"ޗާލު މިސްކިތް" ފަަންޑަށް 3 ލައްކަ ރުފިޔާ

މާލޭ ސިޓީ ކައުންސިލުން ބަލަހައްޓަމުންދާ މިސްކިތްތަކުގެ އާބާތުރަ ފިލުވުމަށް ހިންގަމުންދާ "ޗާލު މިސްކިތް" ފަންޑް ރައިޒިންގ އިވެންޓުގެ ފުރަތަމަ ދުވަހު، އެ ފަންޑަށް 3 ލައްކައަށްވުރެ ގިނަ ރުފިޔާ ލިބިފައިވާކަމަށް ސިޓީ ކައުންސިލުން ބުނެފިއެވެ.

ސިޓީ ކައުންސިލުން ބުނިގޮތުގައި، ފުރަތަމަ ދުވަހު އެ ފަންޑަށް ލިބިފައިވަނީ ޖުމްލަ 313،397 (ތިން ލައްކަ ތޭރަ ހާސް ތިންސަތޭކަ ނުވަދިހަ ހަތް) ރުފިޔާ ކަމަށެވެ.

މާލޭ ސިޓީ ކައުންސިލުން ބަލަހައްޓާ 28 މިސްކިތް މާލެ ސަރަހައްދުގައި ހުރިކަމަށް ސިޓީ ކައުންސިލުން ވަނީ ބުނެފައެވެ. މިސްކިތް ބެލެހެއްޓުމަކީ ކައުންސިލްގެ ސްޓްރެޓްޖިކް އެކްޝަން ޕްލޭންގެ ދަށުން ކުރަމުންދާ މަަސައްކަތެކެވެ. އެ މަސައްކަތަށްޓަކައި ސަރުކާރުން ކޮންމެ އަހަރަކުވެސް އެއް މިލިއަން ރުފިޔާ ދެއެވެ. އެހެންނަަވެސް އެއީ މި މަސައްކަތަށް އެންމެ އެކަށީގެންވާ މިންވަރެެއް ނޫން ކަމުގަައި މޭޔަރު ފާހަގަކުރެއްވިއެވެ.

ހުކުރު ދުވަހު ހަވީރުން ފެށިގެން އާޓިފިޝަލް ބީޗްގައި ކުރިއަށްގެންދާ މި ހަރަކާތަށް ހޫނު ތަރުހީބެއް ލިބެމުންދާ ކަމަށް ސިޓީ ކައުންސިލުން ވަނީ ބުނެފައެވެ.

ސިޓީ ކައުންސިލުން ބުނީ މާލޭގެ މިސްކިތްތަކުގެ މަރާމާތަށް 10 މިލިއަން ރުފިޔާ ޚަރަދުކޮށްފައިވާ ކަމަށެވެ. އަދި މީގެ ކުރިންވެސް މިސްކިތްތަކުގެ މިފަދަ ކަންކަމަށް އާންމުންގެ ބޮޑު އެހީއެއް ލިބޭކަން ފާހަގަކޮށް އެކަމަށްޓަކައި ކައުންސިލުން ވަނީ އާއްމުންނަށް ޝުކުރު އަދާކޮށްފައެވެ.