ވ އާރަށު ހިޔާނާތުގެ މައްސަލައިގައި ކުރީގެ ރައީސް އަބްދުﷲ ޔާމީނުގެ މައްޗަށް ކުރާ ދައުވާއާއި ގުޅިގެން، ޙުކުމް ކުރުމުގެ އަޑުއެހުން ތާވަލުކޮށްފައިވާއިރު، އެމަނިކުފާނުގެ ސަޕޯޓަރުން ކްރިމިނަލް ކޯޓު ސަރަޙައްދަށް އެއްވެއްޖެއެވެ.

ރައީސް ޔާމީނުގެ އިތުރުން ޔޫސުފް ނައީމަށް ކުރާ ދައުވާއާ ގުޅިގެން ޙުކުމް ކުރެއްވުމަށް ތާވަލު ކުރައްވާފައި އޮތީ އާދިއްތަ ދުވަހުގެ ހެނދުނު 09:00 އަށެވެ. އެހެންނަމަވެސް އަޑުއެހުން ނުފެށި ގިނައިރުތަކެއް ވަނީ ވެގެންގޮސްފައެވެ.

ޕީޕީއެމް ޕީއެންސީގެ ލީޑަރޝިޕްގެ އިސް ބޭފުޅުންގެ އިތުރުން، ރައީސް ޔާމީނުގެ ސަޕޯޓަރުން ވަނީ ކްރިމިނަލް ކޯޓު ސަރަޙައްދަށް އެއްވެ، އަޑުގަދަކޮށްފައެވެ. ގިނަ އަދަދެއްގެ ފުލުހުންވެސް އެ ސަރަޙައްދުގައި ފޯރިމަރާފައިވެއެވެ.

ޔާމީނުގެ ސަޕޯޓަރުން ވަނީ މި އަޑުއެހުން ފެށުން ލަސްވަނީ މައްސަލަ ބައްލަވާ އެ ކޯޓުގެ އިސްގާޒީ އަހުމަދު ޝަކީލު "ރަހީނު" ކޮށްފައިވާތީކަމަށް ބުނެ އަޑުގަދަކޮށްފައެވެ. އެގޮތުން ސަރުކާރުން މި މައްސަލައަށް ނުފޫޒު ފޯރުވާކަމަށް ބުނެ ސަޕޯޓަރުން ވަނީ އަޑުގަދަކޮށްފައެވެ.

އަދި ޕީޕީއެމްގެ ލީޑަރޝިޕްގެ އިސް ވެރިންވެސް ވަނީ މި މައްސަލައިގެ އަޑުއެހުން ނުފެށި ލަސްވުމުގެ ސަބަބުން އެކަމުގެ ކަންބޮޑުވުން ފާޅުކޮށްފައެވެ.

އޭގެ އިތުރުން، ރާއްޖޭގައި ތިބިކަމަށް ބުނާ އިންޑިއާ ސިފައިން ބޭލުމަށާއި، މި ސަރުކާރުގެ އިސްތިއުފާއަށްވެސް އެތަނަށް އެއްވެ ތިބި ފަރާތްތަކުން ވަނީ ގޮވާލާފައެވެ. ހުރިހާ ސަޕޯޓަރުންވެސް ތިބީ ދިވެހި ދިދަތައް ހިފައިގެންނެވެ.

ޕްރޮސެކިއުޓަރ ޖެނެރަލް (ޕީޖީ) އޮފީހުން ބުނީ މއ. ކާމިނީހުޅަގުގެ ޢަބްދުﷲ ޔާމީން ޢަބުދުއްޤައްޔޫމް އާއި ވ.ފެލިދޫ ހަނދުވަރީގެ ޔޫސުފް ނަޢީމް، މިނިސްޓްރީ އޮފް ޓްއަރިޒަމް އާއި މޯލްޑިވްސް މާރކެޓިންގ އެންޑް ޕަބްލިކް ރިލޭޝަން ކޯޕަރޭޝަން މެދުވެރިކޮށް ޓުއަރިސްޓް ރިޒޯޓް ތަރައްޤީ ކުރުމަށްޓަކައި ވ. އާރަށް ކުއްޔަށް ދޫކުރުމުގެ މުއާމަލާތުގެ ތެރެއިން އޭރުގެ ރައީސުލްޖުމްހޫރިއްޔާ މަޤާމުގެ ނުފޫޒު ބޭނުންކޮށްގެން ރިޝްވަތުގެ ގޮތުގައި 1 މިލިއަން ޔޫއެސް ޑޮލަރ ނަގައި ލޯންޑަރ ކޮށްފައިވާ ކަމަށް ތުޙުމަތުކުރެވޭ ކަމަށެވެ.

އެ މައްސަލައިގައި ޔާމީންގެ މައްޗަށް 2 ދައުވާއެއް އަދި ނައީމްގެ މައްޗަށް 1 ދައުވާއެއް ކޮށްފައިވެއެވެ.