އިނގިރޭސި އެފްއޭކަޕް: ބޮޑު މޮޅަކާއެކު ޓޮޓެންހަމް ކުއާޓާއަށް

އިނގިރޭސި އެފްއޭ ކަޕްގައި ކުޅުނު މެޗުން ތަފާތު ބޮޑު ނަތީޖާއަކުން މޮޅުވެ ޓޮޓެންހަމްއިން ކުއާޓާ ފައިނަލްގެ ޖާގައެއް ކަށަވަރު ކޮށްފިއެވެ.

އިނގިރޭސި ތިންވަނަ ޑިވިޝަނުގެ ޓީމެއް ކަމަށްވާ ރޯޗްޑޭލްއާ ދެކޮޅަށް ވެމްބްލީ ސްޓޭޑިއަމްގައި ކުޅުނު މެޗުން ޓޮޓެންހަމް މޮޅުވީ 6-1 ގެ ތަފާތު ބޮޑު ނަތީޖާއަކުންނެވެ. ޓޮޓެންހަމްގެ ފުރަތަމަ އެގާރައިން ބޮޑެތި ބަދަލުތަކެއް ފެނިގެންދިޔަ މި މެޗުގައި އެ ޓީމުން ވަނީ ރަނގަޅު ކުޅުމެއް ދައްކާފައެވެ.

މި މެޗުގެ ހަތްވަނަ މިނެޓުގައި އެރިކް ލަމޭލާ ޓޮޓެންހަމްއަށް ލަނޑެއް ޖަހައިދީ ލީޑު ނަގައިދިން ނަމަވެސް ވީޑިއޯ ރިޕްލޭ ބެލުމަށް ފަހު ރެފްރީ ވަނީ އެއީ ލަނޑެއްގެ ގޮތުގައި ބަލައިގަނެވެން ނެތް ކަމަށް ނިންމާފައެވެ. މެޗުގެ 23 ވަނަ މިނެޓުގައި ފުރަތަމަ ލަނޑު ޖަހައި ޓޮޓެންހަމްއަށް ލީޑު ނަގައިދިނީ ދެކުނު ކޮރެއާގެ ފޯވާޑް ހެއުން މިން ސޮންއެވެ. އެހެން ނަމަވެސް މެޗުގެ 31 ވަނަ މިނެޓުގައި ސްޓެފަން ހަމްފްރީސް ވަނީ ރޯޗްޑޭލްއަށް ލަނޑެއް ޖަހައިދީ ނަތީޖާ ހަމަހަމަ ކޮށްދީފައެވެ. ފުރަތަމަ ހާފު ނިމެން ދަނިކޮށް ޓޮޓެންހަމްއިން ވަނީ ލީޑު ނެގުމަށް ރަނގަޅު ފުރުސަތުތަކެއް ތަނަވަސްކުރި ނަމަވެސް އެ ޓީމަށް މި ފުރުސަތުތަކުގެ ބޭނުން ހިފިފައެއް ނުވެއެވެ.

ދެވަނަ ހާފުގައި ޓޮޓެންހަމްގެ ފަރާތުން ވަނީ އާދަޔާ ހިލާފު މޮޅު ކުޅުމެއް ފެނިގެން ގޮސްފައެވެ. އެ ޓީމުން ވަނީ ދެވަނަ ހާފު ފެށިގެން ދެ މިނެޓު ނުވަނީސް އަލުން އަނބުރާ މެޗުގެ ލީޑު ނަގާފައެވެ. އެގޮތުން 47 ވަނަ މިނެޓުގައި އެ ޓީމަށް މި ލަނޑު ޖަހައިދިނީ ފެނާންޑޯ ލޮރެންޓޭއެވެ. މެޗުގެ 53 ވަނަ މިނެޓުގައި ލޮރެންޓޭ އޭނާގެ ދެވަނަ ލަނޑު ކާމިޔާބުކުރިއިރު އޭގެ ހަ މިނެޓު ފަހުން ލަނޑެއް ޖަހާ އޭނާ ވަނީ ހެޓްރިކް ހަދާފައެވެ. ޓޮޓެންހަމްގެ ފަސްވަނަ ލަނޑު މެޗުގެ 65 ވަނަ މިނެޓުގައި ސޮން ޖަހައިދިންއިރު އެ ޓީމުގެ ހަވަނަ ލަނޑު އިތުރު ވަގުތުގެ ތެރޭގައި ޖަހައިދިނީ ކައިލް ވޯކާ ޕީޓާސްއެވެ.

މި މުބާރާތުގެ ކުއާޓާ ފައިނަލްގައި އެ ޓީމު ނުކުންނަން ޖެހޭނީ ސްވަންސީ ސިޓީއާ ދެކޮޅަށެވެ. ސްވަންސީ ކުއާޓާއަށް ދަތުރު ކުރީ 2-0 އިން ޝެފީލްޑް ވެނިސްޑޭ އަމިއްލަ ދަނޑުގައި ބަލިކޮށްގެންނެވެ. މި މެޗުގައި ސްވަންސީއިން ޖެހި ލަނޑުތައް އެ ޓީމަށް ޖަހައިދިނީ ޖޯޑަން އަޔޫގެ އިތުރުން ނޭތަން ޑަޔާއެވެ.

މި ދެ ޓީމު ބައްދަލުކުރާ ކުއާޓާ ފައިނަލްގެ މެޗު ކުޅުމަށް ހަމަޖެހިފައިވަނީ މި މަހުގެ 17 ވަނަ ދުވަހު ސްވަންސީގެ ސްޓޭޑިއަމް ކަމަށްވާ ލިބަޓީ ސްޓޭޑިއަމްގައެވެ.