ރިޔާސީ އިންތިޚާބުގެ އެކި މަސައްކަތްތަކަށް 8000 އޮފިޝަލުން ބޭނުންވާނެ: ފުއާދު
ކުރިން އިންތިޚާބުތަކުގައި މަސައްކަތްކޮށްފައި ތިބި އޮފިޝަލުން ހިމެނޭ ދަފުތަރެއް އެކުލަވާލުމުގެ މަސައްކަތް އަންނަނީ ކުރަމުން
އީސީގެ ރައީސް ފުއާދު ތައުފީގު
މިއަހަރު ބޭއްވުމަށް ހަމަޖެހިފައިވާ ރިޔާސީ އިންތިޚާބުގެ އެކިއެކި މަސައްކަތްތަކަށް 8000 އޮފިޝަލުން ބޭނުންވާނެކަމަށް އިލެކްޝަންސް ކޮމިޝަންގެ ރައީސް ފުއާދު ތައުފީގު ވިދާޅުވެއްޖެއެވެ.
ރިޔާސީ އިންތިޚާބަށް އިލެކްޝަންސް ކޮމިޝަން (އީސީ)ން ވަމުންދާ ތައްޔާރީތަކާއި ގުޅޭގޮތުން ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން ފުއާދު ވިދާޅުވީ އިދާރީ އެކިކަންކަމާއި ވޯޓު ފޮށި ކައިރީގައި ހަރަކާތްތެރިވާ މީހުންނާއެކު އެހާ އަދަދަށް އޮފިޝަލުން ބޭނުންވާނެކަމަށެވެ. އޮފިޝަލުން ހޯދުމަށްޓަކައި މިހާރުވެސް އިއުލާނުތަކެއް ކޮށްފައިވާނެ ކަމަށެވެ. މީގެއިތުރުން މީގެކުރީގެ ރިޔާސީ އިންތިޚާބުތަކާއި، ރައްޔިތުންގެ މަޖިލީހުގެ އިންތިޚާބުތަކުގެ އިތުރުން ލޯކަލް ކައުންސިލު އިންތިޚާބުތަކުގައި އޮފިޝަލުންގެ ގޮތުގައި މަސައްކަތްކޮށްފައިވާ ފަރާތްތައް ހިމެނޭ ދަފުތަރެއް އެކުލަވާލުމުގެ މަސައްކަތްކުރަމުން އަންނަކަމަށް ފުއާދު ވިދާޅުވިއެވެ. ދަފުތަރުގައި ތިބި މީހުންގެ އިތުރުންވެސް އިތުރު މީހުން ބޭނުންވާނެކަމަށް ފުއާދު ވިދާޅުވިއެވެ.
ފުއާދު ވިދާޅުވީ ދަފުތަރު ތައްޔާރުކުރުމާއެކު އިތުރު އޮފިޝަލުން ހޯދުމަށް ސިވިލް ސަރވިސް ގައިވެސް އެދޭނެކަމަށެވެ.
އޮފިޝަލުން ހޯދުމަށްފަހު އޮފިޝަލުން ތަމްރީނުކުރުމުގެ މަސައްކަތްތަކެއް ކުރަންޖެހޭއިރު އިންތިޚާބު ބޭއްވުމުގެ ތިން މަސްދުވަސްކުރިން އޮފިޝަލުން ތަމްރީނުކުރުމުގެ މަސައްކަތްކުރާނެކަމަށް ވިދާޅުވިއެވެ.
ހުރިހާ އޮފިޝަލުންނަށް އެއްގޮތަކަށް ތަމްރީނުތައް ދޭންޖެހޭއިރު ޓްރެއިނިންގ މެޓީރިއަލް ހެދުމާއި އެމަސައްކަތްތައް ކުރަމުންދާކަމަށް ވިދާޅުވިއެވެ.
ރިޔާސީ އިންތިޚާބު އޮންނާނެކަމަށް އީސީން ބުނެފައިވަނީ ސެޕްޓެމްބަރ މަހުގެ ތެރޭގައެވެ. އަދި އިންތިޚާބު ބާއްވާނެ ތާރީޚެއް އީސީން އިއުލާންކޮށްފައި ނުވިނަމަވެސް ސެޕްޓެމްބަރ 2 ނުވަތަ 9 ގައި އިންތިޚާބުގެ ފުރަތަމަ ބުރު ބޭއްވޭނެކަމަށް އީސީން ބުނެއެވެ.
