މިއީ އަހަރެންގެ ފަހު ވޯލްޑް ކަޕް: މެސީ

މިހާރު ޤަތަރުގައި ކުރިއަށްދާ ފީފާ ވޯލްޑް ކަޕް މުބާރާތަކީ އޭނާގެ ފަހު ވޯލްޑް ކަޕް ކަމަށް އާޖެންޓީނާގެ ކެޕްޓަން ލިއޮނަލް މެސީ ބުނެފިއެވެ.

މެސީ މިހެން ބުނީ މުބާރާތުގެ ސެމީ ފައިނަލްގައި ކްރޮއޭޝިއާ ބަލިކޮށް ފައިނަލަށް ދަތުރުކުރި މެޗަށްފަހު ވާހަކަ ދައްކަމުންނެވެ. މިއީ މެސީ އާޖެންޓީނާއާއެކު ވޯލްޑް ކަޕްގެ ފައިނަލްގައި ކުޅޭ ދެ ވަނަ ފަހަރެވެ. މެސީ ވަނީ 2014 ވަނަ އަހަރުގެ ފައިނަލްގައި ވެސް ކުޅެފައެވެ. މެސީގެ ފުޓުބޯޅަ ކެރިއަރުގައި މިހާރު މަދުވަނީ ވޯލްޑް ކަޕްގެ ތައްޓެވެ.

މިއަހަރުގެ މުބާރާތުގައި މެސީ ވަނީ ރެކޯޑެެއް ވެސް ޤާއިމުކޮށްފައެވެ. އެއީ ވޯލްޑް ކަޕްގައި އާޖެންޓީނާ އަށް އެންމެ ގިނަ ލަނޑު ޖަހައިިދިން ކުޅުންތެރިޔާގެ ރެކޯޑެވެ. މެސީ ވަނީ މިހާތަނަށް ވޯލްޑް ކަޕްގައި 11 ލަނޑު ޖަހާފައެވެ. ކުރިން މި ރިކޯޑު އޮންނަނީ 10 ލަނޑު ޖެހި ގެބްރިއަލް ބަޓީސްޓޫޓާ އަތުގައެވެ.

މެޗަށްފަހު އާޖެންޓީނާގެ މީޑިއާ އަކަށް މެސީ ބުނީ އޭނާގެ ވޯލްޑް ކަޕް ދަތުރު ފައިނަލަކުން ނިންމާލުމަށް ލިބޭތީ ވަރަށް އުފާވާ ކަމަށެވެ. އޭނާ ބުނީ ކުރިއަށް އޮތް ވޯލްޑް ކަޕާ ކުރިމަތިލާން އަދި އަހަރުތަކެއް އޮތް ކަމަށެވެ. އެހެންކަމުން އެ މުބާރާތުގައި ކުޅެވޭނެކަމަށް ޤަބޫލު ނުކުރެވޭ ކަމަށެވެ. އޭނާ ބުނީ މިހާރު ލިބުނު ފުރުސަތުގައި ވޯލްޑް ކަޕް ނިންމާލުމަކީ އެންމެ ރަނގަޅު ގޮތް ކަމަށެވެ.

މީގެ އިތުރުން މެސީ ބުނީ އަނެއްކާ ވެސް އާޖެންޓީނާ އަށް ވޯލްޑް ކަޕްގެ ފައިނަލަށް އާދެވިއްޖެ ކަމަށާއި، އެކަމުގެ އުފާ ލިބިގަތުމަށް އެދޭ ކަމަށެވެ. އޭނާ ބުނީ މުބާރާތުގައި އާޖެންޓީނާ ކުރިއަށް ދާން ޖެހުނީ އުނދަގޫ ހާލަތެއްގައި ކަމަށާއި، އެކަން ކަމާއެކު ކުރިއަށް ދެވޭތީ އުފާވާ ކަމަށެވެ.

މުބާރާތުގައި ފައިނަލްގައި އާޖެންޓީނާ ވާދަކުރާނެ ޓީމެއް އެނގޭނީ ބުދަ ދުވަހުގެ ރޭ ފްރާންސް އަދި މޮރޮކޯ ވާދަ ކުރާ މެޗަށްފަހުއެވެ.