ޕީޖީ އޮފީހުގެ ނިއުސްލެޓަރ "އުންސުރު" ލޯންޗުކޮށްފި
މިއީ އޮފީހުގެ މަސައްކަތްތައް އާންމުންނަށް ތިލަކޮށްދިނުމަށް ފަށާފައިވާ މަސައްކަތެއް
އުންސުރު ލޯންޗުކުރުން
ޕްރޮސެކިއުޓަރ ޖެނެރަލް އޮފީހުގެ ނިއުސްލެޓަރ "އުންސުރު" ލޯންޗުކޯށްފިއެވެ.
ނިއުސްލެޓަރ ލޯންޗުކޮށްފައިވަނީ އަންގާރަ ދުވަހު ޕީޖީ އޮފީހުން ބޭއްވި ރަސްމިއްޔާތުގައެވެ.
ޕީޖީ އޮފީހުން ބުނީ ޤާނޫނީ މާނައިގައި ޢުންޞުރަކީ، ޖިނާއީ ޢަދުލުގެ ނިޒާމުގައި ރައްޔިތުންނަށް ލިބިދޭ ރައްކާތެރިކަން ކަށަވަރުކޮށްދޭ މަފްހޫމެއް ކަމަށެވެ. މީހެއްގެ މައްޗަށް ކުށެއްގެ ދަޢުވާއެއް އުފުލި، އެމީހަކަށް، އެމީހަކު ކުޅަ ޢަމަލެއްގެ ޖިނާއީ ޒިންމާ އުފުލަންޖެހޭނީ، އެމީހާ ކުރި ކަމަކީ، ޤާނޫނުގައި ކުށް ބަޔާންކުރުމަށް ހުރި ޢުންޞުރުތައް ފުރިހަމަވާ ޢަމަލެއް ނަމައެވެ. ޢުންޞުރުތައް ފުރިހަމަވޭތޯ ކަށަވަރު ކުރުމަކީ ޕްރޮސިކިއުޓަރ ޖެނެރަލްގެ މައިގަނޑު އެއް މަސްއޫލިއްޔަތު ކަމަށާއި، އުންސުރު ފުރިހަމަވާނަމަ ދައުވާކުރާނެ ކަމަށާއި، އަދި އުންސުރު ނެތްނަމަ ދައުވާއެއް ނެތް ކަން ޕީޖީ އޮފީހުން ފާހަގަކޮށްފައިވެއެވެ.
ޢުންޞުރު ނިއުސްލެޓަރއަކީ ޕީޖީ އޮފީހުގެ 15 އަހަރުވީ ތާރީޚުގައި މުޅިން އަލަށް ފަށާ މަސައްކަތެއް ކަމަށާއި، މީގެ ބޭނުމަކީ، އޮފީހުގެ މަސައްކަތް ހިނގާނުހިނގާ ގޮތް ޢާންމުންނަށް ތިލަކޮށްދިނުން ކަމަށް އެ އޮފީހުން ބުނެފައިވެއެވެ. ކުށުގެ ޢަމަލު ހިނގާ ގޮތާއި، ތަންތަނާއި، ވަގުތާއި، ކުށުގެ ޓްރެންޑުތަކަށް އަންނަ ބަދަލުތައް ކިޔައިދީ، ހޭލުންތެރިކަން އިތުރުކުރުމާއި، ޖިނާއީ ޢަދުލުގެ ނިޒާމުގައި ސުވާލު އުފެދޭ ކަންކަން ސާފުކޮށްދިނުން ކަމަށް ޕީޖީ އޮފީހުން ބުނެފައިވެއެވެ. އެގޮތުން ރިހާކުރު ފުޅި ވަގަށް ނެގި މީހާ ހަ އަހަރު ދުވަހަށް ޖަލަށްލީ އަޞްލު ސަބަބު ކިޔައިދެވޭތޯ ބެލުމާއި، ޤާނޫނުތަކަށް އަންނަ ބަދަލުތަކާއި، ހައިކޯޓާއި ސުޕްރީމް ކޯޓުން ނިންމާ ނިންމުންތަކާއި، އެތަކެތިން ޢާންމު މީހާއަށް އަސަރުކުރާނެކަމަށް ފެންނަ ގޮތްތައް، ޤާނޫނީ-ނޫން ލަފްޒުތަކަކުން ކިޔައިދެވޭތޯ ބެލުން ކަމުގައި ޕީޖީ އޮފީހުން ބުނެފައިވެއެވެ.
އެ އޮފީހުން ނިންމާ ކޮންމެ ނިންމުމަކީ މީހެއްގެ ނުވަތަ ބައެއްގެ ޙަޔާތާ ސީދާ ގޮތުން ގުޅިފައިވާނެ ނިންމުމެއްކަން ފާހަގަކޮށް ޕީޖީ އޮފީހުން ބުނީ އުންސުރުގެ ބޭނުމަކީ އެނިންމުން ނިންމާ ގޮތާއި، ސަބަބާއި، އެކަމުގައި ބަލާނެ ކަންކަމާއި، އެކަންކަން ހިނގާނުހިނގާ ގޮތް، ޢާންމުންނަށް ކިޔައިދިނުން ކަމަށެވެ.
