އީސީގެ ދެ އިމާރާތަކުން ވައްކަންކުރުން: ވަގަށް ނެގި ތަކެތީ އަގު ގާތްގަނޑަކަށް ދޮޅުލައްކަ ރުފިޔާއަށް އަރާ
ފުލުހުން އަންނަނީ އެ މައްސަލަތައް ބަލަމުން
އިލެކްޝަންސް ކޮމިޝަން
އިލެކްޝަންސް ކޮމިޝަން(އީސީ)ގެ ސެކިޔުރިޓީ ރޫމަށް އިމާރާތުގެ ބޭރުން ވަދެ ފަޅާލައި، އަރަބިއްޔާ ސްކޫލްގެ ބައު އިމާރާތުގައި ހުންނަ އީސީގެ ގުދަނެއް ފަޅާލައިގެން ވަގަށް ނެގި ތަކެތީ އަގު ގާތްގަނޑަކަށް ދޮޅުލައްކަ ރުފިޔާއަށް އަރާކަމަށް އިލެކްޝަންސް ކޮމިޝަނުން ބުނެފިއެވެ.
އިލެކްޝަން ކޮމިޝަން (އީސީ)ގެ ނައިބު ރައީސް އިސްމާއީލް ހަބީބް "ރާއްޖެ އެމްވީ"ން ދެންނެވި ސުވާލަކަށް ޖަވާބުދެއްވަމުން ވިދާޅުވީ، އިލެކްޝަންސް ކޮމިޝަން ހުންނަ އިމާރާތުގައި ހުންނަ އީސީގެ ސެކިޔުރިޓީ ރޫމް ފަޅާލުމާއި އަރަބިއްޔާ ސްކޫލްގެ ބައު އިމާރާތުގައި ހުންނަ އީސީގެ ގުދަނެއް ހިންގި ވައްކަމުގެ ތަހުގީގު އަދިވެސް ކުރިއަށްގެންދާ ކަމަށެވެ. އެ ދެ އިމާރާތުގެ ތެރެއިން ނޮވެމްބަރ 30 ވަނަ ދުވަހު ވައްކަންކޮށްފައިވާ އީސީގެ ސެކިއުރިޓީ ރޫމަކީ އެންމެ ރަނގަޅަށް އެ ކޮމިޝަނުން ބަލަހައްޓަމުން އަންނަ އެއް ތަން ކަަމަށް ކޮމިޝަނުން ބުނެއެވެ.
އީސީން ބުނީ އެއިން ތަނެއްގައި އިންތިޚާބަކާ ގުޅުންހުރި ލިޔެކިޔުމެއް، އަދި އިންތިޚާބަކާ ގުޅުންހުރި އެއްވެސް މަސައްކަތެއް ކުރިއަށްނުދާކަމަށެވެ. އެހެންނަމަވެސް ނިމިދިޔަ ލޯކަލް ކައުންސިލް އިންތިޚާބުގައި ބޭނުންކޮށްފައިވާ 5 ނެޓްބުކް ނަގައި އެތަނުގައި ހުރި އެއްވެސް އެއްޗެއް އަޅާފައި ނެތް ބައު ތިޖޫރީއަކަށް ގެއްލުންދީފައިވާކަމަށް އީސީން ބުނެއެވެ. ސެކިއުރިޓީ ރޫމަށް ވަދެފައިވަނީ އެ އިމާރާތުގެ ބިއްދޮށު ދޮރާށިން ކަމަށާއި، އެތަނަށް ވަތްކަމަށް ބެލެވެނީ ފަހަތުގައި އޮތް ހުސްބިމަށް ވަދެގެން ކަމަށް އެ ކޮމިޝަނުން ވަނީ ބުނެފައެވެ.
އޭގެ ފަހުން ކުރީގެ އަރަބިއްޔާ ހުރި އިމާރާތުގައި ހުންނަ އީސީގެ ގުދަން ފަޅާލީ ޑިސެމްބަރ 10 ވަނަ ދުވަހު ކަމަށާއި، އަރަބިއްޔާގެ ބައު އިމާރާތުން 11 ޔޫޕީއެސްއާއި 65 އިންޗީގެ ދެ ޓީވީއާއި 2 ސްޕީކަރު ސެޓާއި 10 މީޓަރުގެ ކަރަންޓު އެކްސްޓެންޝަން ބޯޑެއް ގެންގޮސްފައިވާކަމަށް އެ ކޮމިޝަނުން ބުނެއެވެ. އެ އިމާރާތުގެ 12 ކްލާސްރޫމްގައި އެ ކޮމިޝަންގެ މުދާތައް ބަހައްޓާފައިވާކަމަށް އީސީން ބުނެެއެވެ.
ފުލުހުން އަންނަނީ އެ މައްސަލަތައް ބަލަމުންކަމަށާއި، މައްސަލައާ ގުޅުންހުރި ސީސީޓީވީ ފުޓޭޖް ފުލުހުންނަށް ހުށަހަޅާފައިވާކަމަށް ކޮމިޝަނުން ވަނީ ބުނެފައެވެެ.
