ރިޔާސީ އިންތިޚާބުގެ ވޯޓުލުން ސެޕްޓެމްބަރު 9ގައި

މި އަހަރުގެ ރިޔާސީ އިންތިހާބުގެ ވޯޓުލުން އޮންނާނީ މި އަހަރުގެ ސެޕްޓެމްބަރު މަހުގެ 9 ވަނަ ދުވަހު ކަމަށް އިލެކްޝަންސް ކޮމިޝަނުން ބުނެފިއެވެ.

އާދިއްތަ ދުވަހު ބޭއްވި ނޫސްވެރިންގެ ބައްދަލުވުމެއްގައި އެ ކޮމިޝަންގެ ރައީސް ފުވާދު ތައުފީޤު ވިދާޅުވީ އިންތިޚާބުގެ ދެވަނަ ބުރެއް ބާއްވާނަމަ، ދެވަނަ ބުރު އޮންނާނީ ސެޕްޓެމްބަރު 30 ވަނަ ދުވަހު ކަމަށެވެ. މީގެ އިތުރުން އިންތިޚާބާއި ގުޅޭ އިތުރު ތަފްސީލް ހިއްސާކުރައްވަމުން ފުވާދު ވިދާޅުވީ ރިޔާސީ އިންތިޚާބުގައި ވޯޓު ލެވޭ މީހުންގެ ރަޖިސްޓްރޭޝަން އާއި ގުޅުން ހުރި މައުލޫމާތު އާންމު ކުރާނީ މެއި މަހުގެ ދެ ވަނަ ދުވަހު ކަމަށެވެ. އަދި ވޯޓުލެވޭ މީހުންނަށް ރަޖިސްޓްރީ އަށް ޝަކުވާ ހުށަހެޅުމަށް ލިބޭނީ 30 ދުވަހުގެ ފުރުސަތެއް ކަމަށް އޭނާ ވިދާޅުވިއެވެ. މީގެއިތުރުން ރީ ރަޖިސްޓްރޭޝަން މުއްދަތަކީ 16 ދުވަސް ކަަމަށް ވާއިރު، އެ މުއްދަތު ދެމިގެންދާނީ މި އަހަރުގެ 16 ޖުލައި އިން ފެށިގެން އޮގަސްޓް 5 އަށް ކަމަށް ވެސް ފުވާދު ވިދާޅުވިއެވެ.

ކުރިއަށް އޮތް ރިޔާސީ އިންތިޚާބުގެ ކެންޑިޑޭޓުންނަށް ކުރިމަތިލުމުގެ ފުރުސަތު އޮންނާނީ ޖުލައި 23 އިން ފެށިގެން އޮގަސްޓް 3 އާއި ހަމައަށް ކަމަށް އިލެކްޝަންސް ކޮމިޝަނުން ވަނީ ބުނެފައެވެ. ކެންޑިޑޭޓުންގެ ނަންތައް ތަރުތީބު ކުރުން އޮންނާނީ އޮގަސްޓް 9 ވަނަ ދުވަހުއެވެ. އިންތިޚާބުގައި ވާދަކުރާ ކެންޑިޑޭޓުން ކެމްޕެއިން ކުރުމަށް އޮގަސްޓް 10 އިން ސެޕްޓެމްބަރު 8 ނިޔަލަށް ވަނީ ފުރުސަތު ހުޅުވާލާފައެވެ.

މީގެ އިތުރުން އޮބްޒާވަރުންނާއި މޮނީޓަރިންގެ ގޮތުގައި ހަރަކާތްތެރިވުމަށް އެދުމުގެ ފުރުސަތު ޖުލައި 25 އިން އޮގަސްޓް 13ގެ ނިޔަލަށް ވަނީ ހުޅުވާލާފައެވެ. އިންތިޚާބުގެ ޓްރެއިނިން ޕްރޮގްރާމް ޖުލައި 16 އިން ޖުލައި 21 އަށް ބާއްވަން ވެސް އެ ކޮމިޝަނުން ވަނީ ނިންމާފައެވެ. ކޮމިޝަނުން ބުނި ގޮތުގައި މަންދޫބުންގެ ގޮތުގައި ކުރިމަތިލުމުގެ ފުރުސަތު އޮންނާނީ އޮގަސްޓް 10 އިން 17 އޮގަސްޓާ ހަމައަށެވެ. އަދި އޮފިޝަލުންގެ ތަމްރީން ޕްރޮގްރާމް 20 އޮގަސްޓުން 29 އޮގަސްޓާ ހަމައަށް ކުރިއަށް ދާނެ ކަމަށް އެ ކޮމިޝަނުން ބުނެއެވެ.

މި ފަހަރުގެ ރިޔާސީ އިންތިހާބުގެ ސްލޯގަންގެ ގޮތުގައި އިލެކްޝަންސް ކޮމިޝަނުން ކަނޑައަޅާފައި ވަނީ "މަގޭ ވިސްނުން، މަގޭ ވޯޓު" މި ސްލޯގަންއެވެ. އަދި މި ފަހަރުގެ އިންތިޚާބުގައި ހޭޝްޓެގެއްގެ ގޮތުގައި ބޭނުން ކުރަނީ "ވިސްނުން23"އެވެ.