މި ދުވަސްވަރަކީ ސްކޫލް ޗުއްޓީ ދުވަސްވަރަށް ވުމާއެކު މި ދުވަސްވަރު ބަލިތަކުން ރައްކާތެރިވުމަށް ސަމާލުކަން ދިނުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސްކޮށްފިއެވެ.
އާދިއްތަ ދުވަހުގެ ރޭ އެޗްޕީއޭއިން ނެރުނު ބަޔާނެއްގައި ބުނީ މި ދުވަސްވަރު ރާއްޖޭން ބޭރަށާއި، އަތޮޅުތެރެއަށް ދަތުރުފަތުރުކުރުން އިތުރުވުމާއި، ގޭގެއަށް ޒިޔާރަތްކުރުމާއި މީހުން އެއްވެ އުޅުން އިތުރުވެގެންދާނެ ކަމަށެވެ.
އެޗްޕީއޭއިން ބުނީ މި ދުވަސްވަރު ރާއްޖޭގައި ހޭންޑް ފުޓް އެންޑް މައުތު ބައްޔާއި، އަރިދަފުސް ރޯގާ އަދި ލޮލުރޯގާ އާންމުކޮށް އުޅޭ މިންވަރަށްވުރެ އިތުރުވެފައިވާ ކަމަށެވެ. އަދި މި ބަލިތަކުގެ އިތުރުން މި ދުވަސްވަރާ ދިމާކޮށް ޑެންގީހުމާއި އެހެނިހެން ބަލިތައް ފެތުރުމުގެ ފުރުސަތު އެބައޮތް ކަމަށާއި، އަދި ދުނިޔޭގެ ބައެއް ހިސާބުތަކުގައި ކޮވިޑް-19 ވެސް އިތުރުވަމުންދާކަން އެޗްޕީއޭއިން ވަނީ ފާހަގަކޮށްފައެވެ.
އެހެންކަމުން މި ދުވަސްވަރު ދަތުރުފަތުރުކުރުމުގައާއި، ގިނަ މީހުން އެއްވެ އުޅޭ ތަންތަނަށް ގޮސް މީހުންނާ ބައްދަލުވެ ހަދާއިރު، މި ބަލިތަކުން ރައްކާތެރިވުމަށް ކުރެވޭނެ ކަންކަމަށް ސަމާލުކަން ދިނުމަށް އެޗްޕީއޭއިން ވަނީ އިލްތިމާސްކޮށްފައެވެ. އަދި އެ އިދާރާއިން ވަނީ މިއިން ކޮންމެ ބައްޔަކުން ރައްކާތެރިވުމަށް ކުރެވޭނެ ކަންކަމުގެ އިރުޝާދު ދެއްވާފައެވެ.
