ކުދި އަދި މެދުފަންތީގެ ވިޔަފާރިތައް ކުރިއެރުވުމަށް އިކޮނޮމިކް މިނިސްޓްރީގެ ދަށުން ހިންގާ ބިޒްނަސް ސެންޓަރ ކޯޕަރޭޝަނުން އެތައް މަސައްކަތެއް ކުރެއެވެ. ކުދި ވިޔަފާރިތަކުން އުފައްދާ އުފެއްދުންތައް މާކެޓަށް ނެރުމަށާއި, އެމީހުންނަށް އެތަކެތި ވިއްކައި ކުރިއަރައިދެވޭނެ މަގެއް ފަހިކޮށްދިނުމަށް އެހީވެއެވެ. މިގޮތުން ކުދި އަދި މެދުފަންތީގެ ވިޔަފާރިތަކަށް ޚާއްސަކޮށް އެންމެ ފުރަތަމަ ވުޖޫދަށް ގެނައީ އޮތެންޓިކް މޯލްޑިވްސްއެވެ. މިއީ ދިވެހިންގެ އުފެއްދުންތަކަށް ޚާއްސަކޮށް ވުޖޫދަށް ގެނައި ތަނެކެވެ. މިތަނުން ކުޅަދާނަ ދިވެހިންގެ އެތައް އުފެއްދުމެއް ފެނިގެންއެވެ.

އަނެއްކާވެސް ކުދި އަދި މެދުފަންތީގެ ވިޔަފާރިތަކަށް އިތުރު ފުރުސަތުތަކެއް ފަހިކޮށްދިނުމުގެ ގޮތުން އެސްއެމްއީ ހަބް ވަނީ ތައާރަފުކޮށްފައެވެ. މިތަނަށް ދީފައިވާ ނަމުންވެސް މިތަނަކީ ކުދި އަދި މެދުފަންތީގެ ވިޔަފާރިތަކަށް ޚާއްސަ ތަނެއްކަން އެނގެއެވެ. މޯލްއެއްގެ ކޮންސެޕްޓަށް ފަރުމާކޮށްފައިވާ މި ތަނަކީ ކުދި އަދި މެދުފަންތީގެ ވިޔަފާރިތަކަށް އެތައް ފުރުސަތެއް ލިބޭނެ ގޮތަށް ފަރުވާކޮށްފައިވާ ތަނެކެވެ.

ތަނުގެ އެންމެ ތިރީ ފަންގިފިލާގައި ހިތްގައިމު ކެޕޭއެއް ހުރެއެވެ. އެތަން ފަރުމާކޮށްފައިވަނީ އެތަނުގައި ތިބެވޭނެ ގޮތަށެވެ. އަދި ގަސްވިއްކާ ފިހާރައެއްގެ އިތުރުން ފޮތް ފިހާރައެއް އެންމެ ތިރީ ފަންގިފިލާގައި ހުރެއެވެ. އެ ފޮތް ފިހާރަ ޚާއްސަކޮށްފައިވަނީ ދިވެހި ލިޔުންތެރިންގެ ލިޔުންތަކަށެވެ. މީގެ އިތުރުން ފަންނާނުންނަށް ޚާއްސަ ކޯނަރެއްވެސް އެތަނުގައި ވެއެވެ. ފުރަތަމަ ފަންގިފިލާ ޚާއްސަކޮށްފައިވަނީ ކުދި ވިޔަފާރިތަކަށެވެ. އެތަނުގައި އެކި ބާވަތުގެ ކާބޯތަކެތި ވިއްކާ ކުދި ވިޔަފާރިތައް ހުއްޓެވެ. އެތަންވެސް ފަރުމާކޮށްފައިވަނީ އެތަނުގައި ކާން ގޮސް ތިބެވޭނެ ގޮތަށެވެ.

ކުދި ވިޔަފާރިތަކަށް އެމީހުންގެ އުފެއްދުންތައް ވިއްކައި މާކެޓުކުރުމަށް މިއީ ވަރަށް ފުރިހަމަ ޕްލެޓްފޯމެކެވެ. އެތަނުން ފެނުނު ގިނަ ވިޔަފާރިތަކަކީ ސޯޝަލް މީޑިއާގެ ޕޭޖަކުން ފަށައިގަތް ވިޔަފާރިތަކެވެ. މިއަދު އެ ވިޔަފާރިތަކަށް މިވަނީ އެމީހުންގެ އުފެއްދުންތަކަށް އިތުރު މާކެޓެއް ހޯދުމަށް ރަނުގެ ފުރުސަތެއް ލިބިފައެވެ.

އެސްއެމްއީ ހަބް ހުޅުވައި މިވީ ކުޑަ ދުވަސްކޮޅުގެ ތެރޭގައި އެތަނަށް ވަރަށް ބޮޑު ތަރުހީބެއް ލިބެމުންދާކަމަށް ބީސީސީން ބުނެއެވެ. އޮފީސްތަކުގައި މަސައްކަތްކުރާ މީހުންނާއި, އާންމުންގެ ގިނަ ބަޔަކުވެސް އެކި ގަޑިތަކުގެ ކެއުމަށް މިތަނަށް ދެއެވެ. ތަނުގެ ހިތްގައިމުކަމުން އެތަނުގައި ތިބެގެން މަސައްކަތްކޮށްލުމަށްވެސް ގިނަ ބަޔަކު ދެއެވެ.

އެސްއެމްއީ ހަބުގެ ސަބަބުން ކުދި ވިޔަފާރިތަކުގެ އިތުރުން ދިވެހި ލިޔުންތެރިންނަށާއި, ފަންނާނުންނަށްވެސް މި ވަނީ ރަނގަޅު ފުރުސަތެއް ލިބިފައެވެ. ކުރިއަށްއޮތްތަނުގައި ފަންނާނުންނަށް އިތުރު ފުރުސަތުތަކެއް ހޯދައިދިނުމުގެ ގޮތުން 2 ވަނަ ފަންގިފިލާފައި 25 މީހުންގެ ސިނަމާއެއް ގާއިމްކުރުމަށް ދަނީ މަސައްކަތްކުރަމުންނެވެ. މި ސިނަމާއާއެކު އަނެއްކާވެސް އިތުރު ފުރުސަތުތަކެއް ހުޅުވިގެންދާނެ ކަމަށް ބީސީސީން ބުނެއެވެ. އަނެއްކާވެސް ތަނުގެ ހިތްގައިމުކަން އެތައް ގުނައަކުން އިތުރުވެގެންދާނެއެވެ