2022 ވަނަ އަހަރަކީވެސް ކްރިމިނަލް ކޯޓުން ބޮޑެތި މައްސަލަތަކެއް ނިންމާފައިވާ އަހަރެކެވެ.

19 ޖެނުއަރީ 2022 : ޔާމީން ރަޝީދުގެ މަރު: ސިއްރު ހެކިވެރިޔާގެ ކުއްލި ސިޓީ ބަލައިނުގަނެ، ހައިޝަމްއާއި ޒިހާން އުމުރަށް ޖަލަށްލާން ޙުކުމް ކުރި ސަބަބު!

ބްލޮގަރ ޔާމީން ރަޝީދުގެ މަރުގެ މައްސަލައިގައި ޙުކުމް ކުރައްވާފައިވަނީ 19 ޖެނުއަރީ 2022 ގައެެވެ.

މި އަޑުއެހުން ގާތްގަނޑަކަށް 10 ގަޑިއިރަށް ދިގުދެމިގެންގޮސް، މި މައްސަލައިގެ ޙުކުމްކޮށް ނިންމާފައިވަނީ ދައުވާލިބޭ އިސްމާއިލް ހައިޝަމާއި، ހުސައިން ޒިހާންގެ މައްޗަށް ކުށް ސާބިތުވާ ކަމަށާއި، ބާކީ ތިބި 4 މީހުންގެ މައްޗަށް ދައުލަތުން އުފުލާފައިވާ ދައުވާ ސާބިތުނުވާ ކަމަށެވެ.

ވާރިސުންގެ ބަސް ނެގުމަށްފަހު، ތައުޒީރީ އަދަބެއްގެ ގޮތުން އުމުރު ދުވަހުގެ ޖަލު ޙުކުމެއް އެ ދެ މީހުންނަށް ވަނީ އިއްވާފައެވެ. އަދި، ދިޔައިގެ ގޮތުގައި ކޮންމެ މީހަކަށްޖެހޭ 666،666 ރުފިޔާ ޙުކުމް ކުރި ދުވަހުން ފެށިގެން 1 އަހަރު ތެރޭގައި ދައްކާ ޚަލާސް  ކުރުމަށްވެސް ޙުކުމުގައިވެއެވެ. މި މައްސަލަ ނިންމެވީ ގާޒީ އާދަމް މުހައްމަދުއެވެ.

27 ފެބްރުއަރީ 2022 :މަހުމޫދުގެ މަރު: ޝާ އަލޮމް މެރުމަށް ކޯޓުން ހުކުމްކޮށްފި

އދ. ދަނގެތީގެ ވިޔަފާރިވެރިޔާ މަހުމޫދު އަބޫބަކުރުގެ މަރުގެ މައްސަލައިގެ ދައުވާ ލިބޭ, ބަންގްލަދޭޝް ރައްޔިތެއްކަމަށްވާ ޝާ އަލޮމް މިއާގެ މައްޗަށް ކުރާ ދައުވާ ސާބިތުވެފައިވާތީ, އޭނާގެ ކިބައިން މަރަށް މަރު ހިފުމަށް ކްރިމިނަލް ކޯޓުން ޙުކުމް ކޮށްފައިވަނީ 27 ފެބްރުއަރީ 2022 ގައެވެ.

މި މައްސަލައިގެ ތަހުގީގުގައި ޝާ އަލޮމް މިއާ ވަނީ މަހުމޫދު މަރާލިކަމަށް އެއްބަސްވެފައެވެ.

މަހުމޫދުގެ ހުރިހާ ވާރިސުންގެ ހެކިބަސް ނަގާފައިވާއިރު، އެންމެންވެސް ވަނީ މަރަށް މަރު ހިފަން ބޭނުންވާކަމަށް ބުނެފައެވެ.

މި އަޑުއެހުން ކުރިއަށް ގެންގޮސްފައިވަނީ އިސްގާޒީ އަހުމަދު ޝަކީލެވެ.

