އިޒްރޭލުގެ ޖަލުގައި އެންމެ ގިނަ ދުވަސް ހޭދަކުރި ފަލަސްޠީނުގެ ޤައިދީއަށް ބަޠަލެއްގެ މަރުޙަބާ

އިޒްރޭލުގެ ޖަލުތަކުގައި ދުވަސްތައް ގުނަމުންދާ ފަލަސްޠީނުގެ ޤައިދީންގެ ތެރެއިން މިހާތަނަށް އެންމެ ގިނަ ދުވަސްވީ ޤައިދީއެއްގެ ގޮތުގައި ހޭދަކޮށްފައިވާ އެކަކު، އޭނާގެ 40 އަހަރުގެ ޖަލު ޙުކުމް ފުރިހަމަކޮށް، މިނިވަންވެގެން ޖަލުން ނުކުމެއްޖެއެވެ.

ޢުމުރުން މިހާރު 60 އަހަރު ފުރިފައިވާ ކަރީމް ޔޫނިސްގެ މައްޗަށް އިޒްރޭލުން އިއްވި 40 އަހަރުގެ ޖަލު ޙުކުމް ފުރިހަމަކުރުމަށްފަހު މިނިވަން ވެގެން ނުކުތުމާ ގުޅިގެން، އިޒްރޭލުގެ ކަނާތު-ފިޔައިގެ އާ ސަރުކާރުގެ މެންބަރުން ދަނީ އޭނާގެ ރަށްވެހިކަން ބާޠިލުކުރުމަށް ގޮވާލަމުންނެވެ.

އޭނާގެ މައްޗަށް އިއްވި ޙުކުމުގެ މުއްދަތު ފުރިހަމަކޮށް، މިނިވަނެއްގެ ގޮތުގައި ޔޫނިސް ޖަލުން ނުކުމެގެން އައިއިރު، އިޒްރޭލުގެ ދާޚިލީ ވަޒީރު އާރްޔޭ ދޭރީ ވަނީ، ޔޫނިސްގެ އަތުގައި އޮތް އިޒްރޭލުގެ ރަށްވެހިކަން ބާޠިލުކުރުމަށް ގޮވާލާފައެވެ. ނަމަވެސް ކަރީމް ޔޫނިސް ހުރީ ސާބިތު ޢަޒުމެއްގައެވެ.

ކަރީމް ޔޫނިސްގެ މައްޗަށް އިޒްރޭލުން ޖަލު ޙުކުމް އިއްވީ، އިޒްރޭލުން ވެރިވެގެންފައިވާ ޖައުލާންގެ އުސްބިންތަކުގައި 1983 ވަނަ އަހަރު، އިޒްރޭލުގެ ސިފައިންގެ މީހެއް ކަމަށްވާ އަވްރަހަމް ބްރޮމްބަރގް ވަގަށް ނަގައި، މަރާލި މައްސަލައިގައެވެ.

ޕެލެސްޓީނިއަން ޕްރިޒަނަރޒް އެސޯސިއޭޝަނުން ބުނާގޮތުގައި ކަރީމް ޔޫނިސްއަކީ މިހާތަނަށް މެދުކެނޑުމެއްނެތި، އެންމެ ގިނަ ދުވަސް ވަންދެން ޖަލު ޙުކުމް ތަންފީޒުކުރި ފަލަސްޠީނުގެ ޤައިދީއެވެ.

ކަރީމް ޔޫނިސްގެ އުފަން ވަޒަނަކީ ޢަރަބި އިޒްރޭލުންގެ އަވަށެއް ކަމަށްވާ ޢާރާއެވެ. ޖަލުން މިނިވަން ވުމާއެކު، ޢާރާއިން ޔޫނިސްއަށް ކިޔާފައިވަނީ ބަޠަލަކަށް ކިޔާފަދަ ހޫނު މަރުޙަބާއެކެވެ. ޔޫނިސްއަށް މަރުޙަބާކިއުމަށް އޭނާގެ ޢާއިލާގެ މެންބަރުންނާއި ރަޙުމަތްތެރިންގެ އިތުރުން، ގިނަ ޢަދަދެއްގެ ސަޕޯޓަރުން ވަނީ މަގުތަކަށް ނުކުމެފައެވެ. މުޅި މަގު އޭނާ ކަޑައްތުކުރީ މީހުންގެ ކޮނޑުތައް މަތީގައި އުފުލައިގެންނޭވެސް ބުނެވިދާނެއެވެ.

އިޒްރޭލުގައި ޢަރަބީންނަކީ އާބަދީގެ ގާތްގަނޑަކަށް 5 ބައިކުޅަ 1 ބައެވެ. ގިނަ މީހުންނަކީ، 1948 ވަނަ އަހަރުގެ ހަނގުރާމައަށްފަހު އިޒްރޭލުގެ ނަމުގައި އުފެއްދި ސަރަޙައްދުގައި މަޑުކުރި ފަލަސްޠީނު ދަރިކޮޅުގެ މީހުންނެވެ. ސިޔާސީ މައިދާނުގައިވެސް އެ މީހުންނަށް ކުރިމަތިލާންޖެހޭ ގޮންޖެހުންތައް ބޮޑެވެ. ފަލަސްޠީނުގެ ލޭ ހިނގާތީއެވެ. ފަލަސްޠީނުގެ ބައެއްކަމަށް ބުނާތީއެވެ. އިޒްރޭލުގެ ރަށްވެހިކަމާއެކު ފަލަސްޠީނުގެ ބައެކޭ ބުނުމަކީ ބައެއް މީހުންނަށް ހަޖަމްކުރަން މާ ފަސޭހަ ވާހަކައަކަށްވެސް ނުވާތީއެވެ.

އިޒްރޭލުގެ ޖަލުތަކުގައި ބަންދުކުރާ ފަލަސްޠީނު ދަރިކޮޅުގެ މީހުންނަކީ، ފަލަސްޠީނުގެ ރައްޔިތުންގެ ކުރިމަތީގައި ބަޠަލުންތަކެކެވެ. ނަމަވެސް، ޔަހޫދީ އިޒްރޭލުގެ ލޯތަކަށް އެމީހުން ފެންނަނީ ޓެރަރިސްޓުންގެ ގޮތުގައެވެ.