އެސްއެމްއީ ހަބް ބަންދުކުރާކަމުގެ އަޑުތަކެއް! - ސަރުކާރުން އެކަން ދޮގުކުރޭ
އެސްއެމްއީ ހަބަކީ އެކި ދާއިރާތަކުގައި ޙަރަކާތްތެރިވާ ކުދި އަދި މެދުފަންތީގެ ވިޔަފާރިތަކަށް މާކެޓް އެކްސެސް ހޯދައިދިނުންމަށްޓަކައި ބިޒްނަސް ސެންޓަރ ކޯޕަރޭޝަނުން ޤާއިމްކޮށްފައިވާ ހަބެއް
އެސްއެމްއީ ހަބް
ނިމިދިޔަ ސަރުކާރުން ބިޒްނަސް ސެންޓަރު ކޯޕަރޭޝަން (ބީސީސީ) އިން "އެސްއެމްއީ ހަބް"ގެ ނަމުގައި ޤާއިމްކޮށްފައިވާ ހަބް އުވާލަން އުޅޭކަމަށް ބުނެ ދެކެވެމުންދާ ވާހަކަތައް ބީސީސީން ދޮގުކޮށްފިއެވެ.
މީސްމީޑިއާގައި އަޑު ފެތުރިފައިވާ ގޮތުން ނިމިދިޔަ ސަރުކާރުން އޭރުގެ އިކޮނޮމިކް މިނިސްޓަރ ފައްޔާޒް އިސްމާއިލްގެ އިސްނެގުމާއި އެކު އެކުލަވާލި އެސްއެމްއީ ހަބް އުވާލުމަށް މި ސަރުކާރުން ދަނީ މަޝްވަރާކުރަމުންނެވެ. އަދި އެކަން ކުރަން ނިންމާފައި ވަނީ މިހާރުގެ އިކޮނޮމިކް މިނިސްޓަރ މުހައްމަދު ސައީދު އާއި ބީސީސީގެ ޓީމަށް އެތަން މެނޭޖް ނުކުރެވުމުން ކަމަށް ވެސް ވަނީ އަޑު ފެތުރިފައެވެ. މިކަމުގެ ސަބަބުން ވަރަށް ގިނަ ކުދި ވިޔަފާރިތަކަށް އަސަރުކުރާނެ ކަަމަށް އެކަމާއި ގުޅިގެން ފާޑުކިޔާ އާއްމުން އައީ ބުނަމުންނެވެ.
ރާއްޖެއެމްވީ އަށް މައުލޫމާތުދެއްވަމުން ބިޒްނަސް ސެންޓާ ކޯޕަރޭޝަން (ބީސީސީ)ގެ މެނޭޖިން ޑިރެކްޓަރު އިބްރާހީމް ޒިޔާއު ވިދާޅުވީ ބީސީސީ ވެސް އަދި އެސްއެމްއީ ހަބްވެސް ބަންދުކުރުމާއި މެދު އެއްވެސް މިންވަރަކަށް މަޝްވަރާކޮށްފައި ނުވާކަމަށެވެ. އަދި ކުދި ވިޔަފާރިތަކަށް ގެއްލުންވާ ގޮތަށް އެއްވެސް އަމަލެއް ދަރުކާރުން ހިންގާފައި ނުވާނެ ކަމަށް އޭނާ ވަނީ ވިދާޅުވެފައެވެ. “އެސްއެމްއީ ހަބް" ހިންގާ އިމާރާތުގައި ޑިވެލޮޕްމެންޓް ބޭންކާއި ފައިނޭންސް ސެންޓަރު ގާއިމް ކުރަން ނިންމާފައިވާކަމަށް އޭނާ ވިދާޅުވިއެވެ. އެގޮތުން އެ ބޭންކް ޤާއިމްކުރަނީ އެސްއެމްއީ ހަބްގައި ކުރިން ސިޓީ ބޭކަރީ ހުރި ބައި ނުވަތަ ގްރައުންޑް ފްލޯގައި ކަމަށް އޭނާ ވިދާޅުވިއެވެ.
