ހެވީ ވެހިކަލްއަށް ޚާއްސަ ޕާކިންގ ހުޅުމާލެއިން ކުއްޔަށް ދެނީ
އެޗްޑީސީ އިން ނިންމާފައި ވަނީ ބީލަމުގެ އުޞޫލުން އެންމެ މަތިން އަގު ހުށަހަޅާ ފަރާތްތަކުގެ ތަރުތީބުން ޖާގަދޭން
ހުޅުމާލެ
ހުޅުމާލެއިން ހެވީ ވެހިކަލް ޕެއިޑް ޕާކިންގ ޖާގަ ބީލަމުގެ އުޞޫލުން ދޫކުރުމަށް ހައުސިންގ ޑިވެލޮޕްމަންޓް ކޯޕަރޭޝަން، އެޗް.ޑީ.ސީއިން ނިންމައިފިއެވެ.
އެޗްޑީސީ އިން ބުނީ އެ މަސައްކަތް ކުރުމަށް ހަމަޖެހިފައި ވަނީ ޕާކިންގެ މައްސަލައަށް ހައްލެއް ގެނައުމަށްޓަކައި ކަމަށެވެ. އަދި ހެވީ ވެހިކަލްތައް ޕާކުކުރުމަށް 19 ޖާގައެއް ބީލަމުގެ އުޞޫލުން ދޫކުރުމަށް ހަމަޖެހިފައިވާކަމަށް އެޗްޑީސީއިން ވަނީ ބުނެފައެވެެ. އެޗްޑީސީ އިން ވަނީ ޖުމުލަ 19 ޖާގަ ބީލަމުގެ އުސޫލުން ކުއްޔަށް ހިފުމަށް ޝައުގުވެރިވާ ފަރާތްތަކުން އެކަމަށް އެދި ހުށަހެޅުމުގެ ފުރުސަތު މިހާރު ހުޅުވާލާފައެވެ.
ބީލަމުގެ އުޞޫލުން އެންމެ މަތިން އަގު ހުށަހަޅާ ފަރާތްތަކުގެ ތަރުތީބުން ޖާގަދޭން ނިންމާފައި ވާއިރު ޖާގަތަކުގެ ބީލަން ފެށޭ އަގަކީ އަކަފޫޓަކަށް މަހަކު 12.01 ރުފިޔާއެވެ. އަދި މިޖާގަތައް ކުއްޔަށް ދޫކުރަން ހަމަޖެހިފައިވަނީ 2 އަހަރު ދުވަހުގެ މުއްދަތަކަށެވެ.
އެޗް.ޑީ.ސީން އިތުރަށް ބުނީ ބީލަން ހުށަހެޅުމުގެ ފުރުޞަތު މިމަހުގެ 17 އިން ފެށިގެން ހުޅުވާލާފައިވާކަމަށެވެ. އަދި މި އުޞޫލުގެ ދަށުން ކުއްޔަށް ދޫކުރާނީ ހުޅުމާލެ އެމް.ޕީ.އެލް ސަރަހައްދު ކައިރީގައި އޮންނަ ހެވީ ވެހިކަލް ޕާކިންގ ޒޯންކަމަށް އެޗް.ޑީ.ސީއިން ބުނެއެވެ. މީގެ އިތުރުން ކުއްޔަށް ދޫކުރާ ޕާކިންގ ޖާގަތަކުގެ ތެރޭގައި 40 ފޫޓު ޓްރެއިލާގެ 3 ޖާގައާއި، 20 ފޫޓު ޓްރެއިލަރގެ 2 ޖާގަ ހިމެނޭ ކަމަށް އެ ކުންފުނިން ބުނެއެވެ. އަދި ޑަމްޕްޓްރަކް ނުވަތަ ލޮރީފަދަ އުޅަނދުތަކަށް ޚާއްސަ ކޮށްފައިވާ 10 ޖާގައިގެ އިތުރުން ކްރޭން ޕާކު ކުރުމަށް ކަނޑައެޅިފައިވާ 4 ޖާގަކަމަށް އެޗް.ޑީ.ސީއިން ބުނެއެވެ.
