"މީހަކު ވިހެއުމުގެ ކުރިންވެސް ވިހެއުމަށް ފަހުވެސް، މި އޮންނަނީ ޤާނޫނުގެ ދަލެއްގެ ތެރޭގައި"
ކުރިން ފަދައިން ވަކި މީހެއްގެ ގާތަށް ގޮސް މުޖުތަމައުގެ މައްސަލަތައް ޙައްލު ކުރުމުގައި މިހާރު ގޮންޖެހުންތައް ހުންނާނެ
ސުޕްރީމް ކޯޓުގެ ފަނޑިޔާރު ހުސްނުއްސުއޫދު
މީހަކު ވިހެއުމުގެ ކުރިންވެސް އަދި ވިހެއުމަށް ފަހުވެސް، އޮންނަނީ ޤާނޫނުގެ ދަލެއްގެ ތެރޭގައިކަމަށް ސުޕްރީމް ކޯޓުގެ ފަނޑިޔާރު ހުސްނުއްސުއޫދު ވިދާޅުވެއްޖެއެވެ.
"ޖުޑީޝަރީ ފޯރ ޖޫނިއަރ" ޕްރޮގްރާމް ނިމުމުގެ ރަސްމިއްޔާތުގައި ވާހަކަ ދައްކަވަމުން ހުސްނުއްސުއޫދު ވިދާޅުވީ، ކޯޓުތަކާއި ފުލުހުންނާއި، އެފަދަ މުއައްސަސާތައް ނެތްނަމަ، ލޭއޮހޮރުވުން ފަދަ ކަންކަން ގިނަވާނެ ކަމަށެވެ. ނޫން ނަމަ ދެން ވާނެ ގޮތަކީ ވަކި ބަޔަކު ޤަބޫލު ކުރާ ބައެއްގެ ކައިރިއަށް މައްސަލަ ޙައްލު ކުރަން ދިއުން ކަމަށް އޭނާ ވިދާޅުވިއެވެ.
މިހާރު ޒަމާން ބަދަލުވެ، މައްސަލަތައް ގިނަވެ، އާބާދީވެސް އިތުރުވެފައިވާއިރު، ކުރިން ފަދައިން ވަކި މީހެއްގެ ގާތަށް ގޮސް މުޖުތަމައުގެ މައްސަލަތައް ޙައްލު ކުރުމުގައި މިހާރު ގޮންޖެހުންތައް ހުންނާނެކަން ފާހަގަ ކުރައްވައި ހުސްނުއްސުއޫދު ވިދާޅުވީ، ކޯޓުތައް އެކުލަވާލެވިފައިވަނީ އެ މަޤްސަދުގައި ކަމަށެވެ.
އޭނާ ވިދާޅުވީ، ކޯޓުތަކުން ކުރާ މަސައްކަތާއި، އެ މަސައްކަތްތަކުގެ ފެންވަރަށްވެސް ބޮޑެތި ބަދަލުތަކެއް މިހާރު އައިސްފައިވާ ކަމަށެވެ.
އޭގެ އިތުރުން، ފަރުދެއްގެ ޙައިސިއްޔަތުން ޤާނޫނަށް ބޯލަނބަން ޖެހޭ ސަބަބުތަކަށްވެސް ސުއޫދުގެ ވާހަަކަފުޅުގައި ވަނީ އަލިއަޅުވާލައްވާފައެވެ. އެގޮތުން މީހަކު އުފަންވުމާއި، މަރުވުމާއި ހިސާބަށްވެސް އެމީހަކު ހުންނަނީ "ޤާނޫނީ ދަލެއްެގެ ތެރޭގައި" ކަމަށް ސުއޫދު ވިދާޅުވިއެވެ. އުފަންވުމާއި މަރުވުން ރަޖިސްޓްރީ ކުރުން އޭގެ މިސާލެއްގެ ގޮތުގައި ސުއޫދު ފާހަގަ ކުރެއްވިއެވެ.
ޝަރުއީ ދާއިރާއަށް ޒުވާނުންގެ ޝައުގުވެރިކަން އިތުރުކޮށް އެ ދާއިރާއަށް ނުކުންނަ ޒުވާނުންގެ އަދަދު އިތުރުކުރުމަށް ކުރިއަށްގެންދިޔަ "ޖުޑީޝަރީ ފޯރ ޖޫނިއަރ" ޕްރޮގްރާމް ނިންމާލާފައިވާއިރު، މި ޕްރޮގްރާމުގައި ޒުވާނުން ޖުޑީޝަލް ދާއިރާއަށް ޝައުގުވެރިވާ މިންވަރު އިތުރުކޮށް، އެ ދާއިރާގެ ތެރެއަށް ވެއްދުމަށްޓަކައި މަސައްކަތްތަކެއް ކޮށްފައިވެއެވެ.
މި ޕްރޮގްރާމް ކުރިއަށްގެންގޮސްފައިވަނީ އުމުރުން 16 އަހަރާއި 20 އަހަރާ ދެމެދުގެ ޒުވާނުންނަށެވެ.
މިއީ ޖޭއެސްސީއާއި ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނާއި ޔޫއެންޑީޕީ ގުޅިގެން ކުރިއަށްގެންދިޔަ ޕްރޮގްރާމެކެވެ. މި ޕްރޮގްރާމް ހިންގުމަށް ބްރިޓިޝް ހައިކޮމިޝަނުންވެސް އެހީތެރިކަން ފޯރުކޮށްދީފައިވެއެވެ.
