މިއަދު ނެތި ދާ ގަސްގަހާގެއްސަކީ ކެންސަރާއި ކޮވިޑްގެ މާދަމާގެ ފަރުވާއަށްވެސް ވެދާނެއެވެ.

އަހަރަމެން އިންސާނުންނަކީ ކެއިންބުއިމަށާއި، އުނުއަންނާނެ ފޭރާން ހޯދުމަށާއި، ބޯހިޔާވަހިކަން ހޯދުމުގެ އިތުރުން ބޭސްވެރިކަމުގެ ރޮނގުން ބެލި ކަމުގައި ވީ ނަމަވެސް ގަސްގަހާގެހީގެ މައްޗަށް އިންތިހާއަށް ބަރޯސާވާ ބައެކެވެ. ނަމަވެސް، ދުނިޔޭގެ އެކި ކަންކޮޅުތަކަށް ފެތުރިފައި ވާ 400000 އަށް ވުރެ ގިނަ ބާވަތުގެ ގަސްގަހާގެހީގެ މައުލޫމާތު، އަހަރަމެންނަށް އެނގެނީ ކިހާ ވަރަކަށް ތޯ، ޚުދު އަމިއްލަ ނަފުސާވެސް ސުވާލު ކޮށްލަބަލާށެވެ.

ޖަނަވާރުތަކާއި ޚިލާފަށް، ގަސްގަހާގެހީގެ ފިޔަވަޅުތިޔަ ބަލަމުން ދިއުމުގެ ފުރުޞަތެއް ނޯވެއެވެ. ނުވިތާކަށް ޖަންގައްޔެއްގެ ތެރެއަށް ވަދެ، ވަކި ރާގަކަށް ތުނބުން ފުމެލުމުން އިޖާބަ ދާ ގަހެއްވެސް ނުހުރެއެވެ. ނަތީޖާއަކަށް ވަނީ، ބައެއް ކަހަލަ ގަސްތައް ނެތިދާކަން، ވަގުތު ފާއިތުވުމުގެ ކުރިން ރެއަކާވެސް ނުލުމެވެ.

ރޯޔަލް ބޮޓޭނިކް ގާޑަންސް (އާރްބީޖީ) ކިއުގެ ކޮންޒަރވޭޝަން ޕޮލިސީ ލީޑް، ޑރ ކަރލީ ކޯވެލް ވިދާޅުވާ ގޮތުގައި، ގަސްގަހާގެއްސަށް އޮތް އެންމެ ބޮޑު ނުރައްކަލަކީ، ދުނިޔޭގެ ބިން ބޭނުން ކުރަމުންދާ ދިއުމަށް އައި ބަދަލުތަކެވެ.

އަދުގެ ދުނިޔޭގެ ހާލަތަށް ބަލާއިރު، ބާކީ ހުރި ޖަންގަލިތަކާއި ގަސްބޯ ސަރަޙައްދުތައް މިހާރުވެސް ދަނީ އިންސާނީ އެކި ބޭނުންތަކަށް ކޮށާ ސާފު ކުރަމުންނެވެ. ބައެއް ފަހަރު ނާމްސޫފި ގެންގުޅުމަށެވެ. އަނެއް ބައި ފަހަރު މާސިންގާ ދަނޑުބިންތައް ހެއްދުމަށެވެ. ނުވަތަ ޢުމްރާނީ ތަރައްޤީގެ ކޮންމެވެސް މަޝްރޫއަކަށެވެ.

ކިއުއިން އާންމު ކޮށްފައި ވާ 2020 ސްޓޭޓް އޮފް ދަ ވަރލްޑްސް ޕްލާންސްޓް އެންޑް ފަންގާއި ރިޕޯޓް ބުނާ ގޮތުގައި، ދުނިޔޭގައި މިވަގުތު ހުރި ގަސްގަހާގެހީގެ ބާވަތްތަކުގެ ތެރެއިން 40 ޕަސެންޓް ދިރުންތައް ވަނީ ނުރައްކަލެއްގެ ތެރޭގައެވެ. އަދި ބާވަތެއް މުޅިން ނެތި ދިއުމުގެ ނިސްބަތް އުޅެނީ، 500 ގުނަ މަތީގައި ކަމަށްވެސް އެ ރިޕޯޓް ބުނެއެވެ.

ނެތި ދިއުމުގެ ބިރު ހީވެފައިވާ ގަސްގަހާގެހީގެ ބާވަތްތަކާއި އޮށުގެ މުޑުވައްތައް، ގިނަ ދުވަހަށް ރައްކާ ކުރުމަށްޓަކާ، އެކަމަށް ހާއްސަ ލެބޯޓްރީތަކުގައި ސައެންސްވެރިން ފަރުވާތެރިކަމާއެކު މަސައްކަތް ކުރަމުން ދާތާ މިހާރު އަހަރުތަކެއް ވެއްޖެއެވެ. ސައެންސްވެރިން ބުނާ ގޮތުގައި، މި ވަގުތަކީ، މިހާރު ލިބެން ހުރި ވަޞީލަތްތައް ބޭނުންކޮށްގެން، ދެން އަންނަން އޮތް ކަމަކަށް ތައްޔާރު ވާންވީ ވަގުތެވެ.

ކިއުގެ ސީނިއަރ ރިސާޗަރެއް ކަމަށް ވަ ޑރ ކޮލީން ކްލަބް ވިދާޅުވީ، ވަކި ކަހަލަ ގަސްގަހާގެއްސަށް ހާއްސާ ވެށިން ބޭރުގައިވެސް އެ ގަސްތައް ދިރުވާ އާލާ ކުރުމުގެ މަޝްވަރާތައް، މިހާރުވެސް ސައެންސްވެރިން ކުރަމުން ދާ ކަމަށެވެ.

ދުނިޔެއިން ނެތެމުން ދާ ގަސްގަހާގެހީގެ އާބާދީ ހިމާޔަތް ކުރުމަށް، ބައިނަލްއަޤުވާމީ ލީޑަރުންވެސް ގެންދަވަނީ މަސައްކަތްޕުޅުތަކެއް ކުރައްވަމުންނެވެ. އެގޮތުން، ކޮންމެ ޤައުމަކަށްވެސް ލިބިފައި ވާ ބިމުގެ ސަރަޙައްދުން 30 ޕަސެންޓް، ކުރިއަށް އޮތް 7 އަހަރު ދުވަހަށް ރައްކާތެރިކަމާއެކު ހިމާޔަތް ކޮށްފައި ބޭއްވުމަށް، ބައިނަލްއަޤުވާމީ ފެންވަރުގައި ފުރިހަމަ އެއްބަސްވުމެއް އެކުލަވާލުމަށް، ދުނިޔޭގެ ލީޑަރުން ގެންދަވަނީ މަސައްކަތްޕުޅު ކުރައްވަމުންނެވެ. ގަސްގަހާގެހި ހިމާޔަތްކޮށް، ދިރުންތައް ނެތި ދިޔަ ނުދީ ސަލާމަތް ކުރެވޭތޯ މަސައްކަތް ކުރުމަކީ، ފަރުދީ ފެންވަރުގައި އުފުލަން ޖެހިފައި އޮތް ޒިންމާއެކެވެ.