އަޅުގަނޑުގެ ރަނިންގްމޭޓަކަށްވާނީ އައްޑޫ މީހެއް: ރައީސް ނަޝީދު

އެމްޑީޕީ ޕްރައިމަރީގައި ވާދަކުރައްވާ ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދުގެ ރަނިންގ މޭޓަކަށް ހޮއްވަވާނީ އައްޑޫ މީހެއް ކަމަށް އެމަނިކުފާނު ވިދާޅުވެއްޖެއެވެ.

ރައީސް ނަޝީދު އއ، އދ، ފ، އަދި ދ އަތޮޅަށް ކުރެއްވި ދަތުރުފުޅަށްފަހު އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ވިދާޅުވީ ރަނިންގ މޭޓަކަށް ވާނީ މުޅި ރާއްޖެ ތަމްސީލު ކުރެވޭ، ރަމްޒު ކުރެވޭ ބޭފުޅެއް ކަމަށެވެ. އަދި ޒުވާނުންގެ ހިއްސާ ބޮޑުކަމަށް ދެކިވަޑައިގަންނަވާ ކަމަށާއި ކާމިޔާބު ރަނިންގ މޭޓަކާއެކު ކުރިއަށް ދެވޭނެ ކަމަށް އުންމީދު ކުރައްވާ ކަމަށް ނަޝީދު ވިދާޅުވިއެވެ.

ނަޝީދުގެ ރަނިންގ މޭޓަކަށް ވާނީ އައްޑޫ މީހެއް ކަމަށް ވިދާޅުވިނަމަވެސް އެބޭފުޅެއްގެ ނަން ހާމައެއް ނުކުރައްވައެވެ.

ނަޝީދު ވިދާޅުވީ 60 އިންސައްތަ އާއި 70 އިންސައްތައިން އެމްޑީޕީގެ ޕްރައިމަރީ ކާމިޔާބު ކުރެއްވޭނެ ކަމުގެ ފުރިހަމަ ޔަޤީންކަން އެބައޮތް ކަމަށެވެ.

އެންމެ ބޮޑުވޯޓް އޮންނާނީ ބޮޑެތި ރަށްތަކުގައި ކަމަށާއި އެ ރަށްތަކުން ރައީސުލްޖުމްހޫރިއްޔާއާ މެދު ހިތްހަމަ ނުޖެހޭ ކަމަށް ނަޝީދު ވިދާޅުވިއެވެ.

ވެރިކަން ވެއްޓުނު ގޮތާމެދު ރައީސް ސާލިހަށް ތާއިދު ކުރައްވާ މެމްބަރުން ދައްކަވާ ވާހަކަފުޅުތަކާއި ގުޅިގެން ނަޝީދު ވިދާޅުވީ އަބަދުވެސް އެންމެ ބޮޑު އަމާޒަކަށްވީ އެމްޑީޕީ އަކީ ރާއްޖޭގައި އޮތް އެންމެ ބޮޑު ސިޔާސީ ޕާޓީއަށް ހެދުމަށް ކަމަށެވެ. އެހެންނަމަވެސް އެކަން ކުރަން އެންމެ ރަނގަޅު ގޮތަކަށްވީ ރައްޔިތުންގެ ގަޔަށް ބަޑިޖަހާ، ވެރިކަން ސަކާ ކޮށްގެން ހުރުން ނޫންކަމަށް ދެކިވަޑައިގެންނެވި ކަމަށާއި އެ ދުވަހު ވެރިކަމުން އިސްތިއުފާ ނުދެއްވިނަމަ 2013 ގައި އެމްޑީޕީއަށް ބޮޑު ވޯޓް ނުލިބުނީސްކަމަށް ނަޝީދު ވިދާޅުވިއެވެ.

ނަޝީދު އިތުރަށް ވިދާޅުވީ ރާއްޖޭގެ ސިޔާސީ ހަޤީޤަތްތަކަށް ބައްލަވާލެއްވުމުން އެކަން ސާފުވާނެ ކަމަށެވެ.