10 މާރޗު 2022 :ޖައިލަމްގެ މަރުގެ މައްސަލަ: ދައުވާލިބޭ އެންމެން ދައުވާއިން ސަލާމަތްވެއްޖެ

ހ. ހަންޑްރެޑް ފްލާވަރސް, ޖައިލަމް އަހުމަދު ޝާކިރުގެ މަރުގެ މައްސަލާގައި ދައުވާ އުފުލާފައިވާ 4 މީހުންގެ މައްޗަށްވެސް ކުށް ސާބިތުނުވާކަމަށް ކްރިމިނަލް ކޯޓުން ހުކުމް ކޮށްފައިވަނީ 10 މާރޗު 2022 ގައެވެ.

ޖައިލަމްގެ މަރުގެ މައްސަލައިގައި ދައުވާ އުފުލާފައިވަނީ 4 މީހެއްގެ މައްޗަށެވެ. އެއީ ނަސީބު ސައީދު، އިސްމާއިލް އަނީގު، އަލީ އިރުފާން އަދި މުހައްމަދު ހުމައިދުއެވެ.

ހާދިސާ ހިނގިތާ 7 އަހަރުފަހުން މިވަނީ ދައުވާ ލިބޭ އެންމެންގެ މައްޗަށްވެސް ކުށް ސާބިތުނުވާކަމަށް ނިންމައި، މައްސަލަ ވަނީ ނިމިގެން ގޮސްފައެވެ.

ކްރިމިނަލް ކޯޓުގައި މި މައްސަލަ ބެއްލެވީ ގާޒީ އިސްމާއިލް ޝަފީއުއެވެ.

23 މާރޗު 2022 :އިއްސެގެ މަރު: ސުމޮން މެރުމަށް ޙުކުމް ކޮށްފި

ޅ. ހިންނަވަރު އިސްމާއީލް އުމަރު (އިއްސެ) މަރާލި މައްސަލައިގެ ދައުވާ އުފުލާފައިވާ ބަންގްލަދޭޝްގެ ރައްޔިތެއްކަމަށްވާ ސުމޮން މިއާގެ މައްޗަށް ކުށް ސާބިތުވާކަމަށް ކަނޑައެޅީ 23 މާރޗު 2022 ގައެވެ.

މި މައްސަލައިގައި ސުމޮން މިއާގެ މައްޗަށް ކޮށްފައިވަނީ ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ކުށުގެ ދައުވާއެވެ.

ކުށް ސާބިތުވުމާއެކު، އިއްސެގެ ވާރިސުންގެ ހެކި ބަސް ވަނީ ނަގާފައެވެ. އެގޮތުން އިއްސެގެ 3 ވާރިސުން ވެސް ބޭނުންވީ މަރަށް މަރުހިފާށެވެ.

ވުމާއެކު ކްރިމިނަލް ކޯޓުގައި މި މައްސަލަ ބައްލަވާ ގާޒީ, އަލީ އާދަމް ވަނީ ސުމޮން މިއާ މެރުމަށް ހުކުމް ކުރައްވާފައެވެ.

16 ޖޫން 2022 : ދަރިފުޅު މަރާލުމުގެ ކުށް ސާބިތުވި ޝާހިދާއަށް 17 އަހަރުގެ ޖަލު ޙުކުމެއް

ރާއްޖޭގެ އުތުރުގެ ރަށެއްގައި 4 އަހަރުގެ ކުޑަކުއްޖަކު މަރާލި މައްސަލައިގައި އޭނާގެ މަންމަ އާމިނަތު ޝާހިދާގެ މައްޗަށް 17 އަހަރުގެ ޖަލު ޙުކުމެއް އިއްވާފައިވަނީ 16 ޖޫން 2022 ގައެވެ. ކްރިމިނަލް ކޯޓުގައި މި މައްސަލަ ބެއްލެވީ އެ ކޯޓުގެ އިސްގާޒީ އަހުމަދު ޝަކީލެވެ.

ޝާހިދާ އޭނާގެ ދަރިފުޅު މަރާލާފައިވަނީ 2016 ވަނަ އަހަރުގެ ފެބްރުއަރީ މަހުގައެވެ. އެގޮތުން އެ ކުއްޖާގެ އަތާއި، ކޮނޑުހުޅަށް ތޫނު އެއްޗަކުން ވަނީ ހަމަލާ ދީފައެވެ.

