ޕާޓީ އުވާލަންދެން އެއްވެސް ސިޔާސީ ހަރަކާތެއް ނުހިންގަން ޑީއާރުޕީއަށް އަންގައިފި

ދިވެހި ރައްޔިތުންގެ ޕާޓީ (ޑީއާރުޕީ) އުވާލަން އިލެކްޝަންސް ކޮމިޝަނުން ނިންމާފައިވާތީ އެ ޕާޓީ އުވާލުމާ ހަމައަށް އެއްވެސް ސިޔާސީ ހަރަކާތެއް ނުހިންގުމަށް އަންގައިފިއެވެ.

މިކަން އިލެކްޝަންސް ކޮމިޝަނުން ހާމަކޮށްފައިވަނީ އަންގާރަ ދުވަހުގެ ރޭ ނެރުނު ނޫސްބަޔާނެއްގައެވެ. އެ ބަޔާނުގައި އެ ކޮމިޝަނުން ބުނެފައިވަނީ ސިޔާސީ ޕާޓީގެ ޤާނޫނުގެ 12 ވަނަ މާއްދާއިން ސިޔާސީ ޕާޓީއެއް ވުޖޫދުގައި އޮތުމަށް ޤާނޫނު ލާޒިމުކުރާ 3000 މެންބަރުން ހަމަކުރުމަށް، ޑީއާރުޕީއަށް ތިން މަސް ދުވަހުގެ މުއްދަތު ދިން ކަމަށެވެ. އަދި އެ މުއްދަތު 25 އޮކްޓޯބަރު 2022 އަށް ހަމަވިއިރުވެސް 3000 މެންބަރުން ހަމަވެފައި ނުވާ ކަމަށާއި އެހެންވެ ޕާޓީ އުވާލަން ނިންމާފައިވާ ކަމަށެވެ.

މި ނިންމުމާ ގުޅިގެން އިލެކްޝަންސް ކޮމިޝަނުން އެ ޕާޓީގެ ލީޑަރޝިޕާ ބައްދަލުކޮށް، ޑީއާރުޕީގެ ނަމުގައި އެއްވެސް ސިޔާސީ ހަރަކާތެއް ނުހިންގުމަށާއި ސިޔާސީ ޕާޓީގެ ޤާނޫނުގައި ބުނާ ގޮތުގެ މަތީން ޕާޓީ އުވާލުމުގެ އިޖުރާއާތު ފުރިހަމަ ކުރުމަށް އެ ޕާޓީއަށް ލިޔުމުން އަންގާފައިވާނެ ކަމަށް ވެސް އެ ކޮމިޝަނުގެ ބަޔާނުގައި ވަނީ ބުނެފައެވެ.

ޑީއާރުޕީގެ މިހާރުގެ ލީޑަރަކީ ކާށިދޫ ދާއިރާގެ މެންބަރު އަބްދުﷲ ޖާބިރެވެ.

ރާއްޖޭގައި ސިޔާސީ ޕާޓީތައް ގިނަ ނަމަވެސް، ގިނަ ޕާޓީތަކުގައި 10،000 މެންބަރުންވެސް ހަމައެއްނުވެއެވެ. ގާނޫނުގައި ބުނާގޮތުން ދައުލަތުން ބަޖެޓު ދޭނީ 10،000 މެންބަރުން ހަމަވާ ޕާޓީތަކަށް އެކަންޏެވެ. މި އަދަދު ހަމަވާ ޕާޓީތަކުގެ ތެރޭގައި ހިމެނެނީ 4 ޕާޓީއެވެ. އެއީ އެމްޑީޕީއާއި ޕީޕީއެމްއާއި ޖުމްހޫރީ ޕާޓީއާއި އަދާލަތު ޕާޓީއެވެ.