއެވެ.

ސައުދީގެ ހައްޖު އެންޑް އުމްރާ މިނިސްޓްރީން ބުނެފައިވާ ގޮތުގައި މި އިންޝުއަރެންސްގެ މުއްދަތަކީ އެ ޤައުމަށް ދާ ދުވަހުން ފެށިގެން 90 ދުވަހެވެ.

އެ މިނިސްޓްރީން ވަނީ ދާދި ފަހުން ސައުދީއަށް ޓޫރިސްޓް ވިސާ އަދި ކޮމަރޝަލް ވިސާގައި ދަތުރުކުރާ ފަރާތްތަކަށް އުމްރާގެ އަޅުކަން އަދާާ ނުކުރެވޭގޮތް ވެސް ހަދައިފައެވެ. މީގެ އިތުރުން ކޮވިޑުގެ ކުރިން އެ ޤައުމުން ޙައްޖު ކޯޓާ ދޫކުރި ވަރަށް މިއަހަރުން ފެށިގެން ޙައްޖު ކޯޓާ ދޫކުރުމަށް ވެސް މިހާރު ވަނީ ނިންމާފައެވެ.