ވިޔަފާރިތަކަށް ދިމާވާ ނުރައްކާތައް މެނޭޖްކުރުމަކީ އޯގަނައިޒޭޝަން ސްޓްރަކްޗަރ އެކުލަވާލާ އިރު ވިސްނަން ޖެހޭ ކަމެއް: ޝާހިދު

ވިޔަފާރިތަކަށް ދިމާވާ ނުރައްކާތައް މެނޭޖްކުރުމަކީ އޯގަނައިޒޭޝަން ސްޓްރަކްޗަރ އެކުލަވާލާ އިރު ވިސްނަން ޖެހޭ ކަމެއް ކަމަށް އެމްޕީއެލް ގެ ސީއީއޯ ޝާހިދު އަލީ ވިދާޅުވެއްޖެއެވެ.

ޝާހިދު އެފަދައިން ވިދާޅުވީ ހޮނިހިރު ދުވަހު ޕެރަޑައިސް އައިލެންޑް ރިސޯޓްގައި ބޭއްވި ރިސްކް މެނޭޖްމަންޓް ފޯރަމްގައި ވާހަކަދައްކަވަމުންނެވެ. ޝާހިދު ވިދާޅުވީ އެފަދަ ފޯރަމް އެއްގެ ބޭނުމަކީ ކަމާއި ބެހޭ އިދާރާތަކުގެ މެދުގައި ހޭލުންތެރިކަން އިތުރުކޮށް، ރިސްކް މެނޭޖްމަންޓުގެ މުހިންމު ކަން، ކަމާއި ބެހޭ ފަރާތްތަކަށް އަންގާދިނުން ކަމަށެވެ. އަދި ރިސްކްއޭ ބުނުމުން އެންމެ ބޮޑަށް ފޯކަސްކުރެވެނީ މުވައްޒަފުންނާއި އިކުއިޕްމެންޓްތަކުގެ ސަލާމަތަށް އެކަނި ކަމަށް އޭނާ ވިދާޅުވިއެވެ.

އޭގެ ބަދަލުގައި ވިޔަފާރި އާއި އޮޕަރޭޝަނަލް އަދި ފައިނޭންޝަލް ރިސްކް ދެނެގަނެވިގެން ނޫނީ އެންޓަރޕްރައިޒް ރިސްކް މެނޭޖްމަންޓްގެ ކަންކަން ހަރުދަނާ ނުކުރެވޭނެ ކަމަށް އޭނާ ވިދާޅުވިއެވެ. އެއީ ގަވަރނަންސް ރަނގަޅުކުރުމަށްޓަކާ އެޅޭ މުހިންމު ފިޔަވަޅަކަށް ވާނެ ކަަމަށް ވެސް ޝާހިދު ވަނީ ފާހަގަކުރައްވާފައެވެ. އެންޓަރޕްރައިޒް މެނޭޖް ކުރުމަކީ ކުރިއާލާ ދިމާވެދާނެ ކަންކަމަށް ތައްޔާރުވެ، ކަމެއް ދިމާވާ ހާލަތުގައި އެކަމަކަށް އިޖާބަދޭން ހަރުދަނާ އުސޫލުތަކެއް އެކުލަވާލަން ލިބޭ ފުރުސަތެއް ކަމަށް ޝާހިދު ވިދާޅުވިއެވެ. އޭގެ ސަބަބުން 10 ވަރަކަށް އަހަރު ފަހުން ސިޔާސީ، އިޖުތިމާއީ އަދި އެހެން ސަބަބުތަކާއި ހުރެ ދިމާވެދާނެ ކަންކަން ދުރާލާ ދެނެގަނެވޭނެ ކަމަށް އޭނާ ވިދާޅުވިއެވެ. އެފަދަ ކަންކަން ދެނެގަނެގެން ނޫނީ އެކަންކަމަށް ހޭލެތުންތެރިވެ އަހުލުވެރި ނުކުރެވޭނެ ކަމަށް ޝާހިދު ވަނީ ފާހަގަކުރައްވާފައެވެ.

އަދި މިފަދަ ފޯރަމްއެއްގެ އަލީގައި އެ ދާއިރާއިން ކުރެވެން ހުރި ކަންކަން ދެނެގަނެވޭނެ ކަން ފާހަގަކުރައްވާ އޭނާ ވަނީ މިއީ ފެށުމެއްގެ ގޮތުގައި ބަލައިގަތުމަށް އިލްތިމާސްކުރައްވާފައެވެ. މީގެ އިތުރުން ކުރިއަށް އޮތްތަނުގައި މިފަދަ އިތުރު ބައްދަލުވުމުންތައް ބޭއްވުން މުހިންމު ކަމަށް ވެސް އޭނާ ވިދާޅުވިއެވެ. އެ ފޯރަމްގައި ފެނަލްސިޓުންގެގޮތުގައި އެމްޕީއެލްގެ އިސް ފަރާތްތަކުގެ އިތުރުން އެ ދާއިރާގެ ތަޖުރިބާކާރުން ބައިވެރިވެ ވަޑައިގެންނެވިއެވެ.