މަރުގެ މައްސަލައެއްގެ ތުހުމަތުގައި ނިޒާމު ހައްޔަރުކޮށްފި
3 ޖެނުއަރީ 2023 | އަންގާރަ 10:12ފުލުހުން ބުނި ގޮތުގައި ނިޒާމު ހައްޔަރުކުރީ މަރުގެ މައްސަލައެއްގެ ތުހުމަތުގައި ކޯޓު އަމުރެއްގެ ދަށުން
ގެއްލިގެން ހޯދަމުންދިޔަ ނިޒާމު (ވ) އަދި ހޯދަމުންދާ ބަންގްލަދޭޝްގެ މީހާ
މިދިޔަ ޑިސެމްބަރު މަހުގެ 29 ވަނަ ދުވަހުން ފެށިގެން ތެޔޮ ބޯޓަކުން ގެއްލިގެން ހޯދަމުން ދިޔަ ގދ. ތިނަދޫ، މަނާރު، މުހައްމަދު ނިޒާމު (45 އ) މަރުގެ މައްސަލައެއްގެ ތުހުމަތުގައި ހައްޔަރުކޮށްފިއެވެ.
ފުލުހުން ބުނި ގޮތުގައި ނިޒާމު ހައްޔަރުކުރީ މަރުގެ މައްސަލައެއްގެ ތުހުމަތުގައި ކޯޓު އަމުރެއްގެ ދަށުން އަންގާރަ ދުވަހުގެ ވަގުތެއްގައެވެ. ތެޔޮ ބޯޓެއްގައި ވިލިމާލެއިން ފުރި ދެ މީހަކު ގެއްލިގެން ހޯދަމުންދާ ކަމަށް ފުލުހުން އާއްމުކުރީ ޑިސެމްބަރު 28 ވަނަ ދުވަހުގެ ރެއެވެ. ތެޔޮ ބޯޓުން ގެއްލިގެން ހޯދަމުން ދިޔައީ މުހައްމަދު ނިޒާމުގެ އިތުރުން ބަންގްލަދޭޝްގެ މުހައްމަދު ލިޓަން (35އ) އެވެ.
ފުލުހުން ނިޒާމު ހޯދަމުން ދަނިކޮށް އޭނާ ފެނިފައިވަނީ މާލޭ ގެސްޓްހައުސްއަކުންނެވެ. އޭނާގެ ހާލު ރަނގަޅު ކަމަށް ފުލުހުން ބުނެފައިވެއެވެ. ނަމަވެސް އަދިވެސް ލިޓަން ނުފެނެއެވެ.
ފުލުހުން އެ ދެމީހުން ހޯދަމުން ދަނިކޮށް ވ. ވެންފަރު ފަޅުގެ ހުޅަނގު އުތުރު ކަނޑުން މަރުވެފައި އޮތް މީހެއްގެ ހަށިގަނޑު ހޯމަ ދުވަހު ވަނީ ފެނިފައެވެ. ނަމަވެސް މި މީހާއާ ގުޅޭ އެއްވެސް މައުލޫމާތެއް ފުލުހުން އަދި ހާމަ ކޮށްފައި ނުވެއެވެ.
މި ދެ މީހުން ދަތުރުކުރި ތެޔޮ ބޯޓު ވެލާނާ އިންޓަނޭޝަނަލް އެއާޕޯޓް ކައިރިން އޮޔާ ދަނިކޮށް ފެނިފައިވާ ކަމަށް ފުލުހުން ވަނީ މިދިޔަ އާދީއްތަ ދުވަހު ބުނެފައެެވެ.
