ތެރަޕިއުޓިކް ފަރުވާއަށް 68.6 މިލިއަން ރުފިޔާ ހަރަދުވެއްޖެ: ޖެންޑަރ މިނިސްޓަރު
1،300 މީހުންނަށް ތެރަޕިއުޓިކް ފަރުވާ ފޯރުކޮށްދީފައިވޭ
ޖެންޑަރ މިނިސްޓަރު އާއިޝަތު މުހައްމަދު ދީދީ
ނުކުޅެދުންތެރިކަން ހުންނަ މީހުންނާއި ކުދިންގެ ހާލަތު ރަނގަޅުކުރުމަށް ތެރަޕިއުޓިކް ފަރުވާ ދިނުމަށް މިހާތަނަށް 68.6 މިލިއަން ރުފިޔާ ދައުލަތުން ޚަރަދުކޮށްފައިވާކަމަށް ޖެންޑަރ މިނިސްޓަރު އާއިޝަތު މުހައްމަދު ދީދީ ވިދާޅުވެއްޖެއެވެ.
ބައިނަލްއަގުވާމީގޮތުން ފާހަގަކުރާ ނުކުޅެދުންތެރިކަން ހުންނަ މީހުންގެ ދުވަހުގެ ރަސްމީ ޖަލްސާގައި ބުރާސްފަތި ދުވަހުގެރޭ ވާހަކަފުޅުދައްކަވަމުން މިނިސްޓަރު ވިދާޅުވީ ވޭތުވެދިޔަ 4 އަހަރުގެ ތެރޭގައި އެންސްޕާއިންނާއި، އާސަންދައިން 1،300 މީހުންނަށް ތެރަޕިއުޓިކް ފަރުވާ ފޯރުކޮށްދީފައިވާކަމަށެވެ. އަދި މި ޚިދުމަތަށް މިހާތަނަށް 68.6 މިލިއަން ރުފިޔާ ޚަރަދުވެފައިވާކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ ނުކުޅެދުންތެރިކަން ހުންނަ މީހުންގެ ދިރިއުޅުމަށް ހެޔޮ ބަދަލުތަކެއް ގެނައުމަށް މި ސަރުކާރުން ގެންގުޅޭ ސިޔާސަތުތަކުގެ ހެޔޮ ނަތީޖާ މިއަދު ފެންނަމުންދާކަމަށެވެ. އެމީހުންނަށް ބޭނުންވާ ތަކެތި ހޯދުމަށް ފަސޭހަވެ، ތެރަޕިއުޓިކް ފަރުވާވެސް ފަސޭހަކަމާއެކު ލިބެމުންދާކަމަށެވެ.
18 އަހަރު ނުފުރޭ ނުކުޅެދުންތެރިކަން ހުންނަ ކުދިންނަށް މިފަދަ ޚިދުމަތްތައް އެއް ފުރާޅެއްގެ ދަށުން ދިނުމަށް ހުޅުމާލެ ހޮސްޕިޓަލުގައި ޗައިލްޑް ޑިވެލޮޕްމެންޓް ސެންޓަރެއް 2022 ވަނަ އަހަރުގެ މާރޗް މަހުގެ ތެރޭގައި ގާއިމްކުރެވިގެން ދިޔަކަން މިނިސްޓަރު ވަނީ ފާހަގަކުރައްވާފައެވެ. މި ޚިދުމަތް ގާއިމްކުރިތާ އަހަރެއް ނުވަނީސް ކުދިންގެ ދިރިއުޅުމަށް ހެޔޮ ބަދަލުތަކެއް އަންނަން ފަށާފައިވާކަން ފެންނަމުންދާކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ ތެރަޕިއުޓިކް ފަރުވާ ދިނުމުން ހެޔޮ އުފާވެރި ބަދަލުތަކެއް ގެނެވޭނެކަން މިކަމުން އެނގިގެންގޮސްފައިވާކަމަށެވެ.