ޒިޔާއު ރާއްޖެ އެމްވީ އަށް ވިދާޅުވީ އެސްއެމްއީ ހަބްގެ ގްރައުންޑް އަދި ދެ ވަނަ ފްލޯ އަށް ބަދަލުތަކެއް ގެނެސްފައިވާ ކަމަށެވެ. ސިޓީ ބޭކަރީ މީގެ ކުރިން ހުރީ ގްރައުންޑް ފްލޯގައި ކަމަށް ވާއިރު އެތަނުގައި ކެފޭ ހެދުމަށް ވެފައިވާ އެއްބަސްވުން މިހާރު ހަމަވެފައިވާ ކަމަށް ޒިޔާއު ވިދާޅުވިއެވެ. ސިޓީ ބޭކަރީ އަކީ މެދުފަންތީގެ ވިޔަފާރިއަކަށް ވުމާއި އެކު އެސްއެމްއީ ހަބްގެ މަތީގައި ހުންނަ ކުދި ވިޔަފާރިތަކަށް އެކަން ގޮންޖެހުމަކަށްވާ ކަމުގެ ޝަކުވާ ލިބެމުން އައި ކަމަށް ވެސް އޭނާ ވިދާޅުވިއެވެ. އެހެންކަމުން އެ ބަދަލު ގެނައުމުގައި ސަރުކާރުގެ ވިސްނުމަކީ ކުދި ވިޔަފާރިތަކަށް އިތުރަށް އެކްސްޕޯޒަރ ހޯދާދިނުން ކަމަށް އޭނާ ވަނީ ވިދާޅުވެފައެވެ.
ބީސީސީން އައީ އެސްއެމްއީ ހަބް ހިންގާ އިމާރާތުގެ ތިން ވަނަ ފްލޯވެސް ހަދަމުންނެވެ. އެގޮތުން އެ ތަނުގައި 25 މީހުންނަށް ހާއްސަ ސިނަމާ އަކާއި ސެލޫން ފަދަ ތަންތަނަށް ވިޔަފާރިއަށް ކުއްޔަށް ދޫކުރަން އޮތީ ނިންމާފައެވެ. އިތުރަށް އޭނާ ވިދާޅުވީ ކުރިއަށް އޮތްތަނުގައި އެސްއެމްއީ ހަބް ކްރިއޭޓަރ ހަބް އަށް ބަދަލުކުރާނެ ކަަމަށެވެ. އަންނަ އަހަރުގެ ކުރީކޮޅު ކްރިއޭޓަރ ހަބްގެ މަސައްކަތް ނިމޭނެ ކަމަށް އޭނާ ވަނީ ވިދާޅުވެފައެވެ. އެކަމުގެ ސަބަބުން ކުލި ދައްކަން ނުޖެހި ބީސީސީ ހިންގުމަށް ފަސޭހަވެގެންދާނެ ކަމަށް އޭނާ ވިދާޅުވިއެވެ.
