ބްލައިސް މަޓުއިޑީ, ޕްރޮފެޝަނަލް ފުޓުބޯޅަ ކުޅުން ހުއްޓާލަން ނިންމާފައިވާކަން ހާމަކޮށްފިއެވެ.

އުމުރުން 35 އަހަރުގެ މަޓުއިޑީ ފުޓުބޯޅަ ކުޅުން ހުއްޓާލިކަން ހާމަކޮށްފައިވަނީ އޭނާގެ ޓުވިޓަރ އެކައުންޓު މެދުވެރިކޮށް، ހުކުރު ދުވަހު ކުރި ޓުވީޓެއްގައެވެ. މަޓުއިޑީ ބުނީ ފުޓުބޯޅަ ދެކެ އޭނާ ވަރަށް ލޯބިވާ ކަމަށާއި، ފުޓުބޯޅައިން އޭނާއަށް އެތައް ކަމެއް ހާސިލްކުރެވުނު ކަމަށެވެ. ނަމަވެސް އޭނާ ބުނީ ފުޓުބޯޅަ ކުޅުން ހުއްޓާލުމަށް ބުނާ ވަގުތު އައިސް ޖެހިއްޖެ ކަމަށެވެ. އޭނާ ބުނީ ފުރިހަމަ މީހެއް ގޮތުގައްޔާއި، ކުއްޖެއްގެ ގޮތުގައި އޭނާގެ ހުވަފެންތައް ހަގީތަކަށް ހެދުނުކަމަށެވެ. މަޓުއިޑީ ބުނީ އޭނާ އެ ނިންމުން ނިންމަންޖެހުނީ ވަރަށް އުނދަގޫކޮށް ކަމަށާއި، ނަމަވެސް އެ ސަފްހާ އެއްލަނީ ވަރަށް ފަޚުރުވެރިކަމާއެކު ކަމަށެވެ.

މަޓުއިޑީ އޭނާގެ ސީނިއަރ ކެރިއަރު ފެށީ 2004 ވަނަ އަހަރު ފްރާންސްގެ ޓްރޮޔީސްއިންނެވެ. އޭގެ ފަހުން އޭނާ ވަނީ އެކި ކުލަބުތަކަށް ކުޅެފައެވެ. އޭގެތެރޭގައި; ސެއިންޓް އެޓިއެންއާއި، ޕެރިސް ސެއިންޓް ޖަރމަން (ޕީއެސްޖީ)އާއި، ޔުވެންޓަސް، އަދި އިންޓަރ މިއާމީ ހިމެނެއެވެ. މަޓުއިޑީ އެންމެ ފަހުން ކުޅުނީ އިންޓަރ މިއާމީއަށެވެ. އެއީ 2020 ވަނަ އަހަރުން 2021 ވަނަ އަހަރުގެ ނިޔަލަަށެވެ. ކުލަބު ފުޓުބޯޅައިގައި މަޓުއިޑީ ވަނީ ޖުމުލަ 21 ތަށި ކާމިޔާބުކޮށްފައެވެ.

ގައުމީ ޓީމަށް ކުޅުމުގެ ފުރުސަތު މަޓުއިޑީއަށް ލިބުނީ 2010 ވަނަ އަހަރުއެވެ. އޭގެ ފަހުން ގައުމީ ޓީމާއެކު ހޭދަކުރި ނުވަ އަހަރުގެ ތެރޭގައި އޭނާ ވަނީ ގައުމީ ޓީމަށް 84 މެޗު ކުޅެދީ، ނުވަ ލަނޑު ޖަހާފައެވެ. ފްރާންސްގެ ގައުމީ ޓީމުން 2018 ވަނަ އަހަރު ރަޝިޔާގައި އޮތް ފީފާ ވޯލްޑް ކަޕް މުބާރާތް ކާމިޔާބުކުރި ޓީމުގައިވެސް އޭނާ ހިމެނެއެވެ. އެއަށްފަހު ޖެހިގެން އައި 2019 ވަނަ އަހަރު އޭނާ ވަނީ ގައުމީ ޓީމަށްވެސް ކުޅުން ހުއްޓާލާފައެވެ.

މަޓުއިޑީ ވަނީ ފްރާންސްގެ އެންމެ މޮޅު ކުޅުންތެރިޔާގެ މަގާމު 2015 ވަނަ އަހަރު ހޯދާފައެވެ.