ޔާމީނު ހުންނަވާ ޖަލްސާއެއްގެ ވަސް ފޯރާ ހިސާބަށްވެސް އޭރު އިދިކޮޅު ފަރާތްތަކަށް ކައިރި ނުވެވޭ: އިމްރާން
5 ޖެނުއަރީ 2023 | ބުރާސްފަތި 09:45ރައީސް ޔާމީނުގެ ވެރިކަމުގައި އެއްވެ އުޅުމުގެ މިނިވަންކަން އޮތީ ނުހަނު ބޮޑަށް ހަނިވެފައި
ހޯމް މިނިސްޓަރު އިމްރާން އަބްދުﷲ
ރައީސް ޔާމީނު ބައިވެރިވެވަޑައިގަންނަަވާ ޖަލްސާއެއްގެ ވަސް ފޯރާ ހިސާބަށްވެސް އިދިކޮޅު ބަޔަކަށް ޖަލްސާއެއް ބާއްވަން ފުރުސަތު ނުދެއްވާނެކަމަށް ހޯމް މިނިސްޓަރު ޝެއިހް އިމްރާން އަބްދުﷲ ވިދާޅުވެއްޖެއެވެ.
ބުދަ ދުވަހުގެރޭ ކުރިއަށްދިޔަ ސިޔާސީ ޙަރަކާތްތަކަށް އަލިއަޅުވާލައްވާ އިމްރާން ވިދާޅުވީ، ރައީސުލްޖުމްހޫރިއްޔާ އިބްރާހިމް މުޙައްމަދު ސާލިޙުގެ ކެމްޕޭން ޖަލްސާ ކުރިއަށް ގެންދެވީ އިދިކޮޅު ޕާޓީގެ ޖަލްސާއެއްވެސް މަގުގެ އެއް ފަޅީގައި މިނިވަންކަމާއެކު ބޭއްވުމުގެ ފުރުސަތު ފުރިހަމައަަށް ދެއްވައިގެން ކަމަށެވެ.
އެކަމުން އަންގައިދެނީ ރައީސް ސާލިޙުގެ ކެތްތެރިކަމާއި ހިތްވަރުގަދަކަން ކަން ފާހަގަކުރައްވައި އިމްރާން ވިދާޅުވީ، އެއިން ފެނިގެންދަނީ ހަމަހަމަ ފުރުސަތު ދީގެން މަސައްކަތް ކުރުމުގެ ޤާބިލުކަން ހުރި މިންވަރު ކަމަށެވެ.
އިމްރާނު ވަނީ ޔާމީނު ސަރުކާރުގެ ހަނދާންތައްވެސް އައު ކުރައްވާފައެވެ. އެގޮތުން ރައީސް ޔާމީނު ބައިވެރިވެވަޑައިގަންނަަވާ ޖަލްސާއެއްގެ ވަސް ފޯރާ ހިސާބަށްވެސް އިދިކޮޅު ބަޔަކަށް ޖަލްސާއެއް ބާއްވަން ފުރުސަތު ނުދެއްވާނެކަން ހުދު ޕީޕީއެމްގެ ބެފުޅުންވެސް ޤަބޫލު ކުރައްވާނެކަމަށް އިމްރާން ވިދާޅުވިއެވެ.
އިމްރާން އެހެން ވިދާޅުވެފައިވާއިރު، ރައީސް ޔާމީނުގެ ވެރިކަމުގައި އެއްވެ އުޅުމުގެ މިނިވަންކަން އޮތީ ނުހަނު ބޮޑަށް ހަނިވެފައިކަމަށް ގިނަ ބަޔަކު ބުނެއެވެ. މިސާލެއްގެ ގޮތުން 2018 ވަނަ އަހަރުގެ މާރޗު މަހުގެ ތެރޭގައި އޭރުގެ ގުޅިފައިވާ ސިޔާސީ ޕާޓީތަކުން އެއްވުމެއް ބާއްވާނެކަން އިއުލާންކުރިތާ 15 މިނެޓު ވެސް ނުވަނީސް ސަލާމަތީ ބާރުތަކުން ނޫސްވެރިންގެ ބައްދަލުވުން ބާއްވައި އެއްވުން ކުރިއަށް ގެންދަން ފުރުސަތު ނުދޭނެކަން އިއުލާން ކުރިއެވެ.
އޭގެ ކުރިންވެސް މުޒާހަރާތައް ބާއްވަން އިއުލާން ކުރުމާއެކު ފުލުހުން އެމްޑީޕީ ހަރުގެ ބަލާ ފާސްކޮށް، މުޒާހަރާ ރާވަން އިސްކޮށް ހަރަކާތެރިވާ މެމްބަރުންގެ ފޯނު ވެސް ތަހްގީގަށް ހިފަހައްޓާފައިވެއެވެ.
ހަމައެއާއެކު، އޭރު އިދިކޮޅު ސިޔާސީ ޕާޓީތަކުން ކުރިއަށް ގެންދިޔަ ހަރަކާތްތަކުގައި ބައިވެރިވުމަށް ރަށްރަށުން މާލެ އަންނަ މީހުންނާ މެދު ފިޔަވަޅު އަޅާނެ ކަމަށް ބުނަމުންދިޔައީ އޭރު ވެރިކަން ކުރި ޕާޓީ ޕީޕީއެމްގެ އިސް ބޭބޭފުޅުންނެވެ.
ނަމަވެސް މިއަދު ވެރިކަން ކުރާ ޕާޓީވެސް އަދި ސަރުކާރުންވެސް ގެންދަނީ އެއްވެ އުޅުމުގެ ފުރުސަތު ވީ އެންމެ ފުޅާކޮށް ދިނުމަށް މަސައްކަތް ކުރަމުންނެވެ.