ޒިޔާއު މިހެން ވިދާޅުވެފައިވާ އިރު އެސްއެމްއީ ހަބްގެ ޚަރަދުތައް ކުޑަކުރުމަށް މަސައްކަތް ކުރަމުންދާކަމަށް އިކޮނޮމިކް މިނިސްޓްރީގެ އިސް މަޤާމެއްގައި ހުރި މީހަކު ވަނީ ރާއްޖެއެމްވީ އަށް މައުލޫމާތު ދެމުން ބުނެފައެވެ. ނަން ހާމަ ނުކުރުމަށް ޝަރުތުކޮށް އޭނާ ބުނީ މިހާރުގެ އިކޮނޮމިކް މިނިސްޓަރ ސައީދު ޤަބޫލުކުރައްވާ ގޮތުގައި އެސްއެމްއީ ހަބް އަކީ ދެކޮޅު ޖެހޭ މޮޑެލް އެއް ނޫން ކަަމަށެވެ. އެސްއެމްއީ ހަބް ހިންގާ އިމާރާތަށް ސަރުކާރުން މަހަކު ގާތްގަނޑަކަށް ހަތް ލައްކައެއްހާ ރުފިޔާ ހޭދަކުރާ އިރު ވިޔަފާރިތަކުން ދައްކަން ޖެހެނީ ކުޑަ އަގެއް ކަމަށާއި އޭގެ ސަބަބުން ތަން ހިންގުމަށް ގޮންޖެހުމަކަށް ވާ ކަމަށް އޭނާ ވަނީ ބުނެފައެވެ. މީގެ އިތުރުން ހިންގުމުގެ ޚަރަދުކުޑަކުރުމަށް ބީސީސީ އަށް އެ ނޫން ބަދަލުތައް ވެސް ގެންނަން ނިންމާފައިވާކަމަށާއި މުވައްޒަފުންގެ އަދަދު މަދުކުރުމަކީ ވެސް ކުރުން އެކަށީގެންވާ ކަމެއް ކަމަށް އޭނާ ވަނީ ބުނެފައެވެ. ނަމަވެސް ސަރުކާރުގެ ރަސްމީ އިދާރާއަކުން އެފަދަ ވާހަކަ އެއް މިހާތަނަށް އައި އިރު ހާމަ އެއް ނުކުރެއެވެ.
އެސްއެމްއީ ހަބްގައި މިވަގުތު 19 ކުދި ވިޔަފާރި ހަރަކާތްތެރިވެއެވެ. އެސްއެމްއީ ހަބުގައި ތަފާތު ދިވެހި އުފެއްދުންތަކާއި އެކި ކަހަލަ ކާބޯތަކެތި ވިއްކުމަށް ޚާއްޞަ 30 ކިއޮސްކު ބަހައްޓާފައި ހުއްޓެވެ. އަދި މިއީ ދެކޮޅު ޖެހޭ މޮޑެލް އެއް ނޫން ކަމަށް ބައެއް މީޑިއާތަކަށް މައުލޫމާތުދެއްވަމުން އިކޮނޮމިކް މިނިސްޓަރ ސައީދު ވިދާޅުވެފައި ވާއިރު ނިމިދިޔަ ރަމަޟާން މަހު ކިއޮސްކުތަކުގެ ކުލި 50 އިންސައްތަ އަށް ކުޑަ ކުރިއެވެ. އޭރު އެކަމަކީ ދެކޮޅު ނުޖެހޭ ކަމެއް ކަމަށް އެއްވެސް ވަރަކަށް ސަރުކާރުން ބުނެފަ އެއް ނުވެއެވެ. އެހެންކަމުން އޭރު އެކަން ކުރީ މަޖިލިސް އިންތިޚާބާއި ދިމާކޮށް ކުދި ވިޔަފާރިތަކުގެ ވޯޓަށް ނުފޫޒު ފޯރުވުމަށް ކަމަށް ގިނަ ބަޔަކު ދަނީ ތުހުމަތު ކުރަމުންނެވެ.
އެސްއެމްއީ ހަބަކީ އެކި ދާއިރާތަކުގައި ޙަރަކާތްތެރިވާ ކުދި އަދި މެދުފަންތީގެ ވިޔަފާރިތަކަށް މާކެޓް އެކްސެސް ހޯދައިދީ، ވިޔަފާރިތައް އިތުރަށް ފުޅާ ކުރުމަށް އެހީތެރިވެދިނުންމަށްޓަކައި ބިޒްނަސް ސެންޓަރ ކޯޕަރޭޝަނުން ޤާއިމްކޮށްފައިވާ ހަބެކެވެ.
