އިނގިރޭސި ޕްރިމިއަރ ލީގުގައި ވުލްވްސްއާ ދެކޮޅަށް ކުޅުނު މެޗުން މޮޅުވެ މެންޗެސްޓަރ ޔުނައިޓެޑް ގަދަ ހަތަރަކަށް ޖެހިލައިފިއެވެ.

ވުލްވްސްގެ ދަނޑުގައި ހޮނިހިރު ދުވަހުގެ ރޭ ކުޅުނު މެޗުން ޔުނައިޓެޑު މޮޅުވީ 1-0ންނެވެ. ޔުނައިޓެޑު މޮޅުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން ނުކުތް މާކަސް ރަޝްފޯޑެވެ. އޭނާ ކުޅެން ނުކުމެފައިވަނީ ދެ ވަނަ ހާފުގައެވެ. އެއީ އަލެހާންޑްރޯ ގަނާޗޯގެ ބަދަލުގައެވެ. މެޗުގެ 76 ވަނަ މިނެޓުގައި ރަޝްފޯޑު ލަނޑު ޖެހީ ބްރޫނޯ ފެނާންޑޭޒްގެ އެހީތެރިކަމާއެކުއެވެ. އޭގެ ފަހުން 84 ވަނަ މިނެޓުގައި ރަޝްފޯޑު ވަނީ އިތުރު ލަނޑެއްވެސް ޖަހާފައެވެ. ނަމަވެސް ވީއޭއާރް ބެލުމަށްފަހު ރެފްރީ ވަނީ އެ ލަނޑު ބަލައިނުގަންނަން ނިންމާފައެވެ.

މެޗުން މޮޅުވެ ޔުނައިޓެޑް އޮތީ ތާވަލްގެ ހަތަރު ވަނާގައެވެ. އެއީ އެ ޓީމު ކުޅުނު 16 މެޗުން 32 ޕޮއިންޓާއެކުގައެވެ. ޔުނައިޓެޑުގެ ފަހަތުން، ހަމަ އެ އަދަދަށް މެޗު ކުޅެފައިވާ ޓޮޓެންހަމަށް ލިބެނީ 30 ޕޮއިންޓެވެ.