ޗެލްސީ އާއި ބެންފީކާގެ މަޝްވަރާތައް ކުރިއަށް، އެންޒޯ ބޭނުންވަނީ ބަދަލުވާން

އާޖެންޓީނާގެ ޒުވާން މިޑްފީލްޑަރު އެންޒޯ ފެނާންޑޭޒް ހޯދުމަށް ޗެލްސީން ބެންފީކާއާއެކު މަޝްވަރާތައް ކުރިއަށް ގެންދާއިރު، އެންޒޯ ބޭނުންވަނީ ޗެލްސީ އަށް ބަދަލުވާން ކަމަށް މީޑިއާ ރިޕޯޓުތައް ބުނެފި އެވެ.

އެންޒޯ ހޯދުމުގެ ޝައުޤުވެރިކަން ޗެލްސީން ގެންގުޅެނީ މިދިޔަ ޑިސެމްބަރު މަހު ނިމުނު ފީފާ ވޯލްޑް ކަޕް މުބާރާތުގައި އޭނާ ދެއްކި މޮޅު ކުޅުމުގެ ސަބަބުންނެވެ. އެންޒޯ އަކީ މުބާރާތުގެ އެންމެ މޮޅު ޒުވާން ކުޅުންތެރިޔާ އެވެ. ރިޕޯޓުތައް ބުނާ ގޮތުން ޗެލްސީ އާއި ބެންފީކާ އިން ވަނީ އަންގާރަ ދުވަހުގެ ރޭ މަޝްވަރާތައް ކުރިއަށް ގެންގޮސްފަ އެވެ. ގިނަ އިރުތަކަކަށް ދެމިގެން ދިޔަ މަޝްވަރާތަކުން ވަކި ގޮތެއް މިހާތަނަށް ނުނިމޭ ކަމަށް ވެސް ރިޕޯޓުތައް ބުނެ އެވެ. އެއާއެކު ބުދަ ދުވަހު ވެސް ދެ ކުލަބުގެ ދެމެދު މަޝްވަރާތައް ކުރިއަށް ދާނެ ކަމަށް މީޑިއާތަކުގައި ވަނީ ރިޕޯޓުކޮށްފަ އެވެ.

މީގެ އިތުރުން މީޑިއާ ރިޕޯޓުތައް ބުނާ ގޮތުން އަންގާރަ ދުވަހު ބެންފީކާ އަށް ކުރިއަަށް ގެންދިޔަ ފަރިތަކުރުންތަކަށް އެންޒޯ ހާޒިރުވި އެވެ. އެއަށްފަހު އެންޒޯ ވަނީ ޗެލްސީ އަށް ބަދަލުވާން ބޭނުންވާކަން ބެންފީކާގެ ކޯޗު ރޮޖާ ޝްމިތު ގާތު ބުނެފައި ކަމަށް ރިޕޯޓުތައް ބުނެ އެވެ. އެކަމާ ގުޅިގެން ޝްމިތުއާއި އެންޒޯއާ ދެމެދު ވާހަކަތައް ދެކެވުނު ކަމަށާއި، ކޯޗު އެދެނީ އެންޒޯ މަޑުކުރަން ކަމަށް ވެސް ބުނެ އެވެ.

މަޝްވަރާތައް ކުރިއަށްދާއިރު، މިހާރު އިންތިޒާރު ކުރަމުން އަންނަނީ ބެންފީކާގެ ރައީސް ރޫއީ ކޯސްޓާގެ ނިންމުމަކަށް ކަމަށާއި، ވަރަށް އަވަހަށް އޭނާ ގޮތެއް ނިންމާނެ ކަމަށް ވެސް ރިޕޯޓުތައް ބުނެ އެވެ.