31 އޯގަސްޓު 2022 :އަލަމްގިރް 7 މަހާއި 6 ދުވަހަށް ޖަލަށްލާން ހުކުމްކޮށް، ތައުބާ ލައިދީފި

ގިނަ އަދަދެއްގެ ދިވެހިންގެ ބަޔަކާއެކު ބަދުއަޚުލާގީ އަމަލު ހިންގިކަމަށް އިއުތިރާފުވެފައިވާ ބަންގްލަދޭޝްގެ ރައްޔިތެއްކަމަށްވާ އަލަމްގީރް، 7 މަހަށް ޖަލަށްލުމަށް ކްރިމިނަލް ކޯޓުން ހުކުމްކޮށްފައިވަނީ 31 އޯގަސްޓު 2022 ގައެވެ.

އޭގެ ފަހުންވެސް އޭނާގެ މައްޗަށް އިތުރު 40 ދައުވާ އުފުލާފައިވާއިރު، އެ ހުރިހާ ދައުވާއަކަށްވެސް އޭނާ އިއުތިރާފުވެއެވެ.

އޭނާގެ އިތުރުން މި މައްސަލައިގައި ދައުވާ އުފުލި އިތުރު މީހުންގެ މައްޗަށްވެސް ކުށް ސާބިތުވެފައިވެއެވެ. އޭގެ ތެރޭގައި ގާނޫނީ ވަކީލު ނާޒިމް ސައްތާރުގެ އިތުރުން، މި މައްސަލައިގައި ދައުވާ އުފުލި ފުލުސް އޮފިސަރާއި އަދިވެސް އިތުރު ފަރާތްތައް ހިމެނެއެވެ.

14 ނޮވެމްބަރު 2022 :ނަދީމްގެ މަރު: ދައުވާ ލިބޭ އެންމެން ދޫ ވެއްޖެ

ހއ. ތަކަންދޫ އިބްރާހީމީ ހިޔާ، އުމުރުން 23 އަހަރުގެ ނަދީމު ޢަބްދުއްރަޙީމް އަށް ތޫނު އެއްޗަކުން ހަމަލާދީ މަރާލި މައްސަލައިގައި ޙުކުމް ކުރައްވާފައިވަނީ 14 ނޮވެމްބަރު 2022 ގައެވެ.

ގާޒީ ވިދާޅުވީ، މައްސަލައިގައި ހުށައެޅިފައިވާ ހެކިތަކަށް ބަލާއިރު، ސިއްރު ހެކިންގެ ހެކިބަހުގައިވެސް ފުށުއަރާ ކަންކަން ހުރި ކަމަށެވެ. އަދި ސިއްރު ހެކިންތަކެއްގެ ސިޓީއާއެކު އެ ސުވާލުތައް އިތުރުވެގެން ގޮސްފައިވާކަން ގާޒީ ހުސައިން ފާއިޒު ރަޝާދު ފާހަގަ ކުރެއްވިއެވެ.

ވުމާއެކު، މި މައްސަލައިގައި ހުށައެޅިފައިވާ ހެކިތަކާއި ލިއެކިއުންތަކާއި ގުޅުވާލެވޭ ކަންކަމަށް ބަލާއިރު، މި މައްސަލައިގައި ގަސްތުގައި މީހަކު މަރާލުމުގެ ކުށް މުހައްމަދު މަފާޒު ހުސައިންގެ މައްޗަށް ސާބިތުނުވާކަމަށް ވަނީ ޙުކުމް ކުރައްވާފައެވެ.

އޭގެ އިތުރުން ތޫނު އެއްޗެއް ބޭނުންކޮށްގެން ގަސްތުގައި މީހަކު މަރާލުމުގައި ބައިވެރިވި ކަމުގެ ކުށުގެ ދައުވާ އުފުލާފައިވާ ރ. އިންނަމާދޫ ސަމަންތާ, ޙުސައިން ޝާމިންއާއި ގއ. ގެމަނަފުށި ހަވާސް, މުޙައްމަދު ކަރަމް ސުހައިލް, އަދި ލ. ގަން ވިދާތަރި, ޢަލީ ނިފާޒުގެ މައްޗަށް ވެސް ދައުވާތައް ސާބިތުވެފައެއް ނުވެއެވެ.

