"ރަންތާޖު" ގުރުއާން މުބާރާތް: އޮޑިޝަން ދިނުމާއެކު ލިބޭ މާކްސް އެނގިގެންދާނެ

ތިންލައްކަ ރުފިޔާގެ ފައިސާގެ އިނާމާއެކު، ރާއްޖޭގައި ބާއްވާ އެންމެ ބޮޑު ޤުރުއާން މުބާރާތް "ރަންތާޖު" މުބާރާތުގައި ބައިވެރިވެ އޮޑިޝަން ދިނުމާއެކު އެމީހަކަށް ލިބޭ މާކްސް އެނގިގެންދާނެކަމަށް މުބާރާތް އިންތިޒާމުކުރާ ފަރާތުން ބުނެފިއެވެ.

ރަންތާޖު ގުރުއާން މުބާރާތާއި ގުޅޭގޮތުން ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން އިސްލާމިކް މިނިސްޓްރީގެ ސީނިއަރ އެގްޒެކެޓިވް ޑިރެކްޓަރު ހިޝާމް އަހުމަދު ވިދާޅުވީ ރާއްޖޭގެ އެކި ސަރަހައްދުތަކުގައި އޮންނަ އޮޑިޝަންތަކުން އެންމެ މަތިން މާކްސް ލިބޭ 20 ބައިވެރިން ކަނޑައަޅާނެކަމަށެވެ. މުބާރާތުގެ ޖަޖުންގެ ގޮތުގައި ރާއްޖޭގެ ފުންނާބު އުސް ގާރީ ބޭފުޅުންގެ 10 ބޭފުޅުން ހިމެނޭނެކަމަށެވެ.

9 ސަރަހައްދެއްގައި އޮޑިޝަންތައް އޮންނައިރު އެއިން ކޮންމެ ސަރަހައްދަކަށްވެސް ދާނީ 3 ޖަޖުންކަމަށް ހިޝާމް ވިދާޅުވިއެވެ. އޮޑިޝަންގައި ބައިވެރިން ކިޔަވާ އަޑުއެހުމަށްފަހު އެމީހަކަށް މާކްސް ދޭނެކަމަށާއި ބައިވެރިއަކަށް ލިބޭ މާކްސް އެބައިވެރިއަކަށް އެނގޭނެކަމަށެވެ.

އޮޑިޝަންތަކުގެ ބައި ނިމުމަށްފަހު ވަކިވަރަކަށްވުރެ މަތިން މާކްސް ލިބޭ 30 ނުވަތަ 35 ބައިވެރިން ކަނޑައަޅާނެކަމަށް ހިޝާމް ވިދާޅުވިއެވެ. އެގޮތުން ކަނޑައަޅާއިރު އެއް ވަރަކަށް މާކްސް ލިބިފައި ގިނަ ކުދިން ތިބިނަމަ ޖަޖުންގެ ޕެނަލުން އެހުރިހާ ކިޔެވުމެއް އަޑުއެހުމަށްފަހު ގޮތް ނިންމާނެއެވެ.

ހިޝާމް ވިދާޅުވީ މަސައްކަތްކުރާނީ ވީހާވެސް ޓްރާންސްޕޭރެންޓްކޮށް މުބާރާތް ކުރިޔަށް ގެންދިޔުމަށްކަމަށެވެ.

މުބާރާތުގައި އިންސާފު ކުރެވޭ ބައިތަކަކީ ބަލައިގެން ކިޔެވުން، ނުބަލައި ކިޔެވުން، ސޫރަތުއް ޟުޙާއިން ތިރީގެ ސޫރަތްތަކުގެ މާނަ، ޢުލޫމުލް ޤުރުއާނާއި އަސްބާބުއް ނުޒޫލުގެ ބައިތަކުގެ އިތުރުން ތަޖުވީދުގެ ބައިތަކެވެ. މުބާރާތުގެ މުޤައްރިރުގައި ބަލައިގެން ކިޔެވުމުގައި މުޅި ޤުރުއާން އެއްކޮށް ހިމެނޭއިރު ނުބަލައި ކިޔެމުގައި 29 ވަނަ ފޮތާއި 30 ވަނަ ފޮތް ހިމެނެއެވެ. އަދި ތަރުޖަމާގައި ސޫރަތުއް ޟުޙާއިން ސޫރަތުއް ނާސްގެ ނިޔަލަށް ދިވެހި ތަރުޖަމާ ހިމެނެއެވެ.

ހިޝާމް ވިދާޅުވީ އޮޑިޝަން މަރުހަލާގައި ޖަޖުކުރާނީ ހަމައެކަނި ކިޔެވުމަށެވެ. އެ ބައިވެރިން ވާން ޖެހޭނީ ކީރިތި ޤުރުއާނުގެ 29 ވަނަ ފޮތާއި 30 ވަނަ ފޮތް ހިތުދަސް ބައިވެރިންނަށެވެ. ނަމަވެސް އޮޑިޝަންގައި ބާލާނީ ކިޔެވުމަށް އެކަނި ކަމަށްވާއިރު ހިތުދަސް ކުރުމުގެ ބަޔަކަށް ނުބަލާނެއެވެ. އެކަމަކު އެ ބައިވެރިޔަކު ހިތުދަސްތޯ ނުވަތަ ދަސް ކުރެވިދާނެތޯ އަހާ، އެކަމުގައި ޔަޤީންކަން ހޯދާނެއެވެ. ހިޝާމް ވިދާޅުވީ އެގޮތަށް ނިންމާފައިވަނީ ގުރުއާން ކިޔެވުމަށް ގުރުއާނުގެ އިލްމަށް ޝައުގުހުރި ކޮންމެ މީހަކަށްވެސް އޮޑިޝަންގައި ބައިވެރިވުމަށް ހިތްވަރުދިނުމުގެ ގޮތުންނެވެ.

މުބާރާތުގައި ވަކިވެގެންދާ ބައިވެރިން ކަނޑައެޅުމުގައި އެއްވަނަ ޝޯގައި ކިޔަވާ 20 ބައިވެރިންގެ ތެރެއިން 5 ބައިވެރިން މުބާރާތުން ވަކިވެގެންދާނެއެވެ. އަދި ދެވަނަ ޝޯގައި ކިޔަވާ 15 ބައިވެރިންގެ ތެރެއިން 4 ބައިވެރިން މުބާރާތުން ވަކިވެގެންދާއިރު ތިންވަނަ ޝޯގައި ކިޔަވާ 11 ބައިވެރިންގެ ތެރެއިން ދެ ބައިވެރިން މުބާރާތުން ވަކިވެގެންދާނެއެވެ. އަދި ހަތަރު ވަނަ ޝޯގައި ކިޔަވާ ބައިވެރިންގެ ތެރެއިން ދެ ބައިވެރިން، ފަސް ވަނަ ޝޯގައި ކިޔަވާ 7 ބައިވެރިންގެ ތެރެއިން ދެ ބައިވެރިން، ހަވަނަ ޝޯގައި ކިޔަވާނީ މުބާރާތުގެ އެންމެ މޮޅު 5 ބައިވެރިންނެވެ. މި ބައިވެރިންގެ ތެރެއިން 1 ވަނަ ބައިވެރިޔަކު ހޮވިގެންދާނެއެވެ.