މާލީ ރިޕޯޓު ހުށަނާޅާތީ 7 ޕާޓީއެއް ޖޫރިމަނާކޮށްފި
30 ޑިސެމްބަރު 2022 | ހުކުރު 02:11އީސީން ބުނީ މިއިން ކޮންމެ ޕާޓީއެއް ވިހިހާސް ރުފިޔާ އިން ޖުރުމަނާކޮށް އެކަން އެޕާޓީތަކަށް އަންގާފައިވާކަމަށް
އިލެކްޝަންސް ކޮމިޝަންގެ ބައެއް މެންބަރުން
މާލީ ރިޕޯޓް ހުށަހަޅަންޖެހޭ ގޮތަށް، ހުށަހަޅަންޖެހޭ ތާރީޚަށް އިލެކްޝަންސް ކޮމިޝަން (އީސީ)އަށް ހުށަހަޅާފައި ނުވާތީ، ހަތް ސިޔާސީ ޕާޓީއެއް ޖޫރިމަނާކޮށްފިއެވެ.
އެކަމާއި ގުޅިގެން އީސީން ބުނީ ޖޫރިމަނާކޮށްފައިވާ ހަތް ޕާޓީއަކީ ސަރުކާރު ކޯލިޝަންގައި ހިމެނޭ ހޯމް މިނިސްޓަރު އައްޝެއިޚް އިމްރާން އަބްދުﷲގެ އަދާލަތު ޕާޓީ އާއި ކުރީގެ ރައީސް މައުމޫން އަބްދުލްޣައްޔޫމްގެ މޯލްޑިވްސް ރިފޯމް މޫވްމަންޓް(އެމްއާރުއެމް)އެވެ. އަދި މިހާރު ސަރުކާރާއި އިދިކޮޅު ޕާޓީއެއްގެ ގޮތުގައި މަސައްކަތްކުރާ ދަނގެތި ދާއިރާގެ މެންބަރު މުހައްމަދު ނާޒިމްގެ މޯލްޑިވްސް ނޭޝަނަލް ޕާޓީ(އެމްއެންޕީ) އާއި ކާށިދޫ ދާއިރާގެ މެންބަރު އަބްދުﷲ ޖާބިރުގެ ޑީއާރުޕީ އާއި އިދިކޮޅު ޕީއެންސީ އެވެ. މީގެއިތުރުން އެމްއެސްއެލްޑީޕީ އާއި ކުރީގެ ނައިބު ރައީސް އަހުމަދު އަދީބުގެ މޯލްޑިވްސް ތަރޑްވޭ ޑިމޮކްރަޓްސް (އެމްޓީޑީ) އެވެ.
އީސީން ބުނީ މިއިން ކޮންމެ ޕާޓީއެއް ވިހިހާސް ރުފިޔާ އިން ޖުރުމަނާކޮށް އެކަން އެޕާޓީތަކަށް އަންގާފައިވާކަމަށެވެ.
ސިޔާސީ ޕާޓީގެ ގާނޫނުގައި ބުނެފައިވަނީ އެއްވެސް ޕާޓީއަކުން ޤާނޫނާ އެއްގޮތަށް ހިސާބުގެ ލިޔެކިޔުންތައް ބަލަހައްޓާފައިނުވާނަމަ، ނުވަތަ ޤާނޫނުގެ ދަށުން ކޮމިޝަނަށް ހުށަހަޅަންޖެހޭ އެއްވެސް މާލީ ރިޕޯޓެއް ހުށަހަޅާފައިނުވާނަމަ، ވިހިހާސް ރުފިޔާ އާއި ފަންސާސް ހާސް ރުފިޔާއާ ދެމެދުގެ ޢަދަދަކުން އެ ޕާޓީއެއް ޖޫރިމަނާ ކުރުމުގެ ބާރު ކޮމިޝަނަށް ލިބިގެންވާކަމަށެވެ.
މީގެކުރިންވެސް މާލީ ރިޕޯޓް ހުށަނާޅައިގެން އީސީން ސިޔާސީ ޕާޓީތައް ޖޫރިމަނާކޮށްފައިވެއެވެ.
