ކުޑަކުއްޖަކަށް ޖިންސީ ގޯނާ ކުރި މީހަކު 10 އަހަރަށް ޖަލަށް
ޤަޟިއްޔާ ބަލައި ނިޔާ ކަނޑައެޅުއްވީ ޤާޟީ އަލްއުސްތާޛު އާދަމް މުޙައްމަދު
ކްރިމިނަލް ކޯޓް
ކުޑަކުއްޖަކަށް ޖިންސީ ގޯނާ ކުރި މައްސަލައެއްގައި ބ އަތޮޅުގެ ރަށަކުން ހައްޔަރުކުރި މީހެއްގެ މައްޗަށް ކުށް ސާބިތުވެއްޖެއެވެ.
މި މައްސަލައާ ގުޅިގެން ހައްޔަރު ކުރި މީހާގެ މައްޗަށް ދައުވާ އުފުލާފައިވަނީ ޤާނޫނު ނަންބަރު 12/2009 (ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްސަ އުސޫލުތަކަކަށް ޢަމަލުކުރުމުގެ ޤާނޫނު) ގެ 3 ވަނަ މާއްދާގެ (ހ) އާ ޙަވާލާދީ، އެ މާއްދާގެ (ނ) ގެ ދަށުންނެވެ.
ދައުލަތުން އޭނާގެ މައްޗަށް ކޮށްފައިވަނީ ކުޑަކުއްޖެއްގެ ހަށިގަނޑުގައި ޖިންސީ ނިޔަތެއް އޮވެގެން ގަސްދުގައި އަތްލުމުގެ ކުށުގެ ދަޢުވާއެވެ.
އެ ދައުވާއަށް ދައުވާލިބޭ ފަރާތް އިންކާރު ކޮށްފައި ވީނަމަވެސް، ދަޢުވާގައި ބަޔާންކުރާ ވާޤިޢާ އެގޮތުގައި ހިނގާފައި ވާކަމަށް އިޤުތިނާޢުވެވޭ މިންވަރަށް ދައުލަތުން ހެކި ހުށަހަޅާފައިވާކަން ޙުކުމުގައި ފާހަގަކޮށްފައިވެއެވެ.
ވުމާއެކު، އޭނާގެ މައްޗަށް ދައުލަތުން ކުރި ކުޑަކުއްޖެއްގެ ހަށިގަނޑުގައި ޖިންސީ ނިޔަތެއް އޮވެގެން ގަސްދުގައި އަތްލުމުގެ ކުށުގެ ދަޢުވާ، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 51 ވަނަ މާއްދާގެ (އ) ގައި ބަޔާންކުރާ އެކަށީގެންވާ ޝައްކެއް ނެތް މިންވަރަށް ޝަރީޢަތަށް ސާބިތުވާކަމަށް ވަނީ ކަނޑައަޅުއްވާފައެވެ.
އެ ކުށުގެ އުޤޫބާތެއްގެ ގޮތުން، ޤާނޫނު ނަންބަރު 12/2009 (ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްސަ އުސޫލުތަކަކަށް ޢަމަލުކުރުމުގެ ޤާނޫނު) ގެ 3 ވަނަ މާއްދާގެ (ހ) އާ ޙަވާލާދީ، އެ މާއްދާގެ (ނ) ގެ ދަށުން އޭނާ 10 އަހަރު ދުވަހަށް ޖަލަށްލުމަށް ވަނީ ޙުކުމް ކުރައްވާފައެވެ.
ޖިނާއީ އިޖުރާއަތުގެ ޤާނޫނުގެ 186 ވަނަ މާއްދާއަށް ރިޢާޔަތްކޮށް، އޭނާ މި މައްސަލައިގެ ތަޙުޤީޤް މަރުޙަލާ އާއި ޝަރީޢަތުގެ މަރުޙަލާގައި ބަންދުގައި ހޭދަކުރި 02 އަހަރާއި، 6 މަހާއި 6 ދުވަސް އޭނާގެ މައްޗަށް ކަނޑައެޅުނު ޖަލު އަދަބުން ވަނީ އުނިކޮށްފައެވެ. ވުމާއެކު، މި ދަޢުވާއާ ގުޅިގެން ތަންފީޒު ކުރަންޖެހޭ އަދަބަކީ 07 އަހަރާއި 05 މަހާއި 24 ދުވަހުގެ ޖަލު ޙުކުމެކެވެ.
މި ޤަޟިއްޔާ ބަލައި ނިޔާ ކަނޑައެޅުއްވީ ޤާޟީ އަލްއުސްތާޛު އާދަމް މުޙައްމަދުއެވެ.
