ޞުލްޙަވެރިކަމާއެކު އެއްވެއުޅުމުގެ މިނިވަންކަމުގެ ޤާނޫނުގެ މަސައްކަތް ނުކޮށް އޮތީ ސަރުކާރުން އެ މަސައްކަތް ގަސްތުގައި ލަސްކުރާތީ ކަމަށް ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު އެފަދައިން ވިދާޅުވީ އާދިއްތަ ދުވަހު ބޭއްވި ނޫސްވެރިންގެ ބައްދަލުވުމެއްގައެވެ. ރައީސް ނަޝީދު ވިދާޅުވީ އެ ބިލުގެ މަސައްކަތް މަޖިލީހުގެ ޓޫފޯވަން ކޮމިޓީގައި ދަންމަމުންދާ ކަމަށެވެ. އެހެންނަމަވެސް ސަރުކާރުން ކުރަން ބޭނުންވާ ކަމެއް ނުކޮށް ނެތް ކަމަށް ރައީސް ނަޝީދު ވަނީ ވިދާޅުވެފައެވެ. ރައީސް ނަޝީދު ވަނީ މަޖިލީހުގެ މެޖޯރިޓީ އޮތީ ރައީސް އިބްރާހިމް މުހައްމަދު ޞާލިހު އަށް ކަމަށާއި ސަރުކާރުން ބޭނުންވާ ކަމެއް ބޭނުންވާ ގޮތަކަށް މަޖިލީހުން ކުރަމުންދާ ކަމަށް ވިދާޅުވެފައެވެ. ޓެކްސްގެ ޤާނޫނާއި، ލާމަރުކަޒީ ޤާނޫނާއި، މަސްވެރިކަމުގެ ޤާނޫނު އައި އިރު ވެސް ހިތްހަމަނުޖެހޭ ކަންކަން ހުރި ކަމަށް އެމަނިކުފާނު ވިދާޅުވިއެެވެ. މީގެ އިތުރުން އަތޮޅު ކައުންސިލް ހިއްސާވާ ކުންފުނީގެ މަސައްކަތް ފަދަ ކަންކަމާއި މެދު ހިތްހަމަ ނުޖެހުނު ނަމަވެސް އެ މަސައްކަތްތައް މަޖިލީހުގެ ތެރެއިން ކުރައްވާފައިވާކަމަށް ރައީސް ނަޝީދު ފާހަގަކުރެއްވިއެވެ.

މިހާރު އޮތްގޮތަށް "ޤާނޫނު ނަންބަރު 2013/1 (ޞުލްޙަވެރިކަމާއެކު އެއްވެއުޅުމުގެ މިނިވަންކަމުގެ ޤާނޫނު) އަށް 1 ވަނަ އިޞްލާޙު ގެނައުމުގެ ބިލު" ރައްޔިތުންގެ މަޖިލީހުން ފާސްކޮށްފައި ވަނީ 2016 ވަނަ އަހަރުގެ އޮގަސްޓު މަހުގެ 17 ވަނަ ދުވަހުއެވެ. އޭރުގެ ރައީސް ޢަބްދުﷲ ޔާމީން ޢަބްދުލްޤައްޔޫމް އެ ބިލް ތަސްދީގުކުރެއްވީ އެ އަހަރުގެ އޮގަސްޓް މަހުގެ 23 ވަނަ ދުވަހުއެވެ.

މި ބިލުގެ ސަބަބުން، މޯލްޑިވްސް ޕޮލިސް ސަރވިސްއިން ލިޔުމުން ދޭ ހުއްދައަކާއެކު ފިޔަވައި، މާލޭގައި އެއްވެސް ބާވަތެއްގެ އެއްވުމެއް ނުވަތަ ހިނގާލުމެއް ނުވަތަ އުޅަނދުބުރެއް ބޭއްވޭނީ، މިނިސްޓްރީ އޮފް ހޯމް އެފެއާޒްއިން ކަނޑައަޅައި ޢާންމުކޮށް އިޢުލާންކޮށްފައިވާ ތަންތަނުގައި އެކަންޏެވެ. މިގޮތުން މިނިސްޓްރީ އޮފް ހޯމް އެފެއާޒްއިން ކަނޑައަޅާ ތަންތަނުގެ ލިސްޓް، މި ޤާނޫނަށް ޢަމަލުކުރަން ފަށާތާ ގިނަވެގެން 30 ދުވަހުގެ ތެރޭގައި މިނިސްޓްރީ އޮފް ހޯމް އެފެއާޒްއިން ޢާންމުކޮށް އިޢުލާންކޮށް ދިވެހިސަރުކާރުގެ ގެޒެޓުގައި ޝާއިޢުކުރައްވާނެ ކަމަށް އެ ޤާނޫނުގައި ވަނީ ބަޔާންކޮށްފައެވެ.

މި ސަރުކާރު ވެރިކަމަށް އައީ އެއްވެ އުޅުމުގެ ޤާނޫނަށް ބަދަލުގެނެސް އެއްވެ އުޅުމުގެ މިނިވަންކަން ފުޅާކޮށް ހޯދާދިނުމަށް ވައުދުވެގެންނެވެ. އެއްވެ އުޅުން ހަނި ކުރުމުގެ މާއްދާ އުވާލުމަށް ކާށިދޫ ދާއިރާގެ މެމްބަރު އަބްދުﷲ ޖާބިރު ވަނީ މަޖިލީހުގެ މިދައުރުގައި ހުށަހަޅުއްވާފައެވެ. އެ ބިލުގެ މަސައްކަތް މިހާރު އޮތީ ސަލާމަތީ ހިދުމަތްތަކާ ބެހޭ ރައްޔިތުންގެ މަޖިލީހުގެ ކޮމެޓީގައެވެ. ދާދިފަހުން ރައީސް ވަނީ އެ ބިލް މަޖިލީހުން ފާސްކުރުމާއި އެކު ލަސްނުކޮށް އެ ބިލް ތަސްދީގުކުރައްވާނެ ކަަމަށް ވިދާޅުވެފައެވެ.