ފަގީރުންގެ ދަފްތަރުގައި ރަޖިސްޓްރީވުމުގެ ފުރުސަތު ހުޅުވާލަނީ

ފަގީރުންނާއި މިސްކީނުންގެ ދަފްތަރުގައި ރަޖިސްޓްރީވުމުގެ ފުރުސަތު ހުޅުވާލަން ނިންމައިފިއެވެ.

މިނިސްޓްރީ އޮފް އިސްލާމިކް އެފެއާޒްއިން ބުނީ މި ފުރުސަތު ހުޅުވާލާފައިވަނީ މާލެ ސަރަހައްދުން ފަގީރުންނާއި މިސްކީނުންގެ ގޮތުގައި އަލަސް ރަޖިސްޓްރީވުމަށް އެދޭ ފަރާތްތަކަށް ކަމަށެވެ.

ޑިސެމްބަރު 22 ވަނަ ދުވަހު މި ފުރުސަތު ހުޅުވާލާނެ ކަމަށާއި، އަންނަ އަހަރުގެ ޖެނުއަރީ 19 ގެ ނިޔަލަށް މި ފުރުސަތު ހުޅުވާލެވޭނެ ކަމަށް އިސްލާމިކް މިނިސްޓްރީން ބުނެފައިވެއެވެ. މި މުއްދަތުގައި ރަސްމީ ބަންދު ނޫން ކޮންމެ ދުވަހެއްގެ ހެނދުނު 09:00 އިން މެންދުރުފަހު 12:00 އަށް ފޯމު ހުށަހެޅޭނެއެވެ.

އިސްލާމިކް މިނިސްޓްރީން ބުނީ 2022 ވަނަ އަހަރު މުދަލު ޒަކާތުގެ ފައިސާ ލިބިފައިވާ ފަރާތްތަކުގެ ތެރެއިން ހާލަތު ބަދަލުވުމުގެ ސަބަބުން ދަފްތަރުން އުނިވެފައިވާކަން އަންގާފައިނުވާ ފަރާތްތަކަކީ މިވަގުތު ފަގީރުންގެ ދަފްތަރުގައި ހިމެނޭ ފަރާތްތައް ކަމަށާއި، އެހެންކަމުން އެ ފަރާތްތަކުން އަލަށް ދަފްތަރުގައި ބައިވެރިވުމަށް ފޯމު ހުށަހަޅާކަށް ނުޖެހޭނެ ކަމަށެވެ. އެހެންނަމަވެސް ދަފްތަރުގައި ރަޖިސްޓްރީވެފައިވާ އާއިލާގައި 19 ޖެނުއަރީ 2023 އަށް 18 އަހަރު ނުވަތަ 65 އަހަރު ފުރޭ މީހެއް ނުވަތަ މީހުންތަކެއް ހިމެނޭނަމަ އެ އާއިލާއަކުން އަލުން ފޯމު ހުށަހަޅަންޖެހެއެވެ.

ފަގީރުންގެ ދަފްތަރުގައި ރަޖިސްޓްރީވުމަށް އެދި ހުށަހަޅާ ފޯމު މިނިސްޓްރީގެ ވެބްސައިޓުންނާއި، ކައުންޓަރުން ލިބެން ހުންނާނެއެވެ. އަދި މިކަމަށް ޚާއްސަކޮށް ގާއިމްކުރެވޭ ކައުންޓަރުތަކުން ފޯމުތައް ބަލައިގަތުމަށް ހަމަޖެހިފައިވާކަމަށް އިސްލާމިކް މިނިސްޓްރީން ބުނެއެވެ.