ފަރިތަކުރުންތަކަށް ރޮނާލްޑޯ ރެއާލް މެޑްރިޑުގެ ދަނޑަށް

ކްރިސްޓިއާނޯ ރޮނާލްޑޯ އޭނާގެ ކުރީގެ ކުލަބް ރެއާލް މެޑްރިޑުގެ ޓްރެއިނިން ދަނޑެއްގައި ފަރިތަކުރުންތައް ކުރިއަށް ގެންގޮސްފި ކަމަށް މީޑިއާ ރިޕޯޓުތައް ބުނެފިއެވެ.

އުމުރުން 37 އަހަރުގެ ރޮނާލްޑޯ މިވަގުތު ހުރީ އެއްވެސް ކުލަބެއްގައެއް ނޫނެވެ. އެންމެ ފަހުން އޭނާ ކުޅުނީ ޕްރިމިއާ ލީގުގެ މެންޗެސްޓަރ ޔުނައިޓެޑަށެވެ. ނަމަވެސް އެ ކުލަބުގެ ކޯޗު އެރިކް ޓެން ހާގް އަދި އިސްވެރިންނާ މައްސަލަ ޖެހި ކުލަބުން ވަނީ ރޮނާލްޑޯ ދޫކޮށްލަން ނިންމާފައެވެ. އެ ކުލަބުން ރޮނާލްޑޯ ދޫކޮށްލަން ނިންމީ އޭނާ ކުލަބުގައި ހުންނަން ބޭނުންނުވާ ކަމަށް ހާމަކޮށްފައި ވަނިކޮށެވެ.

ސްޕެއިންގެ މީޑިއާތަކުގައި ބުނެފައިވާ ގޮތުން ރޮނާލްޑޯ ފަރިތަކުރުންތައް ކުރިއަށް ގެންދިޔައީ ރެއާލްގެ ޓްރެއިނިން ދަނޑެއް ކަމުގައިވާ ވަލްޑެބެބާސް ދަނޑުގައެވެ. އަދި ރޮނާލްޑޯ އެ ދަނޑުގައި ފަރިތަކުރުންތައް ކުރިއަށް ގެންދަޔައީ އޭނާގެ ދަރިފުޅު ކްރިސްޓިއާނޯ ޖޫނިއާ އާއެކު ކަމަށް ވެސް ރިޕޯޓުތައް ބުނެއެވެ. މީގެ އިތުރުން ރޮނާލްޑޯގެ މި ފަރިތަކުރުމުގެ ބޭނުންމަކީ އޭނާގެ ފިޓްނަސް ހިފެހެއްޓުން ކަމަަށް ވެސް ރިޕޯޓުތައް ބުނެއެވެ. ހަމައެއާކު އެ ފަރިތަކުރުމުގައި ބައިވެރިވީ ރޮނާލްޑޯ އެކަނި ކަމަަށާއި، އެހެން އެއްވެސް ކުޅުންތެރިޔަކު ބައިވެރިނުވާ ކަމަށް ރިޕޯޓުތަކުގައި ވެއެވެ.

ރޮނާލްޑޯ ވަނީ ރެއާލަށް ނުވަ އަހަރު ކުޅެދީފައެވެ. 2008 ވަނަ އަހަރު އެ ކުލަބަށް ބަދަލުވެ، 2018 ވަނަ އަހަރު އޭނާ ކުލަބް ދޫކޮށްލިއިރު، ރޮނާލްޑޯ އަކީ ދުނިޔޭގައި ހުރި އެންމެ މޮޅު އެއް ފުޓުބޯޅަ ކުޅުންތެރިޔާއެވެ. ރޮނާލްޑޯ ވަނީ ރެއާލަށް ކުޅެދިން 438 މެޗުން 450 ލަނޑު ޖަހާފައެވެ. މީގެ އިތުރުން އޭނާ ވަނީ ރެއާލާއެކު 15 ތައްޓެއް ކާމިޔާބުކޮށްފައެވެ. ހަމައެއާއެކު ދުނިޔޭގެ އެންމެ މޮޅު ކުޅުންތެރިޔާ އަށް ދެމުން އައި ބެލެންޑޯ އެވޯޑު ވެސް ރޮނާލްޑޯ ވަނީ ފަސް ފަހަރު ހޯދާފައެވެ.