އުދިނޭޒީ ބަލިކޮށް ޔުވެންޓަސް ދެ ވަނަ އަށް ޖެހިލައިފި

އިޓާލިއަން ލީގުގައި އުދިނޭޒީއާ ދެކޮޅަށް ކުޅުނު މެޗުން މޮޅުވެ ޔުވެންޓަސް ލީގު ތާވަލްގެ ދެ ވަނަ މަގާމަށް ޖެހިލައިފި އެވެ.

ޔުވެންޓަސްގެ އަމިއްލަ ދަނޑުގައި ކުލުނު މެޗު އެ ޓީމުން ކާމިޔާބުކުރީ 1-0 އިންނެވެ. ސީޒަންގެ ކުރީ ކޮޅު ލީގުގައި ޔުވެންޓަސްގެ ފަރާތުން ދަށް ކުޅުމެއް ފެނުނު ނަމަވެސް، މިހާރު އެ ޓީމުން އަންނަނީ ކުޅުން ރަނގަޅު ކުރަމުންނެވެ. މެޗުގެ ކުރީ ކޮޅު އުދިނޭޒީގެ ވަލޭސް ބޮލުން ފޮނުވާލި ހަމަލާއެއް ޔުވެންޓަސްގެ ގޯލް ކީޕަރު ވަނީ މަތަކޮށްފަ އެވެ. މެޗުގެ 18 ވަނަ މިނެޓުގައި ޔުވެންޓަސްއަށް ލިބުނު ހިލޭ ޖެހުމެއްގައި އެންހެލް ޑިމާރިއާ ހުރަސްކޮށްދިން ބޯޅައަކުން ޑިފެންޑަރު ޑެނިއެލް ރުގާނީ ފޮނުވާލި ހަމަލާ އުދިނޭޒީގެ ކީޕަރު ވަނީ މަތަކޮށްފަ އެވެ. ދެ ވަނަ ހާފަށް ނިކުމެ ޔުވެންޓަސް އިން ވަނީ ގިނަ ހަމަލާތަކެއް ވެސް އުފައްދައިފަ އެވެ. މެޗުގެ ހަމައެކަނި ލަނޑު 86 ވަނަ މިނެޓުގައި ޖެހީ ޑެނީލޯ އެވެ. އެއީ ޔުވެންޓަސްގެ ފެޑެރިކޯ ޗިއެސާ ގޯލު ކުރި މައްޗަށް ހުރަސްކޮށްދިން ބޯޅައެއް ގޯލަށް ފޮނުވާލައިގެންނެވެ.

މޮޅާއެކު ޔުވެންޓަސް ދެ ވަނައިގައި އޮތީ ކުޅުނު 17 މެޗުން 37 ޕޮއިންޓާއެކު އެވެ. ޔުވެންޓަސް އަށް ވުރެ މަދުން މެޗް ކުޅެގެން އެއް ވަނައިގައި ނަޕޯލީ އޮތީ 41 ޕޮއިންޓާއެކު އެވެ. މެޗުން ބަލިވި އުދިނޭޒީ އޮތީ 25 ޕޮއިންޓާއެކު އަށް ވަނައިގަ އެވެ.