ޖެނުއަރީ 1ން ފެށިގެން އެއްގަމާއި ކަނޑުގައި ދުއްވާ އުޅަނދުފަހަރުގެ ފީބަލައިގަންނާނީ ޓްރާންސްޕޯޓް މިނިސްޓްރީގެ ޕޯޓަލް މެދުވެރިކޮށްކަމަށް އެ މިނިސްޓްރީން ބުނެފިއެވެ.

ހޮނިހިރު ދުވަހުގެ ރޭ ޓްރާންސްޕޯޓް މިނިސްޓްރީން ކުރި އިއުލާނެއްގައި ބުނެފައިވަނީ، މޯލްޑިވްސް އިންލަންޑް ރެވެނިއު އޮތޯރިޓީ (މީރާ)އަށް ބަލައިގަންނަމުން ގެންދިޔަ އެއްގަމާއި ކަނޑުގައި ދުއްވާ އުޅަނދުފަހަރުގެ ފީއާއި ޖޫރިމަނާ ފީގެ ފައިސާ އާދީއްތަ ދުވަހުން ފެށިގެން ބަލައިގަންނަމުން ގެންދާނީ އެ މިނިސްޓްރީން ތައްޔާރުކޮށްފައިވާ އޮންލައިން ޕޭމަންޓް ޕޯޓަލް "ސަވާރީޕޭ" pay.transport.gov.mv މެދުވެރިކޮށްކަމަށެވެ.

މި ޕޯޓަލް މެދުވެރިކޮށް އެއްގަމުގެ އުޅަނދުގެ ފީއާއި ކަނޑުގައި ދުއްވާ އުޅަނދުގެ ފީއާއި ޓްރެފިކް އަދި ޕާކިންގ ވަޔަލޭޝަން ޖޫރިމަނާ ދެއްކޭނެއެވެ.

މީރާއިންވެސް ވަނީ، 2023 ވަނަ އަހަރު ފެށުމާއެކު މި ފީތަކާއި ޖޫރިމަނާ ފައިސާ އެ އިދާރާއިން ބަލައިނުގަންނާނެ ކަމަށް ބުނެފައެވެ. އެ އިދާރާއިން ބުނީ، ކުރިއަށް އޮތްތަނުގައި ވެހިކަލްތަކުގެ އަހަރީ ފީއާއި ޖޫރިމަނާ ބަލައިގަންނާނީ ޓްރާންސްޕޯޓް މިނިސްޓްރީގެ ސިސްޓަމް މެދުވެރިކޮށް، އެ އުޅަނދެއް ނިސްބަތްވާ ކައުންސިލަކުން ކަމަށެވެ.

ސަރުކާރުގެ ލާމަރުކަޒީ ސިޔާސަތުގެ ދަށުން އުޅަނދުތަކުގެ އަހަރީ ފީ ކައުންސިލްތަކަށް ޖަމާވާގޮތަށް ފިނޭންސް މިނިސްޓްރީން ވަނީ ހަމަޖައްސާފައެވެ.