އެންޓި ކޮރަޕްޝަން ކޮމިޝަނުގެ އައު ޝިއާރު އިފްތިތާހު ކޮށްފި
14 ޑިސެމްބަރު 2022 | ބުދަ 17:32އައު ޝިއާރަކީ "އެންމެން އެކުގައި - ކޮރަޕްޝަނާ ދެކޮޅަށް"
އޭސީސީގެ އައު ޝިއާރު
އެންޓި ކޮރަޕްޝަން ކޮމިޝަނުގެ އައު ޝިއާރު "އެންމެން އެކުގައި - ކޮރަޕްޝަނާ ދެކޮޅަށް" އިފްތިތާހުކޮށްފިއެވެ.
މި ޝިއާރު އިފްތިތާހުކޮށްފައިވަނީ ބުދަ ދުވަހު އޮޑިޓަރ ޖެނެރަލް އޮފީހުގެ ހޯލުގައި ބޭއްވި ހާއްސަ ރަސްމިއްޔާތެއްގައި އެންޓި ކޮރަޕްޝަން ކޮމިޝަނުގެ ރައީސްކަން ކުރިން ކުރައްވާފައިވާ މުޙައްމަދު ޝަފީޢުއެވެ.
މިޝިއާރުގެ މަޤްޞަދަކީ ފަސާދައާ ދެކޮޅަށް ކޮމިޝަނުން ކުރާ އުނދަގޫ ބުރަ މަސައްކަތުގައި މުޅި މުޖުތަމަޢު އެކަތިގަނޑަކަށްވެ، އެކައްޗެއް ކިޔައި އެންމެން ކޮރަޕްޝަނާ ދެކޮޅަށް ތެދުވުމަށް ބާރުއެޅުން ކަމަށް އޭސީސީން ބުނެއެވެ. އެހެންކަމުން ކުރިއަށް އޮތްތަނުގައި ކޮމިޝަނުން ބާއްވާ އެކި ހަރަކާތްތަކުގައި މި ޝިއާރު ބޭނުން ކުރަމުންގެންދާނެ ކަމަށް އެ ކޮމިޝަނުން މައުލޫމާތު ދެއެވެ.
އޭސީސީގެ އައު ޝިއާރެއް އިފްތިތާޙްކޮށްފައިވާއިރު، މީގެ ކުރިން އެ ކޮމިޝަނުން މިގޮތަށް ބޭނުން ކޮށްފައިވާ ޝިއާރުތައް ވެގެން ގޮސްފައިވަނީ ކޮމިޝަނުން ދޭން ބޭނުންވާ މެސެޖް ރައްޔިތުންނާ ހަމައަށް ފޯރުކޮށްދޭން ފަސޭހަވެގެން ދިޔަ ޝިއާރެއްގެ ގޮތުގައި ކަމަށް އެ ކޮމިޝަނުން ސިފަ ކުރެއެވެ. އެގޮތުން މިފަހަރުގެ މި ޝިއާރަކީވެސް ކޮމިޝަނާއި ރައްޔިތުންގެ މެދުގައި އޮންނަ ގުޅުން އިތުރަށް ވަރުގަދަވެ، އެކުގައި ގުޅިގެން މަސައްކަތް ކުރުމަށް ލިބިގެންދާނެ އިތުރު ބާރަކަށް ވެގެންދާނެ ޝިއާރެއް ކަމަށް އޭސީސީން ގަބޫލު ކުރެއެވެ.
ކޮމިޝަނުގެ މެންބަރު ޝަޒްނާ ހާޝިމް ވަނީ ކޮރަޕްޝަންގެ ސަބަބުން ލިބިގެންދާ ގެއްލުން ފާހަގަކުރައްވައި އެ ކޮމިޝަނުގެ އައު ޝިޔާރުގައިވާ ފަދައިން ރާއްޖެ ފަދަ ކުޑަ ޤައުމެއްގައި އެންމެ އެކުގައި ކޮރަޕްޝަނާ ދެކޮޅަށް މަސައްކަތް ކުރަން ޖެހިފައިވާކަން ފާހަގަކުރައްވާފައެވެ. އަދި ކޮރަޕްޝަން ހުއްޓުވުމަށް އޭސީސީ އިން ކުރަމުންދާ މަސައްކަތްތަކުގައި، އަދިވެސް ހުރަސްތަކެއް އެބަހުރިކަމަށާއި ނަމަވެސް، ކޮރަޕްޝަނާ ދެކޮޅަށް ކުރެވޭ މަސައްކަތްތައް ކާމިޔާބުވެ ކުރިއެރުންތަކެއް ލިބޭނީ އެންމެން ގުޅި އެކަތި ގަޑަކަށް ވެގެންކަމަށް އޭނާ ވިދާޅުވިއެވެ.