18 ޑިސެމްބަރު 2022: ޒިޔަދަމްގެ މަރު: ޝަނޫންގެ މައްޗަށް ގަސްތުމަރު އަދި ސިފާމްގެ މައްޗަށް ބައިވެރިވިކަމުގެ ކުށް ސާބިތުވެއްޖެ

ލ. މުންޑޫ، ނޫވިލު، އަލީ ޒިޔަދަމް މަރާލި މައްސަލައިގައި, 7 އަހަރަށްފަހު ކުށް ސާބިތުވާކަމަށް ނިންމާފައިވަނީ 18 ޑިސެމްބަރު 2022 ގައެވެ.

ކްރިމިނަލް ކޯޓުގައި މި މައްސަލައާ ގުޅިގެން ދައުވާ އުފުލާފައިވާ މުޙައްމަދު ޝަނޫން ގެ މައްޗަށް ވަނީ ތޫނު އެއްޗެއް ބޭނުންކޮށްގެން ޤަސްދުގައި މީހަކު މެރުމުގެ ކުށް އެއްވެސް ޝައްކެއް ނެތް މިންވަރަށް ސާބިތުވާކަމަށް ނިންމާފައެވެ.

އެހެންނަމަވެސް، އަލީ ސިފާމްގެ މައްޗަށް އެ ކުށް ސާބިތު ކުރެވޭ މިންވަރަށް ކުށުގެ ރުކުންތައް ދައުލަތުން ސާބިތުކޮށްދެވިފައި ނުވާތީ،  ތޫނު އެއްޗެއް ބޭނުންކޮށްގެން ޤަސްދުގައި މީހަކު މެރުމުގައި ބައިވެރިވުމުގެ ކުށް އެކަށީގެންވާ ޝައްކެއް ނެތް މިންވަރަށް ޝަރީއަތަށް ސާބިތުވާކަމަށް ގާޒީ ނިންމެވީއެވެ.

ދެން އޮންނާނީ މި މައްސަލައިގެ ވާރިސުންގެ ބަސް ނެގުމެވެ. ކްރިމިނަލް ކޯޓުގައި މިހާރު މި މައްސަލަ ބައްލަވަމުން ގެންދަވަނީ ގާޒީ އިސްމާއިލް ޝަފީއުއެވެ. 

25 ޑިސެމްބަރު 2022: އާރަށު ހިޔާނަތް: ޔާމީނު 11 އަހަރަށް ޖަލަށް

ވ އާރަށު ހިޔާނާތުގެ މައްސަލައިގައި ކުރީގެ ރައީސް އަބްދުﷲ ޔާމީނު އަދި ޔޫސުފް ނައީމްގެ މައްޗަށް ކުށް ސާބިތުވާކަމަށް ކަނޑައަޅުއްވައި، މި މައްސަލައިގެ ޙުކުމް ކުރައްވާފައިވަނީ 25 ޑިސެމްބަރު 2022 ގައެވެ.

ޔާމީނަށް ކުރާ މަނީ ލޯންޑަރިންގެ ކުށުގެ ދައުވާގައި 7 އަހަރަށް ޖަލަށް ލުމާއެކު، 5 މިލިއަން ޑޮލަރުން ޖޫރިމަނާ ކުރުމަށް ޙުކުމް ކޮށްފައިވާއިރު، ޔާމީނުގެ މައްޗަށް ކުރާ ރިޝްވަތު ޤަބޫލު ކުރުމުގެ ކުށުގެ ދައުވާ ސާބިތުވެފައިވާކަަމަށް ކަނޑައަޅުއްވައި، 4 އަހަރުގެ ޖަލު ޙުކުމެއް ވަނީ އިއްވާފައެވެ.

އޭގެ އިތުރުން، މި ކުށް ކޮށްފައިވާ ގޮތާއި، މިއީ ދުރާލާ ރާވައިގެން ކޮށްފައިވާ ކުށަކަށްވާތީ، ޔޫސުފް ނައީމްގެ މައްޗަށް 3 އަހަރާއި، 2 މަހާއި 12 ދުވަހުގެ ޖަލު ޙުކުމެއް އިސްގާޒީ އަހުމަދު ޝަކީލު ވަނީ އިއްވަވާފައެވެ.