ވޯލްޑް ކަޕް ކާމިޔާބަށްފަހު މެސީ އެނބުރި ޕީއެސްޖީ އަށް

ފީފާ ވޯލްޑް ކަޕްގެ ކާމިޔާބީ އަށް ފަހު އާޖެންޓީނާގެ ކެޕްޓަން ލިއޮނަލް މެސީ، ޕެރިސް ސެއިންޓް ޖާމަން (ޕީއެސްޖީ) ގެ ފަރިތަކުރުންތަކުގައި ބައިވެރިވުމަށް ހާޒިރުވެއްޖެ އެވެ.

ވޯލްޑް ކަޕް ކާމިޔާބީ ފާހަގަކުރުމަށް ޕީއެސްޖީން ވަނީ މެސީ އަށް ރެސްޓު ދީފަ އެވެ. އެކަން ޕީއެސްޖީގެ ކޯޗު ކްރިސްޓޮފާ ގަލްޓިއޭ ވަނީ މީގެ ކުރިން ކަށަވަރުކޮށްދީފަ އެވެ. ވޯލްޑް ކަޕް ބްރޭކަށްފަހު ލީގުގައި ޕީއެސްޖީން ވަނީ މިހާތަނަށް ދެ މެޗު ކުޅެފަ އެވެ. ގަލްޓިއޭ ބުނީ، މެސީ އެނބުރި ޕީއެސްޖީ އަށް އަންނަނީ އައު އަހަރާއެކު ކަމަށެވެ.

ފްރާންސްގެ މީޑިއާތަކުގައި ރިޕޯޓުކޮށްފައިވާ ގޮތުން ޗުއްޓީ އަށް ފަހު މެސީ މިހާރު ހުރީ ޕެރިސްގަ އެވެ. މެސީ އާއި އޭނާގެ އާއިލާ ޕެރިސް އަށް ގޮސްފައިވަނީ އަންގާރަ ދުވަހުގެ ވަގުތެއްގައި ކަމަަށް ރިޕޯޓުތައް ބުނެ އެވެ. ޕެރިސް އަށް ދިޔުމަށްފަހު މެސީ ދެން އެންމެ އަވަހަށް އޮންނަ ޕީއެސްޖީގެ ފަރިތަކުރުމެއްގައި ބައިވެރިވާނެ ކަމަށް ވެސް މީޑިއާ ރިޕޯޓުތައް ބުނެ އެވެ. ޕީއެސްޖީ އަށް ދެން އެންމެ އަވަހަށް އޮތީ ފްރެންޗް ކަޕް މެޗެކެވެ. ހޮނިހިރު ދުވަހު އޮންނަ އެ މެޗުގައި މެސީ ފެންނާނެ ކަމެއް ޔަޤީނެއް ނޫނެވެ. ސަބަބަކީ މެސީ މުޅިން އަދި ފިޓު ނުވުމާއި، ކުޅުމާ ދުރުގައި ހުންނަތާ 15 ދުވަހަށްވުރެ ގިނަވުމުން ކަމަށް ރިޕޯޓުތައް ބުނެ އެވެ. އެންމެ އަވަހަށް މެސީ ފެންނާނީ ލީގުގައި މި މަހުގެ 12 ވަނަ ދުވަހު އެންޖާސްއާ ދެކޮޅަށް ކުޅޭ މެޗުގައި ކަމަށް ވެސް ރިޕޯޓުތައް ބުނެ އެވެ.

ޕީއެސްޖީގެ ފަރިތަކުރުންތަކަށް މެސީ ހާޒިރުވާއިރު، އެ ޓީމުގެ ބައެއް ކުޅުންތެރިންނަށް ވަނީ ކުޑަ ޗުއްޓީއެއް ދީފައި ކަމަށް ރިޕޯޓުތައް ބުނެ އެވެ. ލީގުގައި އެންމެ ފަހުން ލެންސް އަތުން ޕީއެސްޖީ ބަލިވި މެޗަށްފަހު، ޓީމުގެ ތަރި ކީލިއަން އެމްބާޕޭ އާއި ޑިފެންޑަރު އަޝްރަފް ހަކީމީ މިހާރު ވަނީ ކުޑަ ޗުއްޓީއެއްގައި ކަމަށް ރިޕޯޓުތައް ބުނެ އެވެ. ރިޕޯޓުތައް ބުނާ ގޮތުން ފްރެންޗް ކަޕް މެޗާއި، ލީގުގައި އެންޖާސްއާ ދެކޮޅަށް ކުޅޭ މެޗުގައި މި ދެ ކުޅުންތެރިން ނުފެންނާނެ އެވެ.

ޕީއެސްޖީގައި މި ސީޒަންގައި މެސީ އަންނަނީ މޮޅު ކުޅުމެއް ދައްކަމުންނެވެ. ވޯލްޑް ކަޕަށް ސީޒަން މެދު ކަނޑާލިއިރު، މެސީ ވަނީ ޕީއެސްޖީ އަށް ކުޅެދިން 19 މެޗުން 12 ލަނޑު ޖަހާފަ އެވެ. މީގެ އިތުރުން ޕީއެސްޖީއާއެކު މެސީ ހަދާފައިވާ އެއްބަސްވުން މިއަހަރު ހަމަވާއިރު، އެއްބަސްވުން އައު ކުރުމަށް މެސީ ނިންމާފައިވާ ކަމަށް ރިޕޯޓުތައް ބުނެ އެވެ. ޕީއެސްޖީގެ ކޯޗު ގަލްޓިއޭ ބުނީ މެސީ އެނބުރި ޓީމާ ގުޅޭއިރު، މަރުޙަބާ ކިޔާނެ ކަަމަށެވެ.