ފީފާ ވޯލްޑް ކަޕަށްފަހު އިނގިރޭސި ޕްރިމިއާ ލީގުގައި ލިވަޕޫލް ކުޅުނު ފުރަތަމަ މެޗުން މޮޅުވެ، ހަމަޖެހުމެއް ހޯދައިފި އެވެ.

ލީގުގައި ހޯމަ ދުވަހުގެ ރޭ އެސްޓަން ވިލާގެ ދަނޑުގައި ކުޅުނު މެޗުން ލިވަޕޫލް މޮޅުވީ 3-1 އިންނެވެ. މެޗުގައި ލިވަޕޫލުން ލީޑު ނެގީ ފަސް ވަނަ މިނެޓުގަ އެވެ. އެއީ ޑިފެންޑަރު އެންޑީ ރޮބާޓްސަން ތަނަވަަސްކޮށްދިން ފުރުސަތެއްގައި މިޞްރު ފޯވާޑް މުޙައްމަދު ޞަލާޙު ޖެހި ލަނޑުންނެވެ. ރޮބާޓްސަންގެ އެސިސްޓާއެކު އޭނާ ވެގެން ގޮސްފައިވަނީ ޕްރިމިއާ ލީގުގެ ތާރީޚުގައި ވެސް އެންމެ ގިނަ އެސިސްޓުކޮށްދިން ޑިފެންޑަރަށެވެ. ރޮބާޓްސަން ވަނީ މިހާތަނަށް 54 ލަނޑު ޖެހުމަށް އެހީތެރިވެދީފަ އެވެ. މީގެ ކުރިން މި ރެކޯޑު އޮންނަނީ 53 ލަނޑު ޖެހުމަށް އެހީތެރިވެދިން ލެއިޓަންސް ބެއިންސް އަތުގަ އެވެ. ފުރަތަމަ ހާފު ނިމުމުގެ ކުރިން ލިވަޕޫލުން ވަނީ ދެ ވަނަ ލަނޑު ޖަހައި ލީޑު ފުޅާކޮށްފަ އެވެ. މެޗުގެ 37 ވަނަ މިނެޓުގައި އެ ޓީމަށް ލީޑު ފުޅާކޮށްދިނީ ޑިފެންޑަރު ވާޖިލް ވެންޑައިކް އެވެ. އޭނާ އެ ލަނޑު ޖަހާފައިވަނީ ފުރަތަމަ ލަނޑު ޖެހައިދިން ޞަލާޙު ތަނަވަސްކޮށްދިން ފުރުސަތަކުންނެވެ. ލިވަޕޫލުން ފުރަތަމަ ހާފު ނިންމާލީ ދެ ލަނޑުގެ ލީޑަކާއެކު އެވެ.

ދެ ވަނަ ހާފަށް ނިކުމެ އެސްޓަން ވިލާ އިން ވަނީ ލަނޑެއް ޖަހައި، ފަރަގު ކުޑަކޮށް، އުންމީދެއް ހޯދާފަ އެވެ. މިޑްފީލްޑަރު ޑަފްލަސް ލުއިޒް ތަނަވަސްކޮށްދިން ފުރުސަތަކުން މެޗުގެ 59 ވަނަ މިނެޓުގައި އެސްޓަން ވިލާ އަށް ލަނޑު ޖަހައިދިނީ އޮލީ ވަޓްކިންސް އެވެ. ލިވަޕޫލުން ވަނީ މެޗުގެ ފަހު 10 މިނެޓުގައި ލަނޑެއް ޖަހައި، ލީޑު އިތުރަށް ފުޅާކޮށްފަ އެވެ. ލިވަޕޫލްގެ ތިން ވަނަ ލަނޑު ޖަހައިދިނީ ބަދަލު ކުޅުންތެރިޔެއްގެ ގޮތުގައި ކުޅެން ނިކުން މިޑްފީލްޑަރު ސްޓެފަން ބަސެޓިކް އެވެ.

މި މޮޅާއެކު ލިވަޕޫލް ވަނީ ލީގު ތާވަލްގެ ހަ ވަނަ އަށް ޖެހިލައިފަ އެވެ. އެއީ ލީގުގައި ކުޅުނު 15 މެޗުގައި 25 ޕޮއިންޓު ހޯދައިގެންނެވެ. ހަތް ވަނައިގައި އޮތް ބްރައިޓަން އަށް ލިބެނީ 24 ޕޮއިންޓެވެ. ލިވަޕޫލް އަތުން ބަލިވި އެސްޓަން ވިލާ އޮތީ އެ ޓީމު ކުޅުނު 16 މެޗުން 18 ޕޮއިންޓާއެކު ލީގުގެ 12 ވަނައިގަ އެވެ.