11 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީންގެ މައްޗަށް ރ. ފުއްގިރީގެ ޚިޔާނާތުގެ މައްސަލައިގެ ދައުވާގެ ޝަރީއަތުގެ އަޑުއެހުމެއް އަންގާރަ ދުވަހަށް ތާވަލްކޮށްފިއެވެ.
މި މައްސަލައިގެ އަޑުއެހުމެއް މި ބާއްވަނީ އަހަރެއްހާ ދުވަހުގެ މެދުކެނޑުމަކަށް ފަހުގައެވެ.
ރ. ފުއްގިރި ކުއްޔަށް ދިން މައްސަލައިގެ އަޑުއެހުމެއް ކްރިމިނަލް ކޯޓުގައި ތާވަލްކޮށްފައިވަނީ އަންގާރަ ދުވަހުގެ ހެނދުނު 10:00އަށެވެ. މި މައްސަލައިގައި ރައީސް ޔާމީނާއި އިތުރު ބައެއް މީހުންގެ މައްޗަށް ވަނީ ދައުވާކޮށްފައެވެ. ދައުލަތުން ވަނީ، އެ އެންމެންގެ މައްޗަށް ރިޝްވަތު ގަބޫލު ކުރުމާއި މަނީ ލޯންޑަރިންގގެ ދައުވާކޮށްފައެވެ.
ކްރިމިނަލް ކޯޓުގައި ކުރިން އެ މައްސަލަ ބައްލަވަމުން ގެންދެވީ އިސްގާޒީ އަހްމަދު ޝަކީލެވެ. އެހެންނަމަވެސް ދާދިފަހުން ޝަކީލް ވަނީ އެ މައްސަލައިން ތަނާޒުލްވެފައެވެ. އެއާއެކު އެ މައްސަލަ ހަވާލުކޮށްފައިވަނީ ގާޒީ އަލީ ނަދީމާއެވެ.
މި މައްސަލައަކީ މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) މެދުވެރިކޮށް ފުއްގިރި ކުއްޔަށް ދީގެން ރައީސް ޔާމީން 1.1 މިލިއަން ޑޮލަރު ނަންގަވައި، އެ ފައިސާ ލޯންޑަރ ކުރައްވާފައިވާ ކަަމަށް ތުހުމަތުކޮށް ހުށަހަޅާފައިވާ މައްސަލައެކެވެ. މި މައްސަލައިގައި ރައީސް ޔާމީންގެ އިތުރުން ސަން ކޮންސްޓްރަކްޝަން ކުންފުންޏާއި ސަން އިންވެސްޓްމަންޓް ކުންފުނި، އަދި މއ. ކުރިކީލަހިޔާ އަހުމަދު ކްރިކް ރިޒާގެ މައްޗަށްވެސް ދައުވާކުރެއެވެ.
