ކުރީގެ ރައީސް އަބްދުﷲ ޔާމީން މިނިވަންކުރުމަށް ގޮވާލާ އިދިކޮޅު ޕީޕީއެމް/ޕީއެންސީން މާލޭގައި ކުރިޔަށްގެންދާ މުޒާހަރާގެތެރެއިން އަންގާރަ ދުވަހުގެ ރޭ މާލެ ސިޓީގެ މޭޔަރ ޑރ މުހައްމަދު މުއިއްޒު ހައްޔަރުކޮށްފިއެވެ.
ޔާމީން ޖަލަށް ލުމަށް ހުކުމްކުރުމާއި ގުޅިގެން އިދިކޮޅުން އަންނަނީ ކޮންމެ ރެޔަކު މުޒާހަރާކުރަމުންނެވެ. މިމުޒާހަރާތަކުގައި ކޮންމެ ރެޔަކުވެސް މީހުން އަންނަނީ ހައްޔަރުކުރަމުންނެވެ. މިއީ މުޒާހަރާއަކުން މުއިއްޒު ހައްޔަރުކުރި ފުރަތަމަ ފަހަރެވެ.
މުއިއްޒު ހައްޔަރުކުރުމާއި ގުޅިގެން މާލެ ސިޓީ ކައުންސިލުން ވަނީ ނޫސްބަޔާނެއް ނެރެފައެވެ. އެބަޔާނުގައި ބުނެފައިވަނީ ގާނޫނު އަސާސީން ލިބިދޭ ޚިޔާލުފާޅުކުރުމުގެ މިނިވަންކަމުގެ ދަށުން ޕީޕީއެމް/ޕީއެންސީ ކޯލިޝަނުން ކުރިޔަށްގެންދިޔަ ޝުއޫރުފާޅުކުރުމުގެ ތެރެއިން މޭޔަރ ހައްޔަރުކޮށްފައިވާކަމަށެވެ. އަދި މޭޔަރ ދޫކޮށްލުމަށް ވަނީ ގޮވާލާފައެވެ.
އަންނަ އަހަރުގެ ރިޔާސީ އިންތިހާބަށް އިދިކޮޅު ކޯލިޝަންގެ ރިޔާސީ ޓިކެޓް ވެސް ދީފައިވާ ޔާމީނަށް 11 އަހަރުގެ ޖަލު ހުކުމެއް ކްރިމިނަލް ކޯޓުން އިއްވީ ވ. އާރަށުގެ މައްސަލައިގައި ޔާމީންގެ މައްޗަށް އުފުލާފައިވާ މަނީ ލޯންޑްރިންގެ ދައުވާ އާއި ރިޝްވަތު ހިފުމުގެ ކުށުގެ ދައުވާ ސާބިތުވުމުންނެވެ. އެ ދައުވާތައް ސާބިތުވުމުން ފަސް މިލިއަން ޑޮލަރުން ޖޫރިމަނާކޮށް، އެ ފައިސާ ހަ މަސްތެރޭ ދެއްކުމަށް ވެސް އަމުރު ކޮށްފައިވެއެވެ.
