މާލެ ކުނިކެހުމުގެ މަސައްކަތް ދެ ޝިފްޓަކަށް، 24 ގަޑިއިރު ކުނިނެގުމުގެ މަސައްކަތް ސިޓީ ކައުންސިލުން ކުރާނެ
29 ޑިސެމްބަރު 2022 | ބުރާސްފަތި 02:17މިމަސައްކަތަށް އިތުރު މީހުން ކުރިޔަށް އޮތް 10 ދުވަސްތެރޭގައި ނަގާނެ
މާލެ ސިޓީ ކައުންސިލްގެ މޭޔަރު ޑރ. މުހައްމަދު މުއިއްޒު
މާލެއާއި ވިލިމާލެ މަގުތަކުންނާއި ގޯޅިތަކާއި ޕާކުތައް އަދި މައިޒާންތަކުން ކުނިކަހައި ސާފުކޮށް، ކުނި ނެގުމުގެ މަސައްކަތް މާލެ ސިޓީ ކައުންސިލުން ފަށާފައިވާއިރު މާލެ ތެރެ ކުނިކަހައި ސާފުކުރުމުގެ މަސައްކަތް ކޮންމެ ދުވަހަކު ދެ ޝިފްޓަކަށް ބަހާލައިގެން ކުރާނެކަމަށް މާލެ ސިޓީގެ މޭޔަރު ޑރ މުހައްމަދު މުއިއްޒު ވިދާޅުވެއްޖެއެވެ.
މާލޭގެ އާންމު ތަންތަނުން ކުނި ނަގަން ވެމްކޯއާއެކު ވެފައިވާ އެއްބަސްވުން މިމަހުގެ 25ވަނަ ދުވަހު ހަމަވުމުން، އެ އެއްބަސްވުން އައުނުކޮށް އެ މަސައްކަތް ސިޓީ ކައުންސިލުން ކުރާގޮތަށް ވަނީ ނިިންމާފައެވެ. އެކަމާއި ގުޅިގެން ސިޓީ ކައުންސިލުން ވަނީ މާލެއާއި ވިލިމާލެ ކުނިކަހާނެ މަސައްކަތު މީހުން ހޯދަން އިއުލާންކޮށްފައެވެ. އެގޮތުން ވިލިމާލެއަށް 28 މީހުންނާއި މާލެއަށް 80 މީހުންނާއެކު ޖުމްލަ 108 މީހުން ހޯދަން އެ ކައުންސިލުން އިއުލާންކުރިއެވެ. އަދި ކައުންސިލުން ކުނި ނެގުމުގެ މަސައްކަތް ޑިސެމްބަރު 27 ވަނަ ދުވަހުގެ ރޭ ވަނީ ފަށާފައެވެ.
އެމަސައްކަތާއި ގުޅޭގޮތުން މޭޔަރު މުއިއްޒު ބޭއްވި ނޫސްވެރިންގެ ބައްދަލުވުމުގައި ވިދާޅުވީ މިމަސައްކަތަށް އިތުރު މީހުން ކުރިޔަށް އޮތް 10 ދުވަސްތެރޭގައި ނަގާނެކަމަށެވެ. އެގޮތުން މާލެއަށް ޖުމްލަ 120 މީހުން ނަގަން ނިންމާފައިވާކަމަށް މޭޔަރު ވިދާޅުވިއެވެ. ކުނިކަހާ މީހުން ހޯދުމަށް ހުޅުވާލުމުން 400 އެޕްލިކޭޝަން ލިބުނުކަމަށް މޭޔަރު ވިދާޅުވިއެވެ. އަދި އޭގެތެރޭގައި ކުރީގައި ވެމްކޯގައި ކުނި ކެހުމުގެ މަސައްކަތުގައި އުޅުނު މީހުންވެސް ހިމެނޭކަމަށް މޭޔަރު ވިދާޅުވިއެވެ.
މާލެ ސިޓީ ކައުންސިލުން މާލެތެރެ ކުނިކަހާ ސާފުކުރުމުގެ މަސައްކަތް ކުރަނީ މާލެ 16 ޒޯނަކަށް އަދި ވިލިމާލެ 4 ޒޯނަކަށް ބަހާލައިގެންކަމަށް މޭޔަރު ވިދާޅުވިއެވެ. މާލޭގައި ކޮންމެ ޒޯނަކަށް ޓީމެއް ހަމަޖައްސާފައިވާއިރު އެއިން ކޮންމެ ޒޯނަކަށް ސްޕަވައިޒަރެއް ހުންނާނެއެވެ. އަދި ކޮންމެ 4 ޒޯނަކުން ސީނިއަރ ލެވެލްގެ ސްޕަވައިޒަރެއް އަދި އޮޕަރޭޝަން ލެވެލްގައި މެނޭޖަރެއް ހުންނާނެއެވެ. މުޅި އޮޕަރޭޝަން ބެލެހެއްޓުމަށް ހެޑް އިންޗަރޖެއް ހުންނާނެއެވެ.
ކުނި ކެހުމުގެ މަސައްކަތް ރޭގަނޑު 10ން ހެނދުނު 6ށް އަދި ހެނދުނު 6ން މެންދުރު 12ށް ކުރިޔަށްދާނެއެވެ. މީގެއިތުރުން މަގުމަތީގައި ބަހައްޓާފައި ހުންނަ ކުނި ނެގުމުގެ މަސައްކަތްކުރުމަށް ސިޓީ ކައުންސިލުގެ މުވައްޒަފުން 24 ގަޑިއިރު މަސައްކަތްކުރާނެއެވެ. މޭޔަރު ވިދާޅުވީ މިހާރު ކުނި ނެގުމުގެ މަސައްކަތުގައި 10 ލޮރީ އޮޕަރޭޓްކުރާކަމަށާއި އަންނަ އަހަރުގެ ބަޖެޓްގައި އިތުރު 10 ޕިކަޕް ހޯދުމަށް ހިމަނާފައިވާނެކަމަށެވެ.
މޭޔަރު ވިދާޅުވީ ރައްޔިތުންގެ އެއްބާރުލުމާއެކު މާލެ ސިޓީއަކީ ސާފުތަނެއްގެ ގޮތުގައި ބޭއްވޭނެކަމަށެވެ.
