2023 ވަނަ އަހަރުން ފެށިގެން ވެހިކަލްތަކުގެ އަހަރީ ފީއާއި ޖޫރިމަނާ މީރާއިން ބަލައިނުގަންނާނެ
27 ޑިސެމްބަރު 2022 | އަންގާރަ 09:59އައު ސިޔާސަތު ބުނާގޮތުން 2023 އިން ފެށިގެން އަހަރީ ފީ ބަލައިގަންނާނީ ކައުންސިލްތަކުން
މީރާ
2023 ވަނަ އަހަރުން ފެށިގެން ވެހިކަލްތަކުގެ އަހަރީ ފީއާއި ޖޫރިމަނާ މީރާއިން ބަލައިނުގަންނާނެކަން އެއޮތޯރިޓީން ހާމަކޮށްފިއެވެ.
މީރާއިން ނެރެފައިވާ އިއުލާނެއްގައި ވާގޮތުން ކުރިއަށް އޮތް އަހަރުގެ ޖެނުއަރީ މަހުގެ 1 ވަނަ ދުވަހުން ފެށިގެން އެއްގަމު އުޅަނދާއި ކަނޑު އުޅަނދުގެ އަހަރީ ފީ ބަލައިގަންނާނީ މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނުން އެކުލަވާލާފައިވާ ސިސްޓަމް މެދުވެރިކޮށެވެ. އެ އިއުލާންގައި ބުނެފައިވަނީ ކުރިއަށް އޮތްތަނުގައި ވެހިކަލްތަކުގެ އަހަރީ ފީއާއި ޖޫރިމަނާ ބަލައިގަންނަނާނީ އެ ސިސްޓަމް މެދުވެރިކޮށް، އެ އުޅަނދެއް ނިސްބަތްވާ ކައުންސިލަކުން ކަމަށެވެ. ސަރުކާރުގެ ލާމަރުކަޒީ ސިޔާސަތުގެ ދަށުން އުޅަނދުތަކުގެ އަހަރީ ފީ ކައުންސިލްތަކަށް ޖަމާވާގޮތަށް ފިނޭންސް މިނިސްޓްރީން ވަނީ ހަމަޖައްސާފައެވެ.
އެ ބަދަލައި ގުޅިގެން ކުރިއަށް އޮތްތަނުގައި މީރާއިން އެއްގަމު އުޅަނދާއި ކަނޑު އުޅަނދުގެ އަހަރީ ފީއާއި، ސުންގަޑިއަށް އަހަރީ ފީ ނުދެއްކުމުން ވާ ޖޫރިމަނާގެ ފައިސާ އަދި ޕާކިން އާއި ޓްރެފިކް ވަޔަލޭޝަނާ ގުޅިގެން ކުރާ ޖޫރިމަނާ ބަލައިގަތުން ހުއްޓާލާނެއެވެެ. މީގެ ކުރިން އޮންލައިން ޕްލެޓްފޯމް ވާރުޕޭ މެދުވެރިކޮށް އޮންލައިންކޮށް އެ ފީތައް ދައްކާލެވެއެވެ.
